VAEGA 95

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

Na gata mai le tatou Fagogo i le vaiaso ua mavae, ina ua alu atu le tamaitai o Salome e faiaiga ma le aiga o Iakopo ae na lilo ia te ia, o Iakopo o le tuagane lea a si teine o Naomi.  Le Naomi lava e tasi lea sa fiafia e taufa’alili iai a’o latou a’o’oga fa’atasi, ona o le vaitaimi lena, sa fai lava sina lapo’a o si teine o Naomi.

O le mae’a o le taumafataga o le afiafi, ae ua leva ona sola Naomi i totonu o lona potu, sa savavali mai ai Iakpo ma le teine o Salome i totonu o le potu malolo a le aiga.

Sa va’aia ai e Salome ia ata o le aiga a Iakopo o tautau solo i totonu o le potu malolo ma ua savali atu nei le teine o Salome ma fa’asolo lana matamata, ae tau ai loa lana va’ai i le ata o Naomi, i vaitaimi o latou a’o’oga fa’atasi.  Vaitaimi ia o lo’o lapo’a le teine.

Na pei e va’ai Salome i se aitu ina ua na va’aia le ata a Naomi ma lona ofu a’oga ma ia manatua le teineititi lea sa masani ona ia taufa’alili ma so’ona fai a’o latou talavou.  

Na iloa lelei mai lava e le uso matua a Naomi, le teine o Ruta, ia le liua o foliga a Salome ina ua va’ai i le ata a Naomi a’o a’oga.  Ma ia savali mai loa ma faapea mai, “O le a le a’oga na e a’oga ai?”

Ua liliu mai nei le teine o Salome ma fa’ataga ata mai ia Ruta, ae oso atu le tuagane a Ruta, le alii o Iakopo ma faapea atu, “Sa a’oga ia Salome i le a’oga lea na tatou a’o’oga ai.”  

Ua pupula to’a atu nei ia Ruta ia Salome ae o le taimi lena ia Salome ua leiloga sana taga e fai.

Ae toe faapea mai Iakopo, “Vaai o lea na tatou a’o’oga fa’atasi ae o lea fa’ato’a ma masani.  Ia leaga, e fai sina laititi ia ta’ua.”  Ona ia liliu atu lea ia Salome ma fesili atu iai, “E te le’i masani la ia Naomi i le a’oga?”

Ua na o le lilivale o Salome ua le iloa tali mai i le fesili a Iakopo.  

Ae o le teine o Ruta, ua liliu atu nei ma savali faatopetope atu i le potu a Naomi ae peitai, e tago atu Ruta e tatala, ae ua loka.  Na lagona mai e matua a Ruta ia le tu’itu’i leotele e Ruta o le faitoto’a o le potu a Naomi ma valaau atu, “Naomi tatala mai le faitoto’a.”

E le’i matala lelei mai le faitoto’a o le potu a Naomi, ae oso atu i totonu ia Naomi ma toe tapuni mai ma ia tago toso atu le lima o lona uso laititi ma fa’asaofa’i i luga o le moega ma amata loa ana su’esu’ega fa’aloia.

“O Salome le la?  O le teine le la lea sa fai ma sasa ia te oe i le taimi na e a’oga ai?” o le fesili atu lea a Ruta.  “Aua e te pepelo mai Naomi.  O le mea lea na e vave alu ese ai mai le laulau ‘ai?  Ma o le mea lea na pei ai e va’ai le tamaitai le la i se aitu ina ua vaai i lou ata a’o e lapo’a?”

“Shhhhh! Soia e te leotele!” o le oteote atu lea a Naomi.

“Faatali mai nei le tamaitai le la i la’u mea o le a fai iai,” o le tala lea a Ruta ma toe oso mai o le a savali i fafo o le faitoto’a.  Ae mau ai Naomi ma toso atu i luga o le moega ma taofiofi ai loa iina.

[E FAIA PEA]