Pago Pago - AMERIKA SAMOA

E tusa ai ma fa’amaumauga a le faamasinoga, o lo’o taua ai le moliaina o se Faifeau, ona o le fai’aiga ma se teineititi e 18 tausaga, mai lona lava aiga.

(Ua le lomia ia suafa o i latou na a’afia, po o le na molia, i lenei mataupu, aua le puipuiga o le tamaitai na a’afia.)

O le amataga o le vaiaso, sa faapea ona tula’i ai le na molia, i luma o le fa’amasinoga, ma o lo’o taofia nei o ia i le to’ese i Tafuna, e aunoa ma se vaegatupe fa’atulagaina, e mafai ona tatalaina ai o ia i tua, e faatalitali ai lona faamasinoga.

Ae o ona moliaga, e aofia ai le faia o amioga faaSotoma faapea ma le taofiofi fa’asolitulafono, o ni solitulafono mamafa, e mafai ona nofosala ai i le falepuipui, e o’o atu i le 22 tausaga mo moliaga uma e lua.

E tusa ai ma fa’amaumauga a le faamasinoga, o le pulea’oga o le a’oga e a’oga ai le tamaitai na a’afia, sa na ia logoina le Ofisa a Leoleo, e tusa ai ma lenei fa’alavelave, i le vaiaso ua mavae.  Sa fa’ailoa atu i leoleo, le iai o matua o le tamaitai na a’afia, i Samoa mo fa’alavelave fa’alea’iga.

Ma o lo’o ta’’ua foi i fa’amaumauga a le faamasinoga, le tupu o lenei fa’alavelave i le vaiaso ua mavae, ina ua fa’ate’ia le tamaitai o lo’o a’afia, ina ua tago tago atu se tagata ia te ia, a’o moe.  Ma ina ua ia te’i mai i luga, sa ia va’aia lona ‘uncle’, o lo’o tago tago atu i lona fatafata ma ona itutino sa.  

E tusa ai ma le fa’amatalaga a le tamaitai na a’afia, sa ia taumafai e u’una’i ‘ese ia le ua molia, ae sa le manuia ana taumafaiga.

O lo’o ta’ua i totonu o fa’amaumauga a le faamasinoga, ia se faamatalaga a le tamaitai o lo’o a’afia e faapea, sa te’i lona tino ma gatete i le fefe, i le taimi na tupu ai le fa’alavelave.

Ma o lo’o iai se talitonuga, ina ua mae’a ona tupu le fa’alavelave, sa fa’atonuina e le ua molia, ia le tamaitai ua a’afia, ina ia ‘aua ne’i ta’uina i seisi, ia le mea sa tupu.

Sa fa’amatalaina foi e le tamaitai ua a’afia e faapea, e masani lava ona o latou o ma lona ‘uncle’ e momoli i latou i le a’oga, e muamua lava ona tu’u o ia, ona fa’ato’a alu lea e momoli lona afafine i lana galuega.  Ae peitai, o le aso na soso’o ai, na muamua ona momolia le afafine a le na molia, i lana galuega, ona fa’ato’a o ai lea e momoli o ia i le a’oga.

Sa ta’ua e le tamaitai ua a’afia, ina ua toe o la’ua ma le ua molia, i totonu o le ta’avale, sa faapea atu le na molia ia te ia, e tusa lava pe ua fa’au’uina i latou e avea ma Faifeau, e le faapea e le toe maua e latou ia ituaiga lagona ia.

Ina ua fa’atalanoaina e leoleo ia le alii Faifeau, sa ia te’ena lona solia o se tulafono, ae peitai, a’o fa’aauau pea lona fa’atalanoaga, sa faapea ona fa’amatalaina e leoleo ia gaioiga uma sa faatinoina e le na molia, ma i’u ai lava ina tagi le na molia ma fa’amaonia lona faia o ia tulaga.