Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

JOE TOGITOGI

 

O le ali’i pagota lea ua fa’atolu ona ta’usala e le Fa’amasinoga Maualuga i le moliaga mamafa o le sola ese mai le falepuipui, na toe tula’i fo’i i le vaiaso na te’a nei i luma o le Fa’amasinoga Fa’aitumalo, ona o tu’uaiga i lona sola ese mai le toese i Tafuna.

 

O le aso Lulu o le vaiaso na te’a nei na tula’i ai Joe Togitogi i luma o le afioga i le ali’i Fa’amasino ia Elvis P. Patea, ma ia teena ai le moliaga mamafa e tasi o le sola ese mai le falepuipui ua tu’uaia ai o ia e le malo. O le aso Tofi na fa’atulaga e faia ai le ulua’i iloiloga o lana mataupu, peita’i na fa’ailoa e Togitogi ma lana loia fautua ia Anna Whiles, e le manana’o i laua e fa’ataunu’u se ulua’i iloiloga, ae sili ai loa le tu’u atu sa’o o le mataupu i luma o le fa’amasinoga maualuga e fa’atulaga ai se aso o le fa’amasinoga autu.

 

O le aso Faraile na te’a nei na fa’atulaga e tula’i ai Togitogi i luma o le afioga i le Fa’amasino Sili ia Michael Kruse, ae ina ua valaau lana mataupu, sa fa’ailoa e le loia a le malo ia Laura Garvey, e le o mafai ona auai atu Togitogi i le fa’amasinoga ona o loo gasegase o ia.

 

O le aso Lulu la o le vaiaso nei lea ua fa’atulaga e tula’i ai Togitogi i luma o le fa’amasinoga maualuga mo le fa’atulagaina o le aso o lana fa’amasinoga autu i le mataupu fou e pei ona tu’uaia ai o ia, ae o le aso fo’i lea ua mae’a ona fa’atulaga e lau ai lana fa’asalaga, fa’atasi ai ma isi ali’i pagota e to’atolu, ona o le mataupu e pei ona ta’usala ai i laua i le sosola i tua mai le falepuipui i le masina o Ianuari o le tausaga 2018.

 

O isi pagota e to’alua na sosola i tua mai Togitogi i le tausaga na te’a nei, e aofia ai Ryan Pite ma Joseph Iakopo. O i latou uma nei o loo tuli a latou fa’asalaga fa’a falepuipui ina ua ta’usala i latou i moliaga o le gaoi ma le talepe fale.

 

WAYNE “UENI” GASOLO

 

Ua i luma nei o le fa’amasinoga maualuga se talosaga na fa’aulu e le Ofisa Fa’anofovaavaaia, mo se poloaiga a le afioga i le Fa’amasiino Sili ia Michael Kruse e fa’atulaga ai se iloiloga faapitoa mo le ali’i pagota o Wayne “Ueni” Gasolo, ona o tu’uaiga fou fa’asaga ia te ia, i lona fa’aaogaina lea o fualaau fa’asaina ao faanofovaavaaia ai o ia mo le 5 tausaga.

 

O le taeao la ananafi na fa’atulaga ai le ulua’i iloiloga a Gasolo, ma ua toe tolopo mo le vaiaso fou, ina ia lava ai le taimi la te sauni ai ma lana loia fautua ia Rob McNeill mo le tuuina atu o a la molimau e lagolagoina ai le la mau tete’e fa’asaga i tu’uaiga a le Ofisa Faanofovaavaaia.

 

Na taua i le ripoti a le Ofisa Faanofovaavaaia e fa’apea, o le 2 vaiaso talu ai na pu’e fa’apagota ai e Leoleo ia Gasolo fa’atasi ai ma nisi tamaita’i se to’alua, ona o tu’uaiga i lo latou faia lea o ni gaioiga e save’u ai le nonofo filemu o tagata i le itu i sisifo o le atunu’u.

 

I le teena ai e Gasolo o tu’uaiga fa’asaga ia te ia i le mataupu fou e pei ona tula’i mai i le 2 vaiaso talu ai, na fa’atulaga ai loa e le afioga i le ali’i Fa’amasino ia Elvis P. Patea le tinoitupe e $1,000 e tatala ai o ia i tua.

 

A o taofia ai Gasolo i le falepuipui ina ua le mafai ona ia totogi le tupe sa fa’atulaga e tatala ai o ia i tua, na aga’i atu ai loa se sui o le Ofisa Faanofovaavaaia ma fa’ataunu’u se suega faapitoa i lona tino, e siaki ai poo ia fa’aaogaina fulaau fa’asaina poo le ‘ava malosi fo’i.

