Pago Pago - AMERIKA SAMOA

O lo’o fa’atalitalia nei e le pulega a le kamupani i’a a le StarKist Samoa, ia se tali mai i le Ekalesia Katoliko Samoa-Pago Pago, e tusa ai ma sa latou talosaga, mo le fausia o se fale mo ana tagata faigaluega lea o lo’o aumai mai atunu’u i fafo, i luga o le fanua a le lotu  lea o lo’o lisi nei e le StarKist, i Atu’u.

O le fanua lea o lo’o i leisi itu auala o le fale gaosi apa tu’u i’a a le Samoa Tuna, lea sa masani ona iai le aoga tuai a tama o le Malisi.

I se faatalanoaga ma le susuga ia Tufuga Faafo’i Palepua, se tasi o taitai sinia a le kamupani i’a, sa ia fa’ailoa mai ai le faia o ni feutagaiga ma le Ekalesia Katoliko Samoa-Pago Pago, e tusa ai ma la latou talosaga sa faao’oina atu iai, i le amataga o le tausaga ma o lo’o iai so latou faamoemoega maualuga, o le a mafai ona tali ioe mai le ekalesia i lea tulaga.

Sa ta’ua e Tufuga, i le mae’a ai ona soalaupule e le pulega a le StarKist le mataupu i se fanua mo se fale e fa’amautu iai ana tagata faigaluega, sa tonu ai loa, o le a le taumafai e lisi mai se fanua mai i le malo, ae o le a taumafai e lisi le fanua a le ekalesia lea o lo’o i Atu’u.

Na saunoa Tufuga, na mafua ona o latou manatu i le fanua i Atuu ona o le latalata i le kamupani o le a galulue ai le aufaigaluega ma o le a fa’afaigofie i tulaga o femalagaiga ma o le a fa’asaoina ai tupe fa’aalu a le kamupani, i le totogia o pasi po o taavale mo femalagaiga a le aufaigaluega.

O lenei mataupu, na mua’i fa’atula’i mai e le malo a Samoa, i le fonotaga a le Atoa-o-Samoa i le 2022, lea na ta’ua ai le faamautuina e kamupani o lo’o galulue ai tagata mai Samoa ma isi motu o le Pasefika, i galuega faavaitaimi i totonu o Niu Sila ma Ausetalia.

O se tasi lea o vaega ma’oti i totonu o konakalate a kamupani i Niu Sila ma Ausetalia, ina ia mafai ona nonofo fa’atasi a latou tagata faigluega, i se fa’atulagaga e pei lava o nu’u ma afioaga, ua masani ai ana tagata faigaluega.

O lea na finau ai Samoa, e tatau foi ona faia lea tulaga e kamupani a Amerika Samoa o lo’o aumaia ana tagata faigaluega mai Samoa.  

O le StarKist o le kamupani pito tele lea i totonu o le teritori ma o lona tuasivi lea i tulaga o le tamaoaiga.

Ma e na o Samoa o lo’o aumaia ai tagata faigaluega a Amerika Samoa, ma o lo’o gafa le StarKist ma le mataituina o kilia po o le faagaioia o pepa o femalagaiga mo ana tagata faigaluega.

Ua saunoa Tufuga, e talia mai loa le latou talosaga, e le Ekalesia Katoliko, ona faamoemoe loa e amata galuega ae e le’i mae’a lenei tausaga.