Pago Pago - AMERIKA SAMOA

I le iloiloga a le Komiti o le Soifua Maloloina a le Senate, i le vaiaso ua mavae, sa umi se taimi o talanoaina e Afioga i Senatoa, ia nisi o fa’aletonu, sa molimauina i totonu o le potu talavai mo le fa’amamaina o toto, i le falema’i a le LBJ.

Sa taitaiina e le Afioga i le Senatoa ia Tuana’itau Malaki Togiola, o se tasi o gasegase o le potu fa’amama toto, ia le iloiloga o lea mataupu, ua ia talitonu, o lo’o a’afia ai le tausiga o gasegase uma.

Na agai uma fesili a Tuana’itau, i le Pulesili a le LBJ, le susuga ia Papali’i Dr. Scott Anesi, le taitai o le Ofisa o Fomai ia Dr. Aitofele James ma le pule o le Ofisa o Tupe, ia tuiavatele Victor Tuiasosopo.  Sa ia ta’ua pea lava pea, ia le fai ma leaga o le masini o lo’o faamamaina ai le vai, ma tuai ai a latou talavai, pe a ma le lua i le tolu itula, a’o taumafai le aufaigaluega e lipea ia masini.

Sa saunoa Tuanaitau, ina ia fa’agasolo pea auaunaga a le potu talavai, o nisi taimi, e le uma atoa ai le taimi o talavai a nisi gasegase, ma o se tulaga, e ono a’afia ai soifua o gasegase o lo’o faamamaina o latou toto.

E le gata i lea, sa saunoa foi le afioga i le Senatoa, i le le lava o le aufaigaluega, o le le lava o nofo ma masini fa’amama toto, e o’o lava foi i pakaga e tulata i le potu talavai fa’amama toto.  

E tusa ai ma se ripoti a Tuana’itau, sa masani ona ta’i fa i le lima tausima’i, i le sifi, ae o le taimi nei, ua na’o le ta’i lua.

E le gata i lea, na gau se nofoa sa fa’aaogaina e se gasegase, a’o faamama lona toto ma o iina na fa’amautu ai, i lona talitonuga, e le o ave e le pulega a le falemai, ia le fa’amuamua i le potu talavai fa’amama toto, e pei ona manaomia.

I le saunoaga a le alii Faatonusili ia Papalii Dr. Anesi, sa ia faamaonia ai le iai o ni fa’afitauli o lo’o feagai ma le potu talavai o toto faamama ma o lo’o taumafai le LBJ e toe fa’aleleia ia nisi o masini (filtration).  Ae ua mae’a ona faapipi’i ia nisi masini fou (reverse-osmosis units), ae o lo’o faatalitali mo le pasiaina, ae e le’i fa’aaogaina.  Ae o nei suiga fou, o le a faamautu ai le sapalai vai ma fa’aitiitia ai le fa’atuai o talavai.

Sa fa’aalia foi e le Faatonu ia le to’a 274 gasegase, o lo’o tautuaina e le potu talavai faamama toto, ae i le amataga o le tausaga, sa na’o le 225.  E ta’ilua pe ta’i tolu, o lo’o fa’aopoopo i vaiaso uma, mai i le ER.

I le taimi nei, ua lima sifi i le aso Gafua, aso Lulu ma le aso Faraile, ae fa sifi i aso Lua, aso Tofi ma aso Toonai.  I ‘nofoa e 38 a le potu talavai, e na’o le 32 o lo’o fa’aaoga i le taimi nei.  Ae lima nisi nofoa fou o lo’o okaina.  Ma o lo’o fuafua le LBJ, e toe fa’aopoopo seisi sifi i le aso Lua, aso Tofi ma le aso Toonai.

E le o taliaina e le LBJ ia ni gasegase faamama toto mai atunu’u i fafo, e ui i le tele o talosaga ua o’o mai.  O se tulaga ua faapea ona lagolagoina e le afioga i le Peresetene o le Senate, le tofa Tuaolo Manaia Fruean.  Sa ia ta’ua e faapea, o le toatele o sui usufono a le EKFAS, mai atunu’u i fafo, sa faamoemoe e auai mai i le fonotele i Kanana Fou, i le vaiaso ua mavae.  Peitai, sa le mafai ona auai mai, ona o le leai o se avanoa e fai ai a latou talavai iinei.

Na fa’ailoa atu e Tuaolo i taitai o le LBJ, ua mana’omia ona fa’aleleia atili ia le auaunaga a le falemai ma ia fesiligia po o a risosi o lo’o mana’omia, e fa’aleleia atili ai la latou auaunaga.

Sa tali mai Papalii, e manaomia nisi masini faaopoopo ae o se vaega mana’omia vave lava, o le toe faalautele o le potu talavai, e tautuaina ia le toatele o gasegase.

Na fesiligia foi e Tuaolo ia ni polokalama e fesoasoani ia nofo malamalama ma fo’ia ai lenei gasegase faapea ai ma le aufaigaluega i totonu o le ER.  

Sa molimau Dr Sunia, o lo’o manaomia i totonu o le ER ia ni fomai se to’a 22, e mafai ai ona gasolo lelei ia le auaunaga, ae o le taimi nei, e na’o le to’a 10 o lo’o iai, ona ua to’atele fomai ua malaga ese atu.

Na ia ta’ua foi le taliaina o ni fomai fou se to’alima, ae ona o tulaga i a latou pepa faigaluega, ua fa’atuai ai ona faigaluega.  Ua mae’a ona talosagaina e le LBJ ia le Komiti Faafoe (Health Regulatory Board), mo le fa’avaveina o lenei tulaga.  

I le tulaga i le ER, sa saunoa le alii fomai, e ui ina agai atu le ER, o le tasi o auaunaga pito sili ona lelei, peitai, e fuafua lava lona lelei, i le lava o fomai.

Sa fesiligia e sui faitulafono ia le faaiuga a le LBJ, e ave’ese mai o latou ofisa mai i Faga’alu.  Sa saunoa Papalii, o lea ua se’e atu iina ia ofisa o tagata faigaluega, Billing and Coding, Grants ma ofisa a le pulega o le falemai, mo sina taimi puupuu, ae ua mae’a ia le ‘training center’ fou i Faga’alu.

O lo’o iai foi se faamoemeoga i le LBJ, e tatala se potu talavai mo ‘urgent care’ ma le ‘medical’, I le fogafale muamua, i le masina fou, a’o toe faaleleia ia potu talavai i Faga’alu.  E $60,000 i le masina, ia le tupe o lo’o totogia e le LBJ, e fa’aaoga ai le fogafale muamua ma le afa o le fogafale lona tolu.