VAEGA 66

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 66.

***********************************************************

Ua taunu’u le ta’avale a le alii fomai o Taki i lona fale, a’o tu tu mai lona tina i le faitoto’a ma tilotilo mai, ma le popole o lona loto i le toe fo’i vave atu a si ana tama, aemaise ai lona leo i luga o le telefoni i le la talanoaga i le po anapo.

Na va’aia e le tina ia le savali atu o Taki i le fale ma ona le faanono’u o ona tau’au e pei o lo’o tauave se avega mamafa.  Ma le punou o lona ulu, e le taitai ea i luga.

Na fa’ato’a iloa lava e Taki, o lo o tu lona tina i le faitoto’a, ina ua toeititi lava o la feto’ai.

“Oi, ou te le i iloa mai lau tu atu i’i,” o le tala lea a Taki, ma ia tago atu i le fusi mai lona tina.

Ina ua uma lena, ona tago atu lea o Taki ua u’u mai le lima o lona tina, ma ta’ita’i atu o ia i totonu o le latou potu malolo ma fa’anofo ifo i luga o le nofoa.

Ona saofa’i atu lea o Taki i ona tafatafa, ae le mamulu lava le u’uina o lona lima.

Na fai sina umi o punou le alii fomai ma faataupupula atu i lona u’uina o le lima a lona tina.

“O le a le mea ua tupu?” o le fesili atu lea a le fafine o Elena i si ana tama.  “Ua e ma’i?”

“E leai, Mom.  E le o tupu se mea ia te a’u,” o le tali mai lea a Taki.  “Ae ou te mana’o e aua le avea le mea lea o le a ou faamatalaina atu ma tulaga e fa’ate’ia tele ai oe.”

“Ta’u mai Taki.  O le umi lava ona e le ta’uina mai, o le fa’ateteleina foi lea o lo’u popole,” o le tala lea a le fafine o Elena.

Ua tu i luga Taki ma savali atu i le faamalama ma tilotilo i fafo a’o ia taumafai e fa’avasega ona mafaufauga, po o fea o le a amata mai ai lana faamatalaga i le mea ua tupu.

“Mom, i le taimi na lua feoa’i ai ma Dad, sa e masani i sana uo na la feola faatasi mai?” o le fesili atu lea a Taki i lona tina.

“Ou te le i feiloai ma lana uo, ae sa masani lava ona talanoa mai lou tama e uiga i lea alii.  Fai mai o lana uo lea na fa’asaoina lona ola mai i le falepuipui,” o le tali mai lea a Elena.

“O le a le uiga o lau faamatalaga, Mom?  Sa faasaoina mai e lana uo mai i le falepuipui?” o le toe fesili atu lea a Taki.

“Sa faamatala mai e lou tama le taimi na tupu ai se faalavelave ma maliu ai se tamaititi o le aoga lea na la a’o’oga ai ma lana uo mamae lea, ia te ia.  Ae e le’i o’o atu leoleo, sa faatonu e lana uo mamae o ia, e alu ‘ese mai i le mea na tupu ai le fa’alavelave.  Sa faamatala e lou tama, lona fiu e finau atu i si ana uo, e na te le alu ae tu’ua na’o ia e fesaga’i ma leoleo, ae sa tago lava si ana uo i le tuli ese o ia,” o le tala lea a Elena.

“O le tala a si ou tama, ina ua o’o atu leoleo, sa tauave uma e si ana uo ia tu’ua’iga o le faalavelave, ma i’u ai lava ina lokaina si ana uo, ona o ia.”

“Ae aisea e te le’i feiloai atu ai i lana uo ina ua tatala mai i tua?” o le toe fesili atu lea a Taki i lona tama.

Ua faamimigi tau’au a le fafine o Elena ma faapea atu i si ana tama.  “Ou te le manatua, ae sa faapea mai lou tama, e fo’i mai loa i lana malaga, o mai loa ma lana uo – lea ua ia ta’ua o lona uso – e matou te o, e faamalamalama i o’u matua ina ia mafai ona o ma faaipoipo.”

“E alu le malaga a lou tama ma si ana uo, e na te le’i iloa, ua ou ma’itaga ia te oe,” o le tala lea a le tina o Taki.

“Ae aisea ua e toe fesilisili ai e uiga i lou ma lana uo?” o le fesili atu lea a Elena i si ana tama.

Na umi se taimi o tu ia Taki ma tilotilo mai i lona tina, ona faapea mai lea, “Mom, o Tanielu lea na tafafao mai ma lona aiga i le vaiaso ua mavae, o le uo mamae lena a Dad.”

[E FAIA PEA]