Pago Pago - AMERIKA SAMOA

I le iloiloga a le Maota Fono ma le pulega a le ASPA (American Samoa Power Authority) i le aso Lua o le vaiaso ua tuanai, sa faapito ‘augafa ai fesili a sui faitulafono i le fuafuaga a le ASPA mo sa latou wind farm po o se fanua e faatu ai a latou pe’ape’a tetele.

O lena foi iloiloga sa nofo malamalama ai sui faitulafono i le totogia o afioaga o Aoloau ma Auma i le ta’i $1 miliona mo le fa’aaogaina o le fanua (Manunu) mo le faamoemoe a le ASPA.

Sa faamanino mai e le Faatonusili a le ASPA, le susuga ia Wallon Young, ina ua fesiligia e le afioga i le Faipule ia Luaitaua Gene Pan, o le vaegatupe ua totogia ai nei Aoloau ma auma, o se tupe aitalafu na pasia mai e le Komiti Faafoe a le ASPA, mo le lisiina o le fanua, i se maliliega ua mae’a ona sainia i le va o le ASPA ma afioaga ia e lua.

Na faamanino e Young, na totogia lenei vaegatupe e faavae i le maliliega na faia i le va o le ASPA ma afioaga e lua, ae le o tagata e ana fanua.

Sa ia ta’ua foi, ua tele se taimi ma galuega ua mae’a ona fa’aalu e i latou o lo’o faatupeina lenei poloketi ae e leai se lisi na sainia ma ua mae’a ona o latou fa’ailoa mai i le ASPA, se’ia vagana ua sainia se maliliega, o le a le mafai ona toe fa’aauau le poloketi.

Na faaleoina foi e Young, ua mae’a ona o’o atu matai o Aoloau ma Auma i le pulega a le ASPA ina ia totogi muamua le tupe ona fa’ato’a faataunu’u lea o le galuega.  Sa taliaina e le ASPA lea talosaga, aua o se tulaga masani i poloketi faapenei.  Na ta’ua foi e young, e 200 isi fanua lisi a le ASPA sa faia foi lea tulaga, o le totogi muamua ona fa’aato’a faatino lea o le galuega.

Sa saunoa le Faatonusili a le ASPA o le faamoemoega autu o lenei poloketi, ina ia fa’aitiitia le tau o le eletise ma fa’aitiitia le fa’alagolago i suau’u gaosia.

Na ta’ua e Young, o le poloketi lenei o ‘wind farm’ e mafai ona fa’aafa ai le tau o le eletise, lea ua 41 sene i le kilouati i le itula, 

O lenei maliliega ua mae’a ona sainia mo le lisiina o le fanua i Aoloau ma Auma, e mo tausaga e 25, ae e $1 miliona i le tausaga.

Na fesiligia e le afioga i le Senatoa ia Togiola T.A. Tulafono ia tulaga o fanua ia ua fa’aaoga e le ASPA mai i Aoloau ma Auma, pe na sainia o ni fanua a le nu’u, po o fanua a aiga potopoto po o le vaomatua.

Sa fa’ailoa mai e Young, o fanua a le nu’u, lea o lo’o ma’oti mai i se fa’aiuga a le Faamasinoga Apili i le 1982 lea e faasino i nu’u e lua.

Na toe fesili Togiola po o ta’ua fanua a le nu’u, o fanua a le aiga potopoto, se tali le alii faatonusili, e fuafua lava i lona fa’aaogaina.

O lea na toe fesili ai le afioga i le Senatoa, po o iai se manatu a le ASPA, e le o ni fanua a aiga potopoto ia fanua a le nu’u, ina ia alo’ese mai i iloiloga a le Komisi o Fanua ma pasiaina mai e le kovana.

Sa tali Young, e moni o fanua a le nu’u, o fanua ia a aiga potopoto ae o lo’o i lalo o le vaavaaiga po o le puleaga a le nu’u.

O lea na saunoa ai Togiola, o se atugaluga lea i lona tagata ona o lisi ia ua ia vaai iai, e le o pasia pe iai se fa’atagana mai i le kovana ma iloiloina e le Komisi o Fanua.

Sa ta’ua muamua e Young ua mae’a ona fa’ao’oina atu i le kovana ia lisi mo nei fanua, ae peitai, i se taimi mulimuli ane, sa ia fa’amaonia mai ai, e le’i pasiaina mai e le kovana.

Na toe fesili Togiola, po o le a se fuafuaga a le ASPA pe afai ae le pasiaina mai nei lisi, pe faapefea ona toe totogi le $2 miliona lea ua fa’aalu.

Sa ia fa’atula’i mai foi le tala o le tupe a le ASPA, aemaise ia le vaega o tupe e le o mafai ona aoina, mai i le tausaga tupe 2019 se’ia o’o mai ia Iuni 30, 2024.

Mo le tausaga tupe 2022, e $364,761; mo le tausaga tupe 2023, e $551,056; se’ia o’o mai ia Iuni 30, 2024 e $208,921 e le o mafai ona aoina.

Na fia malamalama le afioga i le Senatoa  po o le a se fuafuaga a le ASPA o faia i ia vaegatupe ma ia fa’aleoina ai foi sona popolega ina ne’i uma a’e foi, ae tigaina ai le mamalu lautele o lo’o totogi pili i le ASPA.

O le tali mai a Young, o le vaega tele o tupe ia, o pili le totogia a tagata ua malaga i atunu’u i fafo.  Ma o lo’o mulimulita’i le ASPA i fautuaga a vaega su’etusi (auditors) ina ia tu’u ai pea lea fuainumera i totonu o a latou faamaumauga, ae e le’i fa’ailoa mai e le alii faatonusili po o le a le taimi e ave’esea ai mai totonu o fa’amaumauga a le ASPA.