Ads by Google Ads by Google

Tala o le Lalolagi


[ata: foa'i]

Pago Pago, AMERIKA SAMOA

FA’ATUMULIA KONESETI A LE ANIVA

O le aso Toona’i i lona afiafi, Setema 18, 2021 i le Federal Way Community Hall sa fa’ataunuu ai le fa’amoemoe o le Fa’aili a le Aniva e faia ai le tatou Koneseti o Pese Samoa uma sa latou tusia, fa’anota ma peseina, talu mai le vaitausaga o le 1970, se’ia oo mai lava i le taimi nei.

“O lenei taumafaiga ua toe fafagu mai ai fatuga, ae maise o matou pese na amata mai ai le taumafaiga lenei, aua o se Taleni e fiafia i musika ma toe lagiina mo le fa’afofoga a le atunuu.” O se saunoaga lea a le tamaitai o Miriama Samuelu,  ina ua amatalia le faamoemoe i lea afiafi.

Na tatala le fa’amoemoe i le latou peseina o le vii o le a’oga a Fa’asao High ina ia fa’afiafiaina le Laumua ma sui tamaitai tuai o lana vasega, sa latou a’o’oga faatasi mai lava i le St Francis i Lepua, se’ia oo mai i le aoga maualuga a Fa’asao High i Lepuapua. O i latou nei sa tuufa’atasia se latou siva e tatala aloa’ia ai le Koneseti. O le aotelega o le seleni sa lafoina, o se latou sao lea i le fa’amoemoe o Miriama Samuelu ma le Aniva.

O lona auaiga atoa lava o Sa Manase, sa i ai le latou ausiva fa’apitoa, o tama ma teine talavou ma le lalelei, sa fa’afiafia lava i le tele o latou siva Mauluulu ma fa’ataupati a tama, ina ia aiaiuli i le fa’amoemoe o Miriama ma le Aniva i le latou Koneseti.

I le latou taualuga sa sausaunoa ai le Tausala filifilia ma sa lafoina ai le fola le latou aotelega o foa’i mai le pa’ia o aiga, uo ma e masani sa auai, ma o le latou foi lea saoga e fesoasoani i le fa’amoemoe o le Aniva Band.

Na sosoo loa ma le tula’i mai o le tina o Tua mai le Aiga Tuilefano i Malaeloa ma fa’alauiloa le latou  siva sailia ai se meaalofa mai le aiga Tama o Miriama ma e le’i fa’atafa le pa’ia o aiga, aua o le foa’i e tatau lava ona lima malosi le itu lea. O le aotelega o lea siva e $1,000. ma sa fa’aalia lava le agaga fa’afetai tele o le tina matua, aua sa lagolagosua le pa’ia o aiga, ina ia tumati’e le fa’amoemoe o aiga, e fa’ailoa fo’i le titifaitama i le a’ao foa’i.

Na fa’asolo pea le fiafia ma le agaga me’eme’e o aiga, ina ia fofogaina e Miriama ma le Aniva le pese sa fatuina e lona tama a’o le’i maliu, “Samoa Lou Atunuu ou te mitamita ai.” O Upu o lea pese e lagona e ivi ma a’ano o so’o se Samoa, aua sa matua fafagu mai e le tama, sa tasi lava Samoa, ae ua o mai papalagi tu’ueseese i ta’ua.

O le pese sa fatuina e le Aniva mo le Laumua sa utuvai mai ai, sa sausaunoa i ai tama ma teine tuai o le Fa’asao ma Malisi, o a’oga a le Ekalesia Katoliko sa tu’ueseese ao lenei vaitau lea ua tuufa’atasia i lalo o le pulega e tasi.

Sa tuuina fo’i le avanoa i le Hunt Sisters o nisi o tausoga o Miriama Samuelu ma le Anivas, matagofie fo’i le latou sao na sausaunoa ai i lea afiafi a tamali’i. O se tasi talavou e pese i fatuga fa’a-Rap, sa ia peseina ai ana pese e lua, “Tama o le Lepo.”

