FILIFILIA POPE FOU 

Ua mae’a nei galuega a afioga i Katinale o le Ekalesia Katoliko ma ua filifilia ai nei le afioga i le Katinale Robert Prevost, e avea ma Pope Leo XIV.  O se ulua’i Katinale mai le Iunaite Setete ua filifilia e avea ma Fa’aao o le Ekalesia.

I le mae’a ai ona filifilia o ia, sa faapea ona tula’i le Afioga Pope Leo XIV, i  luma o le fa’ase’e a le malumalu a le Sagato Peteru ma ia fa’amanuia atu i le motu o tagata sa nonofo fa’atalitali mo lea fa’aaliga.

Sa saunoa le Afioga Pope Leo XIV, ua iai sona naunauga ina ia ulufale atu lana feau o le filemu, i totonu o fatu ma aiga ma tagata uma, i so’o se itu o le lalolagi.

Na ia fa’aleoina lona agaga fa’afetai i ona uso a Katinale mo le filifiliga o ia.  Ma sa ia tautala i le gagana Italia, Sipaniolo ma le gagana Latina.

Sa ia fa’aleoina foi lona agaga fa’afetai i le Au Paia i Amerika i Saute, lea sa galue ai.

E le gata i lea, sa ia molimau e uiga i le Afioga ia Pope Francis lea ua tu’umalo.  Na fa’ai’u lana saunoaga, i lona taitaiina o tagata i se tatalo.

Na filifilia Pope Leo XIV i le lona  lua o aso talu ona fa’ataunu’uina iloiloga a Katinale e to’a 133 i totonu o se potu sa lokaina.  Ina ua mae’a ona ‘autasi afioga i Katinale i la latou filifiliga, sa faapea lona ona fa’ailoa atu i le lalolagi la latou faaiuga, e ala i se asu pa’epa’e na va’aia o alu a’e i luga o le malumalu Sistine.

Sa tele ina fa’aaluina le soifuaga auauna a le Pope fou i atunu’u i fafo, na aofia ai ana a’oa’oga i Roma ma lona taunu’u atu i Peru i le 1985.  O lo’o ta’ua i nusipepa i Peru le avea o le taitai fou ma sitiseni o Peru.

FA’AMAMALUINA LE ASO O SWAINS IA ME 13

I sana Faatonuga Faaletaitai lona lua, talu ona avea o ia ma Kovana o Amerika Samoa, ua sainia e le afioga Pulaalii Nikolao Pula ia se fa’atonuga, e avea ai le aso 13 o Me ma aso faapitoa mo Swains – ma aloa’ia ai le avea o lea aso ma aso malolo i totonu o Amerika Samoa.

O lo’o ua ta’ua i totonu o le fa’atonuga a le kovana e faapea, ona o le aso 13 o Me, 1925 sa malaga atu ai le alii Ta’ita’i ‘Au Lutena C.D. Edgar, o le Fuava’a a le Iunaite Setete, i Swains mo le sisiina o le tagavai a le Iunaite Setete o Amerika, faatasi ai ma se tula’i fa’aaloalo;

Atoa ai ma le avea o Swains ma se tasi o motu e fitu a Amerika Samoa; 

Faapea ai ma le avea o tupuaga a Eli Huchinson Jennings, Sr. ma le faletua ia Malia, le afafine o se matai Samoa, ma so’o se tasi sa fanau i Swains i tua mai o Mati 4, 1925, ma Nesionale o le Iunaite Setete.

O le aso 2 o Me, 2025 na sainia ai e le afioga i le Kovana ia lenei fa’atonuga aloa’ia, ma o le aso lava lea e tasi sa ia fa’alauiloa fa’alaua’itele ai le avea o Me 13 ma aso malolo i totonu o Amerika Samoa, e amata atu i lenei tausaga ma tausaga o i le lumanai.

SI’ITIA TAU O TAUMAFA A AMERIKA SAMOA

I se ripoti mai e tusa ai ma tau o taumafa a le teritori ia Aperila (Basic Food Index-BFI), ua va’aia ai le si’itia o tau o taumafa pe a ma le 4.0% talu mai le masina o Mati, ma o le oloa ua va’aia le maualuga o lona siitaga, o tau o fuamoa.

O le tau na iai fuamoa ia Mati, sa $4.83 ae o lea ua si’i i le $7.22 i le tasene fuamoa, e ui ina a’afia Amerika i le fa’ama’i o le ‘bird flu’ lea na mamate ai ni manu e silia ma le 168 miliona, i totonu o Amerika i le tolu tausaga na se’i mavae atu.

O isi taumafa ua va’aia le si’itia o tau, e aofia ai Moa lea ua $19.98 i le pusa e 10kilokalama, o tau o I’a ua $5.19, o alaisa ua $5.35 i le taga e 5pauna, Fasi pua’a (pork spareribs) $1.98 i le pauna., Sosisi $2.18, Fa’i $1.53 i le pauna, Aisi Kulimi 2 ltr. $9.58, Falaoa $3.58, Si’usi’u Pipi $2.08 i le pauna., Suka, taga 2 kg. $3.75, Pisupo $5.57, and Mayonnaise $4.92.

Ae ua iai foi nisi o oloa ua pa’u o latou tau, e aofia ai apa inu $1.09; Talo $2.12; Susu (Fresh Milk) $2.51 ma le Pata $4.77.

O lo’o tumau pea le tau o le Vai, Saimini ma apa Tuna i le masina o Aperila.