Ads by Google Ads by Google

20+ Sui Auai A’oa’oga Talosaga mo Fesoasoani Tupe ANA

E fa aso na fa’atautaia ai le A’oa’oga mo Talosaga i ni Fesaosoani tau Tupe mai le ANA i Hawaii, le tama’ita’i o Susan White ma se tasi o alo o le atunu’u Rosia Tavita, ua loa ona tautua o ia i le Fagatele Marine Sanctuary i le amataga mai o lea fa’asao.

O le la’ua o’o mai, ona ua mafai ona la’ua fa’atautaia lea a’oa’oga fa’apitoa, ina ia toe timata lava tomai e mo’omia ona iloa patino e i latou e tusi talosaga mo Tupe Tu’utoina mai e le Administration for Native Americans [ANA] lea e agava’a ai fo’i le tatou malo ona o le teritori o Amerika, ma o tagata Amerika Samoa o i latou e o tagata nu’u moni o le Iuniate Setete o Amerika.

E pei ona iloa patino, e le o fa’aitiitia lea vaega tupe ua mae’a fa’aagaaga e le malo tele mo so’o se fesoasoani e taumafai tagatanu’u e saili atu ai se fesoasoani, ma o le ala lea o le fa’apa’aga fo’i ma le Matagaluega a le DHSS po’o le Ofisa o Alamanuia mo Tagata Lautele o lea vaega, ma latou fa’atulagaina ai lea fonotaga fa’alea’oa’oga ina ia fa’atautaia i le tatou nei malo.

O lea a’oa’oga sa talosaga atu sui fia auai i le Upega Tafa’ilagi po’o le Uepesite a le DHSS peita’i, sa talia lava so’o se tasi na ulufale atu e fia fa’alogologo ma auai i le a’oa’oga aoga lea.

Ua matauina ua auai atu sui e matua agava’a i lea tofi, ia tusia talosaga mo nei ituaiga fesoasoani tupe, aua e le toe totogia, peita’i, e ao ina usita’ia le fa’atulagaga e fa’aaogaina ai, ma ia le sasi fo’i i lea lava tulaga.

Na to’atele matagaluega sa auai sui, fa’atasi ai ma Fa’alapotopotoga e fa’atautaia galuega e le fa’atautaia o se pisinisi, ae le totogia fo’i, “NPO & NGO”  ma e le o ni lala fo’i o le Malo.  O i latou ia e sili ona aoga fo’i i ai nei ituaiga o tupe talosaga, peita’i, e tatau ona i ai se aoga mo le atunu’u o a latou galuega fa’atautaia.

O le ulua’i aso, sa mua’i fa’ataoto ai e le tama’ita’i faiaoga o lea kosi fa’apitoa le fa’atulagaga o le ‘au’au o lau galuega fia fa’atino, ma ia ta’aiga uma i ai lau galuega lea e fia fa’atupe. E tatau ona usitaia e so’o se tasi e tusi talosaga mo le fa’atupega a le ANA le auivi lea  ua folasia mai e le tama’ita’i o Susan White.

Peita’i, i le toe aso na mae’a ai lana auaunaga mo le mamalu sa fa’atasia ai, na fa’ate’ia ai i la’ua ma Rosia Tavita ina ua tu’ufa’atasia fo’i e le vasega fa’apitoa se latou ‘aiava, ma ua maua ai ni meaalofa matagofie mo i la’ua.

O le la’ua sao mulimuli lava sa tofusia ai sui uma sa auai i aso uma e fa ma le tusi pasi, ua fa’ailoa ai, lo latou agava’a, ma ua tatau fo’i ona gafatia e i latou ona tusia ni talosaga mo fesoasoani tupe a le Administration for Native Americans.

Na fa’atautaia fo’i ni ta’aloga jeopardy i le la’ua semina e mafai ai ona fa’ailoa ia i la’ua pe ua maua’a le iloa o nei sui sa auai i le a’oa’oga fa’apitoa sa la’ua taumafai i ai. Fa’ailoa mai le matagofie o nei fa’ailoga sa maua e sui nei sa lautogia, e aofia ai pepa kona kofe, sukalati mai Hawaii ma mea fa’apena.

O le fa’afetai fo’i i le Matagaluega o Alamanuia mo Tagata Lautele a le tatou Malo mo lea fo’i a’oa’oga taua, ua iloga ai, e mafai lava ona tu’ufa’atasia se Asosi, ma latou taumafai e va’ai ni galuega ua fa’afita i le malo ona fa’ataunu’u, ona talosaga loa lea mo le fa’atautaiga o lea galuega, afai e le mae’a le galuega i le tupe talosaga muamua, e mafai lava e le Asosi ona toe talosaga ma nisi alagatupe e soso’o ai lea galuega ma aoga ai i tagata e to’atele.

O le fa’afitauli ua iloga mai i so’o se fa’alapotopotoga lava a Amerika Samoa e talosagaina nei tupe mai le ANA, e mae’a ane le 4 i le 5 tausaga, ua motusia fo’i le vaega tupe mai le ANA ona ua motusia le va’ai lautele i le galuega sa fa’atino ma ua le toe talosagaina ai se soso’oga o le auaunaga mo tagata lautele, ae maise ai o le fesoasoani tau tupe mai le ANA.

O le aoga lea o le semina lenei sa fa’atautaia, ua fa’ailoa patino mai e White, aua le faia lea tulaga, ae va’ai galuega e fa’asolo pe soso’o fa’atulaga i ona vaega ta’itasi. Ia le motusia le va’ai, o lo’o i ai pea le mana’omia i nisi o tatou tagata, ae le va’ai na’o i tatou lava o i ai i totonu o lea Asosi e aoga i ai nei galuega sa tatau ona faia ia aoga i se vaega e to’atele o le atunu’u.