Afai e te fia fa’afofoga i fatuga tuai i le matagofie ma le malu, e mafai ona e toe manatua taimi ua te’a pe afai e te toe fa’alogologo i le aufaipese fou a tagata faigaluega o le TAOA ua taua o le “Senior Community Services Employment Program” (SCSEP).

O i latou ia sa a’otauina i nisi tofiga aoga tele mo le aoina mai o fa’amaumauga, o manatu ma lagona fa’aalia o tama ma tina matutua, talu ona amata le suiga ua i ai le polokalame i tulaga o taumafa vevela.

O le isi vaega o le vasega ua fa’atuina ai le aufaipese ma ua latou taina kitara ma ukulele e faafetauia ai latou fatuga malie. O sui iloga fo’i i latou a’o le’i o’o ina malolo mai o latou tiute sa tauavea mo le malo. O nisi sa faia’oga, o nisi sa avea ma leoleo, o nisi fo’i sa faigaluega i le kamupani i’a.

Pe afai e te fia fa’alogologo i a latou fatuga, e i ai taimi fa’atulaga e pesepese ai i latou i nofoaga o To’omaga o lo’o tufaina atu ai mea taumafa mo tagata matutua, ma sa maua fo’i se taimi e toe fa’alogo ai i le Sad Movies, Lau Lupe, Le Aute Samoa ma le anoanoa’i o fatuga a Samoa, e momomo ai lava le fatu pe a pesepese ai.

“O lenei aufaipese, na fa’atula’ia lava ina ua agaga i latou nei e fia fa’atuina se latou aufaipese, ona e lelei le ta kitara ma ukulele a latou ua auai nei i le fa’aili. Ina ua lafo mai le fanoga, sa matou fiafia e amatalia se mea lelei, aua e matua tele na’ua le agava’a o lo’o aofia i le mamalu o i latou o aofia i le TAOA,” o se tala fiafia lea a Tifimalae Ale, fa’atonu o le TAOA e tusa o lana fa’aili.

E o’o fo’i i tiute tau le aoina mai o fa’amaumauga o manatu fa’aalia ma ni lagona o ni suiga e fia mo’omia e sui o aofia i le TAOA, sa ia fa’aalia, “Mai le amataga o le taumafaiga e tufaina taumafa, sa tau fai o uma le matou aufaigaluega i le Ofisa e taumafai mai fa’amaumauga, sa fita tele lea galuega. Peita’i, ina ua talosaga le fesoasoani mai a le Matagaluega o Leipa a le Malo Tele mo le aoga fa’amasani i tiute nei e nisi o sui o lo’o i ai i le TAOA, sa iloga le fiafia o i latou e toe a’o’oga, ma umia ai latou tusi pasi ina ua mae’a lea kosi na a’otauina ai le to’a 33 o i latou.

O lea la polokalama ua fa’atulaga le tama’ita’i o Merieni Gutu, e fai ma fa’atonu o le polokalama mo lea vaega i le latou ofisa autu i Pago Pago.

Ina ua fesiligia le tulaga o le fa’atupega, ae sa ia fa’ailoa mai, “O le vaega tupe mai le Matagaluega o Leipa a le Malo tele, o lo’o fa’atupea mai ai lenei fa’amoemoe, ma o se faiga lelei tele, aua ua le fa’aalua ai le paketi fa’asoa a le TAOA.”

Ua fa’ailoa mai fo’i, e mafai ona fa’atulaga lea aufaipese e fa’afiafia i aso soifua o so’o se tina ma se tama matua, pe afai o le a logoina ofisa, ma fa’atalatalanoa i lea tulaga, fa’atasi ai ma isi fo’i ofisa o le malo i o latou aso litaea ma mea fa’apena.