SAMOA

MAUA TINO MALIU O SE TINA MA’ITAGA I LE SAMI

E tusa ai ma se ripoti mai i le Samoa Observer, ua fa’amaonia mai ai e le Komesina o Leoleo a Samoa, le susuga ia Auapaau Logoitino Filipo ia le mauaina o le tino maliu o se tina ma’itaga mai Faleu, Manono, e 26 tausaga le matua, i le sami

I ulua’i ripoti na ta’ua ai le alu o le tina i le taeao o le aso Lulu, e faisea ma maua atu ai lona tino maliu e nisi o le nu’u tuaoi, i le aoauli.  Ma na fa’atopetope atu o ia i le falema’i, ae ua tuai ni togafitiga e fa’asao ai lana pepe.

Sa fa’aalia foi e Auapa’au le fa’aauauina pea o a latou su’esu’ega i lenei mataupu.

TO’ALIMA NA LAVEA’I MAI I GATAI O LE FALETALIMALO A LE TAUMEASINA

O le aoauli o le aso Tofi na fa’asaoina mai ai ia se turisi ma nisi e to’afa o le aufaigaluega a le faletalimalo o le Taumeasina, e tusa ai ma se ripoti mai i le Komesina o Mu ma Fa’alavelave Fa’afuasei, ia Tanuvasa Petone Mauga.

Sa ta’ua e Tanuvasa le faatopetope atu o lana aufaigaluega ina maua le vala’au mo se lavea’i.

O lenei fa’alavelave na tula’i mai i le 2:30 o le aoauli o le aso Tofi (aso Lulu i Amerika Samoa), ina ua amata ona tafea le va’a (kayak) a se turisi i gatai o le faletalimalo ma o atu ai nisi o le aufaigaluega e to’afa, e fesoasoani, ae fa’aletonu ai ma latou.

Sa maua uma atu i latou i se tama’i motu i tai, e le vaega lavea’i (SFESA) ma toe aumai saogalemu ai i latou, i uta.

I se fautuaga mai i le alii Komesina, e taua le fa’alogologo i tulaga o le tau, ona o nisi taimi e foliga mai o lo’o to’afilemu mea uma, ae e suia lava i se taimim vave.  Ae le gata i lea, e lelei lava le fa’ailoa i tagata le mea o le a agai ai ma ia taulimaina uma tulaga e mana’omia, aua fa’alavelave fa’afuase’i.

MANUMALO FOFOGA FETALAI I LE FAAMASINOGA

E tusa ai ma se fa’ai’uga mai i le Faamasinoga Maualuga a Samoa, e mafai i le Fofoga Fetalai, le afioga ia Papalii Lio Masipau, ona palota i suiga o le faavae.

I se tagi sa fa’aulu e le HRPP (Human Rights Protection Party), sa o latou taofia ai le le mafai ona palota Papalii, ma i’u ai ina pasia le tulafono mo le suia o le Faavae.  

O le aoauli ananafi sa tu’uina mai ai le fa’ai’uga a le afioga i le Faamasino Sili ia Satiu Simativa Perese, ma ia fa’alauiloa mai ai le fa’atagaina e le Fofoga Fetali ona palota i le faitauga o le pili (CAA), ma fa’atasi ai ma le palota a le Fofoga Fetalai, sa fa’amalieina ai le atoa o le 2/3.