E le’i misia le avanoa lelei mo se fautuaga mo le tupulaga, le pese sa amata mai ai le taumafaiga a le Aniva i le latou CD muamua lava, Fautuaga mo Tupulaga: “Aahhh tuu lou ai tapa’a, eehhh tuu le ai mealele, tuu uma mea na, manuia lou olaga…” E le’o mamao lava lea fautuaga ma lenei vaitau, ae na matua fiafia i ai matua i lea fo’i toe tima’i mo fanau.

Na soso’o ma le siva foi sa fofogaina e le Aiga o se tasi o alii Iloga o le Fa’aili a le Anivas, na malaga mamao mai Kalefonia mo le fa’amoemoe lenei, ma sa ia taina le Okeni mo le koneseti, o lona aiga e tupuga mai Vatia ma sa lele ai fo’i le Fuao i lea afiafi a tamalii ma tuufaatasia ai le lima foai o le pa’ia o aiga ma uo mamae fa’apea le lautele mo le latou sao e foa’ia mo le fa’amoemoe.

Na fofogaina nisi o pese mo le sausaunoaga a le mamalu lautele o maimoaina le fa’amoemoe lenei, ma sa le misi lava le Electric Slide…vevesi ai fo’i ma le mamalu e fa’atumu le foloa.

I le ta tonu o le afa o le 9:00 ae fa’alauiloa mai loa e Miriama lana pese sa fatu mo lona tuagane sa tautua i le Militeri, ae na le mafai ona tu’ua ai pe fa’aitiitia lona naunau e toe taliu mai e fa’aipoipo ma lana manamea o Tulili Theresa Ekeroma Aiono o Leone.

O loo mafana pea lava lea mafutaga i le fiafia ma le alofa i aso uma. O le vii o lena mafutaga, ua lauiloa ai lea tuagane ma lana manamea, ae na matua o ane fo’i le Ausiva a le Manase Youth latou te fa’atinoa taga o le pese…”Ua Lalelei Tasi Oe.” Matua patipatia le fa’atinoga a le fanau o lea pese ma o lo’o avea nei le susuga Pito Samuelu ma Faia’oga o le JROTC ae tumau pea Tulili i lana galuega i le Ofisa o le Tupe a le tatou Malo. O le pese lea sa fatuina ma tatala mai mo le fa’afofoga a le atunuu i le tausaga 1979, na fa’atasia ai lea mafutaga.

Na soso’o isi ana pese ina ia fa’afiafiaina le aumaimoa, o pese e fiafia le to’atele e sausaunoa ai ina ia le mae’a le afiafi a tamali’i a’o le lava le fa’amalositino a le mamalu sa faatau a latou pepa e ulufale ai e maimoa i lenei Koneseti.

O pese fou e lua mo le CD pese o lo’o ua fuafua e tatala mai sa soso’o ai, ma sa patipatia fo’i le matagofie o lea fatuga fou ua tapena e le Anivas.

AUSIA LE FA’AILOGA SGTMAJOR E LE ALO O SAMOA - AMASIA MCKAY POUSIMA O AFONO:

O lo ua fa’ailoa mai le agaga fiafia tele o le faletua o le tamaalemalo Pua Pulou - Pousima, ona ua mae’a fa’ae’e le tofiga fou o le tama o le aiga, le susuga le Sergeant Major Pousima, Amasia McKay ma ua talia fo’i le tele o talosaga siitia i le Atua ina ia au le taumafaiga a le tama, fa’atasi ai ma le tapua’iga mau a le pa’ia maualuga i matua ma Aiga i ona itunalua.

E le gata fo’i i le aiga o le tama ae o le mau paolo i le tapuaiga sa latou tu’i ai le mulipapaga ma fa’atalitalia ni ‘ai o le taumafaiga a le fitafita a le malo.

O se tasi fo’i lenei o alo o le atunuu sa amata fafau mai lana taumafaiga i le Laumua i Fagaitua, ma ua iloga fo’i lana taumafaiga ua atoa lelei le 26 tausaga o tautua i le USArmy, ma ua agava’a ai i le tofiga na nofo aoa’oina ai mo sina vaitaimi e taumafai pe tauia lelei ma a’e manumalo.

