Vaega e 06

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 06.

************************************************

O le tulaga ua iai ia le alii ave pasi o Paulo, i lea taeao na alu atu ai e ao mai fanau a’oga, o se tulaga ua le lelei.  Ona o le tagofia e le alii ave pasi a’oga ia vaega o fualaau faasaina, ua le lelei ai le faia o ana faaiuga.

O se tasi o aoauli, na faapea ai le maualuga o le lele a le alii o Paulo, na manatu ai, o lo’o iai ni ona apa’au, sa pe’a ai i luga o lona fale ma taumafai e lele.  Ae na mafai ona fa’asaoina o ia i lea aso, ona sa pa’u mai ma tali atu e pupu vao sa i luma o lona fale.  

Ma e maua atu o ia e lona to’alua, o la ua leaga uma foliga i le toto ina ua pa le isu.  Ae o lo’o ia taumemumemu i fuaiupu o le Tusi Paia.  Ma ona o le malosi o le fualaau faasaina sa ia tagofia, sa le’i lagona e Paulo, ua manu’a i lana pa’u.

O iina lea na teu ai loa le ato lavalava a le fafine ma alu loa ae tu’u Paulo.

 Na fa’ate’ia Paulo i le faapea atu o le alii o Simeona, “E iai se mea o tupu ia oe, Paulo?  E pe lava e te ma’i.”

“Ioe, pei sa e va’ai i se aitu,” o le oso mai lea o le teineititi a’oga o Susana.

Ua ‘ata’ata ia Paulo ma faapea atu, “E ta’u foliga ia e tout e tilotilo mai ai, o foliga o se tagata ua matua.”

“O e ‘ona? Ua matua’i tetele lava le pupula o ou mata,” o le toe faapea mai lea o Simeona.

“Sole, e leai,”  o le tali atu lea a Paulo.  “E le’i lelei la’u moe anapo.”

“E ala ona ou fesili, leaga e faapena ia foliga o lo’u uso pe a uma ona ia fa’aaogaina ia ni fualaau faasaina,” o le tala lea a Simeona.

“Sole Simeona.  O oe o se fomai?” o le ‘ote mai lea a Paulo.

“E leai, e le o a’u se fomai.  Ae ou ke iloa foliga o se kagaka pe a fa’aaoga fualaau faasaina,” o le faapea mai lea a Simeona.

“Ia alu loa e gofo i lalo, ae ou ke le’i alaku po oe,” o le oso mai lea a Paulo.

[E FAIA PEA]