Ads by Google Ads by Google

Vavau a Samoa

VAEGA 3

O Aiga Tautai i le Polenisia

Ao tatou i ai i le faamatalaina o le mafuaaga na afua mai ai tagata Polenisia, fai mai le mau a Samoa i aso ua mavae, soo se taimi lava e usuia ai le fono a agaga o Saualii poo alii i le malae i Pulotu, e le fe’ausi pe a’au i le sami, ae momoli e le Vaaloa, ma, atonu o le ala lea a tuumalo ai se tamalii i aso ua mavae, ona momoli lea e le Vaaloa, ma, atonu o le ala foi lea a tuumalo se tamalii, ona faapea lea o upu pe a manu, “o  lea ua tootoo atu nei le Vaaloa..” o lona uiga, o lea ua molimoli atu e le Vaaloa lona agaga i le Fafa o Saualii, poo le nofoaga e faatasitasi i ai agaga o alii uma o le atunuu. E ui i le lavelave ma nunumi solo faamatalaga e uiga i le mea na afua mai ai tagata Polenisia, peitai o le mea ua manino i la tatou polokalame, e i ai lava itu i le gagana ma aganuu e tutusa ai tagata eseese nei, ma o i latou foi nei sa nofoia atumotu o le atu Polenisia,  lea e pei ona i ai ma Samoa.

O le isi mea ua manino i le tatou polokalame, o le toatele o tagata nei na uluai nofoia le atu Polenisia, na o latou folau i vaega eseese o le lalolagi, ma o le toatele lava o i latou na toe a’e manumalo mai a latou folauga ae o nisi na maliliu atu ai ona o le tulaga soua o le vasa na folau ai. I le tala faasolopito o Samoa o loo taua ai, tusa i le va o le 100 ma le 150 tausaga talu ona nofoia Upolu e le ulua’i folauga, ae taunuu loa le vaega lea na folau mai Kiripati ma o laou iloa ai,  e tai tutusa lava i latou ma tagata na ulua’i nofoia le motu, peitai o le mea ua tupu, ua amata ona le fiafia tagata na mua’i taunuu i Samoa i tagata fou, e ui e tutusa o latou lanu, peitai e le masani le isi vaega i le isi. O le vaega na ulua’i nofoia Samoa, ua latou taamilo ia Upolu ma Savaii, ma ua latou faailogaina ai nofoaga lelei ma le tu matafaga, ua latou mumusu ai e toe foa’i atu nei nofoaga i isi tagata faatoa taunuu mai.

Ua tula’i mai le faafitauli tele ia Samoa ina ua amata ona feitana’i ona tagata na ulua’i nofoia le motu, ma i’u ai loa ina lua itu, mulimuli ane ua tupu le taua i lo latou va. Ae ui i lea, na mafai lava ona toe faatoafilemu i latou nei, e ui na manumalo tagata Samoa fou ia ua faatoa taunuu mai i tagata ua leva ona taunuu, ma faaigoa ai loa e tagata tuai tagata fou o Samoa “Togafiti” e faamanatu ai a latou togafiti pepelo ma le mata’utia lea ua mafua ai ona latou manumalo i fanua ma laueleele ua maea ona latou faailogaina mo i latou lava, ma o Samoa la na amata ai ai loa folauga ia ua mafua ai ona nofoia le tele o atumotu o le Pasefika i le taimi nei. I faamaumauga mai ia Samoa anamua o loo taua ai, o ona tagata na folau atu i isi atumotu o le Pasefika ma latou vaaia ai le tulaga manuia o ia motu, ona latou toe foi mai lea ma tapena atu o latou auaiga ma nofoia loa nei motu eseese. Soifua.