Pago Pago - AMERIKA SAMOA

O le aoauli o le aso 21 o Aperila, 2025, na fa’afeso’ota’i ai e se tina ia le Ofisa a Leoleo i Leone, mo se fesoasoani, ona o sona alo tamaitai, ua faigata ona tau fa’afilemu.

E tusa ai ma fa’amaumauga a le faamasinoga, sa ta’ua e le tina le ‘e’e ma le palauvale solo o lona alo tamaitai, ona ua fa’asua’ava.

Sa faapea ona aga’i atu leoleo i le nofoaga sa tupu ai le fa’alavelave ma latou molimauina gaioiga a le tamaitai na molia, i lona taumafai e kiki tagata o lona aiga, sa taumafai e taofiofi ma fa’afilemu o ia.

Na faapea loa ona taumafai leoleo e fa’ato’ato’a le tamaitai na molia, ae peitai, sa fa’aauau pea ona le to’a le tamaitai na molia.  O lea, na fa’afeso’ota’i ai e leoleo ni isi leoleo faaopoopo, ma o latou ave faapagotaina ai le tamaitai na molia.

Ina ua fa’atalanoaina e leoleo ia le tina sa vala’au atu i le ofisa a leoleo, na ta’ua e le tina, o lona alo e suafa ia Christina Mata’u, ma na fa’ato’a fo’i mai i sana pati na alu ai ma na mafua ona vala’au le fessoasoani a leoleo, ona ua fiu e fa’afilemu ae na o le laulauvavale solo ma ta kiki tagata o lona aiga.

Ina ua taunu’u leoleo ma le tamaitai sa molia, i le ofisa a leoleo i Leone, sa fa’afaigata ona fa’atino tiute a leoleo i le na molia, ona o le fa’asua’ava.  Ae sa mafai ona fa’afeso’ota’I ia le vaega a le EMS mo se fesoasoani aua manu’a na va’aia e leoleo i le tino o le tamaitai na molia, ona o le misa i lo latou aiga.

Ae peitai, ina ua taunu’u le vaega a le EMS sa musu le tamaitai e togafitia o ia pe ave foi o ia i le falemai.

Na fa’apea loa ona ave le tamaitai na molia, i le to’ese i Tafuna.

O ona moliaga na aofia ai le Faatupu Vevesi i totonu o lona aiga, o se vaega ‘C’ i solitulafono mama, e mafai ona nofosala ai i le falepuipui e o’o atu i aso e 15, po o se sala tupe e $300; po o faasalaga uma e lua.

E $300 se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.