Vaega: 76

Fa’atalofa atu i le alafa’i mai i le manuia o le atunu’u i lenei taeao fou, taeao manuia, i le alofa ma le agalelei o le Atua Soifua. E ao ai ona o tatou fa’apea ifo, “Le Atua e, o Lou alofa, o Lou alofa, ua silisili lava lea, fa’afetai i Lou agalelei mo i matou i aso uma o lo matou ola, ia fa’afo’i atu pea le vi’iga i Lau Afio e fa’avavau, fa’avavau lava, Amene.”

Na muta mai la tatou tala ina ua faia nei su’esu’ega a le ali’i o Tom Geisbert, o le ali’i lenei e fiafia tele i lana galuega, o le su’esu’e lea i so’o se virusi o manu e taunu’u ane i le nofoaga o le Ami I Fort Detrick. O le nofoaga o lo’o faia ai su’esu’ega a foma’i fa’apitoa i so’o se virusi e ono a’afia ai le soifua o le tagata, fa’apea ma le ola o manu.

Ina ua ma’ea le su’esu’ega a le ali’i o Tom Geisbert, sa ia pu’eina loa ni ata tetele ma ua savali nei e agai atu i le ofisa o lana pule, le ali’i foma’i su’esu’e o Peter Jahrling. A’o aga’i atu Tom i le ofisa o Jahrling, sa fa’afeiloa’i ane ia e nisi o Fitafita o lo’o leoloeina le fale atoa. Aua fai mai le ali’i tusitala o Richard Preston i lana tusi lenei, o le nofoaga lea a le Ami a le Malo Tele e matua’i malu puipuia mea uma. E muliga fo’i le puipuina o le Peresitene o Amerika na i lo le puipuiina o le nofoaga lenei.

Na taunu’u nei Tom Geisbert i le fogafale lua o le fale, ma na savali sa’o loa i le tulaga o lo’o i ai le ofisa o lana pule, le ali’i foma’i o Peter Jahrling. Na toe tilotilo nei i le isi itu, ma na iloa atu ai le potu o le ali’i foma’i su’esu’e o Eugene Johnson, o ia lea sa ia ta’ita’ia le su’esu’ega na alu i le Ana o Kitum i Aferika.

Na tu’itu’i nei e Tom le faitoto’a o le potu o Peter ma ulufale loa i totonu. Na va’aia e Tom le matagofie o le ofisa o le ali’i pule, e teuteu lelei e le ali’i foma’i lona potu. O le itu o lo’o i ai le fa’amalama o lo’o tu tonu ai lava le laulau a le ali’i foma’i, a’o tua atu, o lo’o tautau mai ai ata na tusia e lana fanau.

“E i ai se mea ua tupu,Toma (Tom). O le fesili lea a Peter.

“Ioe, ua matua’i te le le fa’aletonu ua i ai nei.” O le tali lea a Toma ma tu’u atu ata na ia pu’eina i luga o le laulau a Peter Jahrling.

“O mea ia na maua i la’u su’esu’ega, mai i manuki ia na au mai mai Reston, e i ai lo’u manatu o le virusi, ma e foliga mai o le Malburg.”

Na a’apa ane nei le ali’i foma’i o Peter Jahrling i ata ma fa’apea ane i a Toma, “Ua e faia mai se tala fa’aulaula ia te a’u, e le malie.”

Na toe tali Tom, “E le o se tala ula.” Na toe fesili Peter, “E sa’o ma fa’amaoni lau tala?” Na tali Tom, “Ioe, e moni ma fa’amaoni.”

Na tilotilo toto’a nei le ali’i foma’i o Peter Jahrling i ata, ma na iloa ai e moni o lo’o i ai i totonu ni tama’i anufe, peita’i, e i ai lona ‘ese’esega ma le virusi o le Malburg, ona e fai si u’umi o anufe ia o lo’o la tilotilo nei i ai. O anufe e maua i le virusi o le Malburg e ta’ai’ai ma feoma’i fa’atasi, a’o anufe ia ua la va’ai nei i ai, o anufe e fai si lapopo’a te isi, ma e fa’asasa’o e le ta’ai’ai fa’atasi.

Na toe manatua vave e le ali’i foma’i o Peter Jahrling, o la’ua ma Tom na su’esu’eina mea nei, ma sa o la manavaina fo’i le ea, ae o lea e le i o’o i la’ua i se tulaga e ono amata ai ona mama’i. Ua popole le ali’i foma’i i lea taimi, ua le tautala, ae ua na o le pupula to’a ane nei i a Tom Geisbert.

E faia pea …

Fa’aliliu: Akenese Ilalio Zec