Pago Pago - AMERIKA SAMOA

Ia Fepuari 23, 2026, na valaau atu ai se tamaitai i le ofisa a leoleo ma ripotia ia le susuga ia Tau Fonoti, i le alu atu i totonu o lona (tamaitai) fale ma fa’atupu ai se vevesi.

E tusa ai ma fa’amaumauga a le faamasinoga, o lenei faalavelave na tupu i le 9:39 i le po ma e alu atu Tau (le na molia) i le fale o le tuaoi, o lo’o iai uma le aiga, faapea ma ni fanau iti.  Ma o lo’o ta’ua i faamaumauga a le faamasinoga, ia le ulufale o le na molia, e aunoa ma se fa’atagana ma amata ona fa’atupu vevesi, ma fa’ai’u i le o’o o lona lima i le tamaitai sa iai i totonu o le fale.

Na amata ia gaioiga a le na molia, ina ua ulufale i totonu o le fale a lona tuaoi, i lona palauvale i le tamaitai na a’afia, ma ia lafoina ni faamatalaga tau fa’amata’u.  Ae na matua’i fa’ate’ia ia le aiga sa i totonu o le fale, ina ua po e le na molia, ia le tamaitai na a’afia.

E tusa ai ma fa’amatalaga a molimau, i leoleo, sa avea le tulaga na faatino e le na molia, ma auala na ave’esea o le filemu mai totonu o le latou aiga.  

Ina ua mae’a ona fa’ao’olima ia le na molia, i le tamaitai na a’afia, sa ia toe ulufafo mai i le fale a lona tuaoi.

E taunu’u atu leoleo, o lo’o saofa’i mai le na molia, i luma o lona fale.  Ina ua fa’ailoa iai e molimau, i leoleo, o ia (le na molia) lea na faatupuina le faalavealve, sa agai atu loa iai leoleo ma ave faapagota o ia, ma momoli atu loa i le ofisa a leoleo. 

E tusa ai foi ma faamatalaga a molimau, sa o latou fiu e tuli’esea ia le na molia, mai i totonu o le fale a lona tuaoi, ae na musu.

Ma na ta’ua i su’esu’ega a leoleo, atonu na mafua lenei faalavelaev, ona o seisi fa’afitauli na tula’i mai muamua, ina ua pa se paipa i le fanua.  Ma o lo’o iai se masalosaloga, atonu o le mafua’aga lea na le fiafia ai le na molia, ma ia alu atu ai i totonu o le fale a lona tua’oi, lea na ia faatupu vevesi ai.

Sa fa’amaonia foi e leoleo, i a latou su’esu’ega, e le o se taimi muamua lenei ua fa’atupu ai e le na molia, ia se fa’alavelave, i le fale o lona tuaoi.  E ui ina e le’i auiliili ina ia le mafua’aga o faalavelave ua tuanai, ae peitai, sa ta’ua e leoleo, i la latou ripoti, o se vaega o atugaluga i uiga fa’aalia a le na molia.

Sa ta’ua foi i le ripoti a leoleo, ia le foliga mai na fa’asuaava ia le na molia, i le taimi na ave faapagota ai, ona o le malosi o lona manogi pia.

Ina ua taunu’u leoleo ma Tau (le na molia), i le ofisa a leoleo, sa tete’e le na molia, e faia sana faamatalaga pe tali i ni fesili.

O moliaga na faia faasaga ia Tau Fonoti, na aofia ai:

Faitauga 1:  Fa’ao’olima i lona tulaga e tolu (sauaga i totonu o le aiga) – O se vaega ‘I’, i solitulafono mama, e mafai ona nofosala ai i le o’o atu i aso e 15, po o sala tupe e $300; po o fa’asalaga uma e lua.

Faitauga 2:  Faatupu Vevesi i nofoaga tuma’oti (sauaga i totonu o le aiga)  -O se vaega ‘I’, e mafai ona nofosala ai i le o’o atu i aso e 15, po o sala tupe e $300; po o fa’asalaga uma e lua.

Faitauga 3:  Solivale o fale ma fanua, e aunoa ma se fa’atagana, o se vaega ‘B’ i solitulafono mama, e mafai ona nofosala i le falepuipui, e o’o atu i le ono masina, po o se sala tupe, e le silia ma le $500; po o faasalaga uma e lua.

Na lokaina le na molia, e aunoa ma se tinoitupe faatulagaina, e mafai ona toe tatalaina ai o ia i tua, a’o fa’agasolo lona faamasinoga.