Vaega: 79

“Le Atua e, o ai ea i matou ua e saga alofa mai pea i ai, o lenei ua o matou alafa’i mai i le manuia e ala i Lau tausiga alofa, fa’afetai i Lou alofa, fa’amalo i Lou agalelei Tama, o le vi’iga ma le loto fa’afetai matou te fa’afo’i atu i Lau Afio, Amene.” Ia manuia le alo faiva o le atunu’u i tiute o lenei aso.

Na muta mai la tatou tala ina ua fai nei su’esu’ega a le ali’i foma’i o Peter Jahring i o la toto ma le ali’i o Tom Geisbert, pe mata ua a’afia i la’ua i le virusi lenei ua a’afia ai manuki. O le taimi lea, ua alu fo’i le ali’i o Tom e fai ana su’esu’ega e pei ona fa’atonu ai ia e Colonel Peters ina ia mautinoa ai le virusi lenei pe moni o le virusi o le Malburg po’o se isi ituaiga e ‘ese mai ai.

Novema Aso 28. O Tom Geisbert, e nofo i se pito nu’u la’ititi i totonu o West Virginia, e fa’afeagai tonu ma le vaitafe o le Potomac i Maryland. Ina ua tete’a Tom Geisbert ma lona to’alua, sa nonofo lana fanau ma lona to’alua mo sina taimi, peita’i, o lea ua nonofo nei Tom ma lana fanau e to’alua, ae o lo’o va’ava’aia  e ona matua. E laiti le fanau a Tom Geisbert, o le ala fo’i lea na naunau mai ai ona matua ae maise o lona tina, e avane tamaiti la te tausia, ona o lo’o feagai Toma ma lana galuega i totonu o le nofoaga a le Ami.

A’o le i tu’ua e Tom le ofisa su’esu’e i le aso lea, sa ia faia su’esu’ega i ma ma o le manuki numera O53 lea na avane mai Reston. Na tu’u nei e Tom le ma ma o le manuki i totonu o le fagu e va’ai ai pe i ai se suiga e tula’i mai ai. E fai si umi o fa’atali. O le ala lea na alu ai loa i lona fale, ae se i toe fo’i ane i le aso e soso’o ai ona siaki lea pe ua i ai se suiga pe leai. E le i lelei se moe a Tom Geisbert i lea po, ona ua alu tele lona mafaufau po’o le a le mea o le a tupu i ma ma o le manuki lea na ia su’esu’eina ao le i alu i lona fale. Ua ala usu Tom i le fa (4:00) i le vaveao ma alu loa lana ta’avale e aga’i atu i le nofoaga o le Ami i Fort Detrick.

 Na siaki e ali’i Fitafita o le Ami o lo’o leoleoina le nofoaga ma ua alu loa i totonu o le potu sa fai ai ana su’esu’ega.

Na ave’ese nei e Tom ia le ma ma o le manuki ma vaelua i ni vaega la’iti, ma ia iloa ai, e moni lava o lo’o i ai le virusi ua a’afia ai le ma ma o le manuki numera O53, lea na maka e le ali’i foma’i manu o Dan Dalgard, mai le Kamupani a le Hazelton Washington. Na pu’e nei ana ata, ma savali loa i le ofisa o le ali’i foma’i o Peter Jahring, ua mautinoa nei, e moni lava o lo’o fa’asolosolo le mamate o manuki i totonu o Reston ona o le virusi lea ua maua nei.

Na toe alu nei le solo a Peter Jahring ma Tom Geisbert i le ofisa o Colonel Peters ma ua fai ai nei le talatalanoaga. Ua mautinoa nei, o lo’o sosolo pea le fa’ama’i i manuki uma lava o lo’o i totonu o le kamupani i Reston, ae o le a fa’atali mo le fa’a’iuga o su’esu’ega a le ali’i foma’i o Jahring ona mautinoa ai loa lea po’o le virusi o le Malburg pe leai.

Ua amata nei su’esu’ega a le ali’i foma’i o Peter Jahring, a’o fa’atino lana galuega lea, ua le mafai ona ave’ese lona mafaufau i lona manatu popole lea i a Dan Dalgard. Na i’u lava ina vala’au i a Dan ma ua talatalanoa nei. Na musu lava Peter ia ‘aua nei fa’ate’ia Dan, ae ia logo ia i se auala ia ‘aua ai ne i fa’apopoleina.

“Dan, ua mautinoa o le fa’ama’i o manuki e masani ona maua ai, ae e le a’afia ai tagata, ae o lo’o i ai le isi fa’ama’i o lo’o maua ai manuki.” Na fesili mai nei Dan po’o le a lea fa’ama’i, ae tali Peter, e le mafai ona ia fa’ailoa ane i le taimi lea, ona e le o mana’o e fa’apopole tagata.

E faia pea …

Fa’aliliu: Akenese Ilalio Zec