 

I le suega sa faia, lea fo’i sa molimauina e le sui o le Ofisa Faanofovaavaaia, na maua ai i le tino o Gasolo vailaau oona o loo maua i le laau fa’asaina o le mariuana faapea ai ma le pauta oona o le aisa. I le fa’aiuga la o le suega, ua fa’amaonia ai le fa’aaogaina e Gasolo o fualaau fa’asaina, ma ua ia soli ai tuutuuga o lana nofovaavaaia sa tuuina atu e le fa’masinoga i le 2017, e aofia ai le fa’asa lea ona ia toe tagofia le ‘ava malosi poo fualaau fa’asaina.

 

O le tausaga e 2017 na ta’usala ai e le fa’amasinoga maualuga ia Gasolo i le moliaga mamafa o le umia fa’asolitulafono o vaega o le pauta fa’asaina o le aisa, ma faasala ai loa o ia i le toese mo le umi e 20 masina, o se tasi lea o tuutuuga o lana nofovaavaaia e 5 tausaga.

 

A o i ai Gasolo i le toese i le tausaga na te’a nei, na faia ai e le Ofisa Faanofovaavaaia se suega i lona tino e faamaonia ai o loo ia usitaia poloaiga a le fa’amasinoga. I lea suega sa faia, na fa’amaonia ai lona fa’aaogaina o le fualaau fa’asaina ma le mariuana, ma molia ai loa o ia i lona le usitaia o tuutuuga o lana nofovaavaaia.

 

I le masina o Iulai o le tausaga na te’a nei, na fa’asala ai e le fa’amasinoga maualuga ia Gasolo mo le 3 masina, e fa’aopoopo i lana fa’asalaga fa’a falepuipui sa tuli e 20 masina, ona o lona le usitaia o tuutuuga o lana nofovaavaaia.

 

FISILI FETUAO

 

O se tasi o tuutuuga o le nofovaavaaia a le ali’i o Filisi Fetuao lea na tuuina atu e le fa’amasinoga fa’aitumalo i le vaiaso na te’a nei, ina ua ta’usala o ia i le moliaga o le faatupu vevesi i nofoaga faitele, o le fa’asa lea ona toe tu vae i le maketi i Fagotogo.

 

Na ulua’i tu’uaia e le malo ia Fetuao i le moliaga o le faaoolima i le tulaga tolu, faaleaga meatotino i le tulaga tolu, faapea ai ma le fa’atupu vevesi i nofoaga faitele. Ae i lalo o se maliliega na sainia e le ua molia ma le malo, na ia tali ioe ai i le moliaga o le faatupu vevesi i nofoaga faitele, ae solofua e le fa’amasinoga moliaga sa totoe ai i le tagi na fa’aulu e le malo.

 

I le tali ioe ai o Fetuao i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 17 o Novema o le tausaga na te’a nei, sa ia fa’atupu ai ma lona iloa ni gaioiga e save’u ai le nonofo filemu o tagata lautele sa i ai i le maketi i Fagatogo, e ala i lona leoleoa solo ma faaumuumu.

 

Sa ia ioeina fo’i lona fa’aoolima i se Tama e 56 tausaga le matua sa i ai i totonu o le maketi, ma mafua ai ona fa’aleagaina le tele o meatotino a le mamalu o le aufai fa’atoaga sa i ai i le maketi i lea aso.

 

Na fa’ailoa e le afioga i le ali’i Fa’amasino ia Elvis P. Patea ia Fetuao e fa’apea, o le fa’afitauli o loo a’afia ai o ia, o lona fiafia lea e tagofia le ‘ava malosi, atoa ai ma lona le mafai ona fa’atonutonu le ‘ava malosi.

 

“Afai ae toe molia mai oe i se isi solitulafono i totonu o le tausaga lea ua e nofovaavaaia ai, o le a sili atu loa ona mamafa se isi fa’asalaga e tuuina atu e le fa’amasinoga ia te oe,” o le saunoaga lea a Patea ia Fetuao.

 

O nisi o tuutuuga o le nofovaavaia a Fetuao, e le gata na te totogi le salatupe e $135, ae auai fo’i i aoaoga e fesoasoani ai i le tulaga o le ita faapea ai ma le soona fa’aaoga le tatau o le ‘ava malosi.