Pago Pago - AMERIKA SAMOA

LOKA SE TAMAITAI NA FIU SE AIGA E TULI ‘ESE MAI I LE LATOU FALE

O le aso 3 o Aukuso 2026, na fa’afeso’ota’i ai e se leoleo, ia le Ofisa a Leoleo i Tafuna, mo se fesoasoani, i le pikiina o se tamaitai mai i se faleoloa i Iliili, ina ua fiu le aiga o lana uo tama, e tuli ‘ese mai i le latou fale.

Na molia Marcellus Mamea, i le moliaga o le Solivale o fanua ma fale, e aunoa ma se fa’atagana – O se vaega ‘E’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe, e le silia ma le $500; po o faasalaga uma e lua.

Sa lokaina le na molia, e aunoa ma se tinoitupe faatulagaina, e mafai ona toe tatala ai i tua.

E tusa ai ma fa’amaumauga a le faamasinoga, na afua mai lenei faalavelave, ina ua alu ia le na molia, i le fale a le aiga o lana uo tama, i Mapusaga, e ui ina ona silafia, ua faasa o ia mai i le fale.

Ina ua tupu se fe’ese’esea’iga i totonu o le aiga, sa fa’afeso’ota’i e le aiga, ia se tamaitai leoleo, e latou te masani, ma e le o faigaluega i lea, mo se fesoasoani, i le ave’esea o le na molia, mai i le fale a le aiga, a lana uo tama.

E tusa ai ma ripoti a leoleo, sa o atu ia Marcellus (le na molia) ma lana uo tama, i le fale a le aiga a lana uo tama.  Ae peitai, ua faasa e le aiga, ona toe o’o atu le na molia, i le latou fale.  Ina ua fa’aalia e le aiga, lo latou le fiafia, ma faatonu ia le na molia, e alu ‘ese mai i le fale, ae sa musu ia Marcellus (le na molia). 

O le 9:23 i le po, sa fa’afeso’otai ai e le tamaitai leoleo, le faigaluega, ia le ofisa a leoleo ma talosagaina ia le o’o atu o ni leoleo, i se faleoloa i Iliili, o lea ua ave iai e le tamaitai leoleo ia le na molia.

Ina ua mae’a ona talatalanoa leoleo ma le tamaitai leoleo, lea sa fa’afeso’ota’i e le aiga, sa fa’atino loa tiute a leoleo, ma tu’u ia le na molia, i totonu o le taavale a leoleo. 

Ma na ta’ua foi i ripoti a leoleo, ia le fa’aauau ona fa’amisa ma fa’alavelave, o le na a molia, i le faatinoga o a latou tiute, ina ua o latou taunu’u i le ofisa a leoleo, ma o’o ai lava ina una’i i lalo e le na molia, ia se laulau, i totonu o le ofisa a leoleo.

TALEPE E SE ALII IA LE TELEVISE A LE AIGA INA UA FAATONU E KI I LALO LE LEO O LE TELEVISE

Ia Aukuso 2026, sa o’o atu ai se vala’au i le ofisa a leoleo, mai i se aiga, i Kokoland, ona o se alii ua nofo ma faaleaga ia le televise a lona tuafafine, ona ua le fiafia.

Sa molia ia Tafaese Ilaloa, i le Faatupu Vevesi ma le Faaleagaina o meatotino.

E tusa ai ma fa’amaumauga a le faamasinoga, e taunu’u atu leoleo i le nofoaga na tupu ai le faalavelave, i le taeao o le aso 4 o Aukuso, 2026, o lo’o taumafai le tamaitai na a’afia, e tatala lana taavale.

Sa faasino e le tamaitai na a’afia, i leoleo, ia le eria sa faaleagaina ai lana meatotino.

Na faapea loa ona ave faapagota e leoleo ia Tafaese ma tu’u o ia, i totonu o le taavale a leoleo, mo le aveina atu i le ofisa a leoleo i Tafuna, e fa’aauau ai a latou su’esu’ega.

E tusa ai ma le faamatalaga a le tamaitai na a’afia, sa amata mai le latou i lena taeao, ina ua ia faatonuina ia le na molia, e ki i lalo le leo o le televise.  Ae peitai, na musu ia le na molia.  Na o’o lava ina tago Tafaese (le na molia), ma u’u mai se ipu mata’eta’e, ma togi ai le televise.  Ona toe ‘a’apa atu lea o le na molia, i seisi ipu mafolafola, ma togi i fafo o le fale.

Sa fa’ailoa atu foi e le tamaitai na a’afia, i leoleo, ia lona fiu e tau fa’afilemu ia le na molia, peitai, ina ua le mafai, na ia vala’au atu ai loa i le ofisa a leoleo, mo se fesoasoani.

Na faapea foi ona ta’ua i faamaumauga a le faamasinoga, ia le savali i fafo o Tafaese (le na molia) ma oso i totonu o le taavale a lona tuafafine (le na a’afia), i le itu a le aveta’avale ma loka mai le taavale, ma foliga mai, o lo’o tau su’e se mea i totonu o le taavale.

Sa fa’aalia foi e le tamaitai na a’afia, i leoleo, ia le tupu so’o o tulaga faapea i lo latou aiga, pe a oso le le fiafia o lona tuagane (le na molia), ma ia faaleagaina ai meatotino i totonu o le latou fale, e aofia ai ma meafale.

Na faailoa atu foi, e le tamaitai na a’afia, i leoleo, ia lona mana’o e faila sana tagi, e faasaga i lona tuagane (le na molia), ona o le tupu so’o o nei fa’alavelave.  Sa aveina atu foi ia le na molia, i le ofisa a leoleo, ia Fepuari 2026, i le tulaga lava lea e tasi.

Ina ua faatalanoaina e leoleo ia le na molia, sa ia te’ena ia tu’uaiga, e faapea na ia talepeina ia le televise ma e na te le manatua, ia lona togiina o se ipu mafolafola, i fafo o le fale.

Sa faamatalaina e le na molia, i leoleo, ia tulaga o iai lona mafaufau, ma e iai taimi, a tilotilo i lona uso ma lona tuafafine, ua ese foliga ma ua na le iloa i la’ua.  E le gata i lea, ua lua aso, e le moe.

O moliaga na faia faasaga ia Tafaese Ilalio, na aofia ai:

Faitauga 1:  Faatupu Vevesi i nofoaga tuma’oti (sauaga i totonu o le aiga) – O se vaega ‘I’, i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe, e le silia ma le $300; po o fa’asalaga uma e lua.

Faitauga 2:  Faaleagaina o meatotino, i lona tulaga e tolu (sauaga i totonu o le aiga) – O se vaega ‘E’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe, e le silia ma le $500; po o faasalaga uma e lua.

Sa lokaina ia le na molia, e aunoa ma se tinoitupe na fa’atulagaina, e mafai ona toe tatalaina ai o ia, a’o faagasolo lona faamasinoga.