VAEGA 05

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo – O LE AVE PASI A’OGA.

**************************************************

Sa gata mai le tatou Fagogo i le vaiaso ua tuanai ina ua fa’atonuina e le alii ave pasi a’oga, o Paulo, ia le alii a’oga, o Simeona ina ia ‘aua ne’i ona toe fa’alavelave i tamaiti a’oga o lo’o i luga o le pasi, a leai, o le a vala’au ia le pulea’oga.

O Simeona e sau mai i se aiga e sili atu ona tulaga faaletonu, i lo le aiga a Paulo.  Ma e fiafia tele e fa’amisa i tamaiti a’oga i luga o le pasi a’oga.

Sa le’i amana’ia tele o ia e Paulo, ona e le’i mana’o Paulo e pisa mai nim atua ia te ia.

Ae peitai, o le aoauli lena, a’o aga’i atu Paulo e momoli tamaiti a’oga i le tu’ua ai o a’oga, sa fai lava sina fa’afaigata tele o Simeona ma i’u ai lava ina fa’aafe e Paulo le pasi i tua ma le alatele ma savali atu i tua i le nofoa o saofa’i mai ai Simeona ma fai atu iai, a toe pisa atu loa tamaiti a’oga, o le a ia vala’auina loa le pulea’oga.

Ae o Simeona, e fai lava sina ona fefe i le pulea’oga ma ua saofa’i sa’o loa i luga o lona nofoa ua le toe minoi.

A’o toe savali atu i luma ia Paulo, sa oso ifo se manatu i lona mafaufau e faapea, e lelei lava tamaiti, ae ua pau lava o le ulavavale.  Ma toe soso’o ai ma leisi mafaufauga a Paulo e faapea, ae paga lea, o le a maliliu le toatele o latou i se fa’alavelave tele.

O le taeao  na soso’o ai, sa toe usu atu ai Paulo e piki ia ana tamaiti a’oga, ae o le taimi lea, ua matua’i maualuga lava le lagi o lo’o opeopea mai ai le fai’ai o le alii ave pasi a’oga.  

Ioe, o le taeao lena ae e le’i tu’ua e Paulo ia lona fale, sa muamua lava ona sosogi nai ana laina e lua pe tolu, i luga o lana laulau ‘ai.  Ma e agai atu Paulo e piki mai ana tamaiti a’oga, ua pei ua iai ni ona apa’au ma ua manatu ane lava ia, ua mafai ona ia felele a’i solo.

[E FAIA PEA]