Vaega: 91

Fa’atalofa atu i lou alafa’i mai i fanuga lelei i lenei taeao fou, taeao manuia, taeao toto’a, i le tausiga alofa a lo tatou Tama o i le lagi. E ao ai ona o tatou fa’apea ifo, “Le Ali’i e, ia paia lava Lou Suafa, ia o’o mai Lou malo, ia faia lou finagalo i le lalolagi e pei ona faia i le lagi, Amene.” Ae alo maia, o le a toe fa’aauau atu la tatou tala, ae ia manuia le alo faiva o le atunu’u i feau ma galuega o le a feagai ai.

Na alu alu lava le ta’avale o lo’o i ai C.J. Peters, o Nancy Jaxx ma le ali’i foma’i o Eugene Johnson, fa’atafa loa i talane o le pamukesi, ma fa’atalitali ai le taunu’u ane o le ta’avale mai le nofoaga o lo’o i ai manuki.

E le i umi lava, ae sosolo ane loa le Van tele lava i talane o le ta’avale a le au malaga lea na o ane i Virginia. Na matala nei le faitoto’a, ma oso mai ai i fafo le alii’i pule o le kamupani lea e faigaluega ai Dan Dalgard, o Bill Volt ma savali loa i le ta’avale o lo’o i ai i latou nei.

Na ona taunu’u lava o Bill Volt i le itu o lo’o i ai le ta’avale, fa’apea ane loa, “O lea ua o matou au maia manuki.” Na tilotilo ane nei Eugene Johnson i a C.J Peters, ua le tautala. Na savavali atu nei ma tilotilo i taga o lo’o tu’u ai i totonu manuki, a’o Nancy Jaxx, ua va’ai atu nei e toetoe lava a pa pa mai i fafo taga nei. Pau le mea o lo’o i le mafaufau o Jaxx, “Oka, o lona uiga o le virusi uma lea o lo’o i totonu o taga nei.”

Na toe fa’apea ane le ali’i o Bill Volt, “O manuki nei na mamate i le po ana po.” Na fesili ane nei i ai Nancy Jaxx, “Na i ai se isi na lavea lona lima.” Na tali Bill Volt, “E leai se tasi.”

Na tilotilo ane nei C.J. Peters i a Nancy, a’o lona mafaufau o lo’o fa’apea, a’o ai la o le a uliina le ta’avale e ave ai manuki nei i Fort Detrick. Ua tau fai tilotilo nei le tasi i le isi, po’o le a le mea o le a fai i manuki nei, aua o lea ua avane e Bill Volt ua tu’u i totonu o taga lapisi, ae e le o malu lelei.

A’o faia le fetufa’aiga a C.J. Peters ma Bill Volt, o le taimi lea, ua fa’asolo le su’esu’ega a Nancy Jaxx i le tino atoa o le ta’avale (van), e le gata i lea, ae ua siaki lelei taga lapisi lea ua tu’u ai i totonu tino o manuki. Ina ua uma ona talanoa Peters ma Volt, na fesili i ai Nancy Jaxx, pe na fana atoa taga lapisi nei i le vaila’au ina ia puipuia ai le tagata e tago i ai. Na tali Bill Volt, “Ioe, ua uma ona fana atoa i le Colorox le pito i fafo o tagata lapisi.”

Na a’apa atu nei Nancy ma piki mai i luga le isi taga, ma na ia iloa ai, e mamafa lava taga lapisi nei o lo’o i ai i totonu tino o manuki, lea o le a ave i le nofoaga o le Ami e fai ai a latou su’esu’ega. Na fesoasoani Bill Volt e la’u taga i luga o le pikiapu lea o le a ave ai i Fort Detrick, le nofoaga a le Ami a le Malo Tele.

Fai mai le fa’amatalaga a le tusi tala o Richard Preston, ua fai nei finauga a Eugene, o Peters ma Nancy po’o ai e uliina le ta’avale lea o le a ave ai manuki. Na i’u lava ina malolo le ali’i o C.J. Peters, aua ua iloa e tatau lava ia te ia ona fai, ona o ia o lo’o avea ma ta’ita’i o le vaega lea o le a gafa ma le tapeina o manuki i totonu o le nofoaga lea i Reston.

O le taimi lea ua mana’o lava Nancy Jaxx e tatala loa taga nei, ona afai ae tu’u umi tino o manuki ua a’afia i le virusi o le Ebola i totonu o taga nei, o lona uiga e tatala atu, ua pei o le supo lea e taumafa e tagata soifua. E le gata i lea, ae o le a faigata fo’i ona fa’atino galuega ma su’esu’ega a ali’i ma tama’ita’i foma’i o lo’o i le nofoaga a le Ami, USAMRIID.

E faia pea…

Fa’aliliu: Akenese Ilalio Zec