“Ua atoa nei le 50 tausaga o lau faletelevise ma lana auaunaga e faia pea, ina ia fa’amaumau ma fa’ailoa atu mea o tutupu, o polokalama fo’i a le tatou malo ma ana galuega fa’atino mo le aga’i i luma o le atunu’u. Sa tatou oaoa i Faleseu ae o lea ua tatou se’e nei i ma’a o malie, ma e faafetaia ai le alofa o le Atua ona o nei manuia e tele ua tatou maua,” o le saunoaga lea a Fonoti Doug Jessop, se tasi sa avea ma tagata pu’e ata o le faletelevise KVZK i le amataga mai i le 1964 -  50 tausaga talu ai.

Na auva’a potopoto le faigamalo e aofia ai le sui o le Fono, Fa’amasinoga ma le Vaega Fa’amalosi Tulafono i lalo o le taitaiga a kovana ia Lolo Matalasi Moliga e molimauina i le aso ananafi le fa’amanatuina o le 50 tausaga o le KVZK-TV, lea sa amata mai o se faletelevise mo ‘ao’aoga.

Sa sili ona mataituina le auaunaga matavela a i latou sa muaimalae i le auaunaga ae ua malolo manumalo, ma ua molia’i fo’i le soifua i lenei aso tu’upoina.

O se saunoaga maeaea a le tofa Fagafaga Daniel Langkilde, le fa’atonu o lo’o tula’i mai le foe i lea matagaluega, sa ia fa’ailo ai le galuega toe fa’afou o totonu ma le pito i luma o le fale o lo’o i ai le KVZK-TV.

“O lenei galuega e fa’afetaia ai le matagaluega o Galuega Lautele, e afua mai le tama’ita’i fa’atonu Faleosina Faiai Voigt ma lana aufaigaluega a le M&O, aua e le o talutualimaina lava le poloaiga a le kovana ina ia fa’atino lenei galuega, tupe pe leai fo’i le alagatupe,” o se tala lea a Fagafaga.

Na fa’ailoa mai fo’i e Fagafaga, lea afuaga mai o le faletelevise i le tatou atunu’u, ma o se faletelevise muamua fo’i lea i atumotu o le Pasefika.

“O nei suiga uma, aua sa afua mai ona o se tala tusia e se ali’i tusitala sa ia asia i tatou ma sa ia tusia ai, ‘O se mea e maasiasi ai Amerika le teritori o Amerika Samoa’. Sa ia lisia fo’i le 10 o mea ua molimauina ai lana lea mau.”

Ina ua amata masa’a mai fa’amanuiaga o le tausiga a’ia’i a Amerika, ona fa’ao’o mai ai ma le faletelevise ina ia fa’atautaia ai a’oa’oga fa’aperetania ina ia lelei ai le nanu a le fanau talavou a le tatou malo. O Oketopa 5, 1964 na mua’i fa’atula’ia ai le faletelevise i Utulei, e pei ona i ai nei.

Na fa’afetaia fo’i e Fagafaga le auaunaga a i latou na asaina le gasu i tiute ma tofi i le faletelevise, ae ua malolo mai ae ua si’itia le auaunaga ma ua tauavea uma nei tiute e alo o Amerika Samoa i le taimi nei, ua leai lava ni ali’i papalagi o toe tutula’i mai i tofi inisinia i masini ma satelite, ae maise o le pu’eina o polokalama ma tulaga o tupe fa’asoa a le matagaluega.

E tusa ai ma le folasaga a le kovana, sa ia fa’ailoa mai ai, “O le faletelevise o se tasi o aseta na afua mai i le lisi a le ali’i tusitala o Clarence Hall, peita’i, ua i ai nei le lisi o mea e matamuli ai le malo i lana nofoa’iga nei, e 15 nei mea ua fa’asolosolo ona tau fa’aleleia.”

Ina ua mae’a ona fa’asalalauina lea tala tusia e Hall i le Readers Digest mai Niu Ioka, sa fa’aleleia mai loa e le malo tele o le tatou Uafu i lona faletele o i ai ona ofisa autu, Fausia le Malae Va’alele fou e pei ona tula’i nei, fa’atula’ia le Rainmaker Hotel ma sa igoa o le Americana i nisi vaitaimi muamua atu, Fausia le falema’i fou i Faga’alu ma fausia falea’oga fou, atoa ai ma le fa’ata loa ma auala uma o Tutuila, ma o le pulega lena a John Kennedy ma Lydon B. Johnson la sa tutula’i mai lea vaitau.

I le lipoti a Fagafaga sa ia fa’ailoa ai, “Ua mae’a fa’afouina konekarate ma le NBC, PBS, ma le CBS ina ia maua pea le soso’oga o polokalama ua masani ai le atunu’u, fa’atasi ai ma polokalama fou e toe fa’atepa ai le atunu’u i mea sa tutupu i tausaga e tele ua mavae, lea ua fa’agasolo atu lava i le ea i lenei vaitaimi.”

E ese mai lana lea folasaga, sa ia fa’ailoa fo’i, “o le amataga mai o le tautua sa fa’atino ai a’oa’oga e ala i fa’asalalauga a le KVZK ma isi ona alaata e 6, peita’i, o lenei vaitausaga, ua na’o le 4 alaata o totoe lea ua fa’aaogaina.”

Mai le lisi o tagata faigaluega tuai, sa fa’ao’o mai ai se fa’amalo mai ta’ita’i i le tina matua o Siupolu Lui Smith, ua atoa nei le 87 tausaga o le soifua, ae o lo ua ia molimauina lenei aso iloga i le KVZKTV. O lo’o soifua mai fo’i le ulua’i fa’atonusili Samoa o le faletelevise, le susuga Fulifuli Taveuveu.