Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

MUSU LE FAFINE E TA’U I LEOLEO LONA TO’ALUA

 

Na fa’ailoa e le fafine mai Aua lea na manu’a ona foliga ina ua fasi e lona to’alua, na mafua ona musu e vili Leoleo i le taimi na fa’aoolima ai le tamaloa ia te ia, e le mana’o e loka lona to’alua, ona e na o ia e fa’alagolago i ai le tausiga o le la aiga.

 

Na tofu atu i le Ofisa o Leoleo i Fagatogo i le amataga o le vaiaso nei le mataupu i le va o le ulugalii lenei mai Aua, ina ua vili e le uso o le fafine Leoleo mo se fesoasoani, ina ua vaaia e le uso o le fafine una’oa ma maosia i foliga o si ona uso, e mafua mai ina ua fasi e lona to’alua.

 

O le mae’a ai ona fesiligia e Leoleo o le fafine na a’afia, na latou aga’i atu ai loa ma taofia fa’apagota lona to’alua, ma tula’i ai loa le ua molia i luma o le fa’amasinoga fa’aitumalo i le taeao o le aso Lua o le vaiaso nei.

 

I le mae’a ai ona teena e le ua molia o moliaga mama e lua ua molia ai o ia e le malo, le moliaga o le faatupu vevesi i totonu o lona aiga atoa ai ma le faaoolima i le tulaga tolu, na tatala ai loa i tua o ia e fa’atali ai lona fa’amasinoga e aunoa ma se tupe e totogi, i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le aua lea nei toe nofo i le latou fale ma lona to’alua, pe toe taumafai fo’i e fa’afesoota’i lona to’alua i soo se auala, a ia saili se isi nofoaga e nofo ai, e fa’atalitali ai le fa’aiuga o lana mataupu.

 

Na taua e le fafine na a’afia i Leoleo e fa’apea, o le vevesi na mafua mai ina ua ita lona to’alua i lona fa’aaoga o tupe e taalo Bingo ma totogi ai ana Ponesi, ae le fa’aaoga e fa’atau ai meaa’i mo le aiga. O le tamaloa e faigaluega i le kamupani ‘ia i le sifi po.

 

Na taua e ni isi o aiga tuaoi i le ali’i ua molia, o ni isi o po e tia’i ai e lona to’alua le la fanau i aiga tuaoi, ae alu ta’a Bingo. O isi fo’i taimi, e fa’aalu ai e lona to’alua tupe e totogi ai ana pepa Ponesi.

 

O le ita tele o le ua molia i ripoti o loo maua mai i tagata o le nu’u, na alu ai loa ua inu ana fagupia i le po o le aso Sa na te’a nei, ma sau ai loa i le leva o le po ma fasi lona to’alua i le latou fale.

 

O le taeao o le aso Gafua na sosoo ai na logo ai e le uso o le fafine le Ofisa o Leoleo mo se fesoasoani, ina ua ia molimauina manu’a i foliga o si ona uso.

 

HENRY TAULAGA

 

O le aso 28 o Setema lea ua fa’atulaga e lau ai le fa’asalaga a le ali’i o Henry Taulaga, ina ua faamaonia e le fa’amasinoga maualuga le moliaga o le umia faasolitulafono lea o vaega o le pauta o le aisa.

 

Na ulua’i molia Henry Taulaga i le moliaga mama o le umia faasolitulafono o le pauta o le aisa, o se moliaga e mafai ona fa’asala ai o ia i le toese mo le umi e le itiiti ifo i le 5 tausaga, ae le sili atu i le 10 tausaga, ae i lalo o se maliliega na latou sainia ma le malo, na ia tali ioe ai i le moliaga lea na toe teuteu e le malo, le moliaga o lona umia faasolitulafono o le pauta o le aisa, lea e mafai ona fa’asala ai o ia i le toese mo le umi e le silia i le 5 tausaga, pe faasala foi i le salatupe e le silia i le $5,000, poo le fa’asala fo’i i fa’asalaga uma ia e lua.

 

I le tali ioe ai o le ua molia i le moliaga e pei ona toe teuteu e le malo, sa ia ta’utino ai e fa’apea, i se taimi o le aso 19 Ianuari 2018, a o avea o ia ma ave pasi, sa ia umia faasolitulafono ai se paipa e ula ai le pauta o le aisa. I totonu o lea paipa, sa maua ai e Leoleo vaega o le pauta fa’asaina o le aisa. Na ta’utino le ua molia e fa’apea, o lana gaioiga sa faia sa le tusa lea ma ala o le tulafono.

 

O lo o taofia pea Taulaga i le toese i Tafuna e fa’atali ai le aso lea ua fa’atulaga e lau ai lana fa’asalaga.