“Fa’afetai i le Atua ua talia talosaga, ua ausia e le tama lenei fo’i fa’aeaga e ala i lana tautua ma le taumafaiga i tofiga nei. Fa’afetai ma fa’amalo i aiga na lua ma le tapua’iga. Fa’afetai fo’i i si ou aiga le aiaiuli i le taumafaiga a le tama o le aiga. Ia fa’amanuia atili le Atua i laasaga o lumana’i o le tautua, Amasia, o ou mama na.” O se tala lea a le tamaitai o Pua Pulou Pousima e tusa ai o le taumafaiga ua pale ai nei le ali’i o le malo.

E le’i galo lava le tapua’iga a le A-Town poo le Afonotele i ana tama fanau o fa’alele i so’o se taumafaiga e saili malo.

TATALA ALOAIA LE FA’AALIGA O OLOA & MEASINA SAMOA - FEFA’ATAUA’I “ARTS OF LOVE”

O lo ua fa’alauiloa mai e le tamaitai Faipisinisi a le Arts of Love Store le latou tatalaga aloa’ia mo fefa’ataua’iga i le nofoaga fou i Puyallup pe a oo ia Oketopa 03, 2021.

Ua le gata i lea ae ua fa’ailoa mai fo’i lana pa’aga fa’apisinisi o lo’o la’ua va’ava’alua i lea fa’amoemoe le tamaitai o Dovi Gomez Napora mai Dovi Seattle.

Mai le itula e 1:00 i le aoauli se’ia oo i le 5:00 i le afiafi ua fa’atulaga ai le sauniga mamalu o le tatalaga o faitoto’a mo lea fa’amoemoe, ma ua vala’aulia fa’aaloalo ai i le mamalu o e uma o faipa’aga ma le tamaitai Amerika Samoa Fiapia Tasi Taito, ina ia susu atu e maimoa ma fa’amanuia fa’atasi i lea fo’i taumafaiga ua tatala mai mo le tautuaina o tagata Samoa uma ma isi fo’i uso mai isi atunuu ua alaala i lea setete.

O oloa ua tapena ua aofia ai teuga fa’asamoa moni, e tapena ai mo fa’afiafiaga, ae maise fo’i oloa tau teuteuga masani a so’o se atunuu i auro, siliva ma isi uma ma’a taua.

Ua tatala le avanoa mo so’o se Atisi a soo se malo fa’aatumotu i Uosigitone e fefa’ataua’i ai a latou oloa gaosi e ala i measina a tatou malo ma galuega alofilima o so’o se ituaiga. O se avanoa lelei lea e mafai ai ona maketi oloa gaosi fa’aatumotu ma latou ata tusia.

Ua fa’atuina lea taumafaiga ina ia fesoasoani atili i atisi o soo se ituaiga mai atumotu ia fa’afaigofie ona galue ma maua le taui o latou galuega o gapatia ai.

Ua mafai foi ona fa’atauina mai ai so’o se ituaiga suisuiga ua mafai ona faia e so’o se tasi o tina ma ali’i ua suisui i lenei setete. Afai o fia maua se avanoa e maketi ai au oloa, o lou avanoa lelei lea e te sau ai ma fa’atalanoa se avanoa mo lea fo’i taumafaiga a teine o le motu.

“O le taumafaiga lenei e pei lava ona fa’ailoa atu, e to’atele i latou ua talenia, ae fa’afaigata ona fa’atau atu a latou oloa. Afai e te talanoa mai, o le a mafai ona fesoasoani atu le Arts of Love mo lou mana’oga, ae fa’aauau ai ona taumafai ia tumati’e lau taumafaiga ma a’e manumalo i se taimi o i luma.” O se tala fiafia lea a Taito e tusa o le taumafaiga o lo ua a’e nei.

O Taito o lo’o la’ua faatautaia fo’i le Lend a Hand ma lona to’alua, Levi Taito ma le anoanoa’i o la’ua pa’aga i le setete lava o Uosigitone.