Ua fa’aalia e le to’atele o le atunu’u e aofia ai tagata faigaluega, pisinisi ma pasi la’u pasese, le tuli mata’i o le latou silasila i le taimi e atoatoa ai le auaunaga a le kamupnai i’a fou a le Samoa Tuna Processors (STP) i le atunu’u, ona o iina e vavala mai ai ni isi o fa’amanuiaga mo le atunu’u i le itu tau tupe ae maise ai o tulaga tau pisinisi.

O le to’atele o le mamalu o le atunu’u sa fa’atumu a latou pepa talosaga mo ni avanoa e galulue ai i le STP, sa latou fa’aalia i le Samoa News i le vaiaso na te’a nei lo latou nonofo fa’atali ma le mautinoaga, e le o toe umi se taimi ae valaauina loa i latou i le galuega ma atoatoa loa le tautua a le STP.

“Ua leva ona ou sauni mo le galuega pe afai ae valaauina a’u, pau lava le lagona lea ua o o mai, o le fia o o i totonu o le vaega e fa’atino ai le galuega ma galue loa”, o le saunoaga lea a Asenati Laga, o se tina sa galue mo le kamupani a le COS Samoa Packing ua tapunia mo le 12 tausaga, ma o lo o galue nei i se tasi o kamupani i le atunu’u, ae ua ia fa’aalia lona naunau e fia galue mo le kamupani i’a fou lea.

Na taua e ni isi sa fesiligia e le Samoa News e fa’apea, e le o utuva lo latou fa’afeso’ota’i o le Ofisa a le STP e fesili i ai i se tonu o le galuega, ma ua fautuaina i latou e le o toe umi se taimi o lo o totoe ona amata aloaia loa lea o letautua a le kamupani.

“Ua silia i le 20 tausaga o o’u galue i galuega a kamupani i’a, ma ua masani fo’i i nei ituaiga galuega, ma, pau le agaga o lo o i ai, o le tulima’i o le vaai i le taimi e atoatoa ai le tautua a le STP i se taimi e le o toe mamao”, o le molimau lea a Viane Sootaga.

O lo o fa’apena fo’i ona tuli mata’i fa’atasi mai ai ma le silasila mamao a le aufai pisinisi i fale’aiga ma pasi la’u pasese.

Na taus e le ali’i fai pisinisi ia Lavea James Filiga o lo o fa’atautaia se tasi o fale’aiga o lo o i luma o le StarKist Samoa i le taimi nei, e o no fa’aopoopo le to’atele o tagata fa’atau mo lana fale’aiga, pe afai ae atoatoa le auaunaga a le STP i se taimi e le o toe mamao.

Ae na taua e ali’i ave pasi o Iosua Mataniu ma Amosa Fetaui, o le a atili ona tele pasese e fela’ua’i e le au fai pasi la’u pasese pe afai ae fa’aopoopo ni isi tagata fiagaluegaa le kamupani i’a fou.

“Afai ae atoatoa le tautua a le STP i se taimi o i luma, ona toe vaaia fo’i lea o le tele o pasese fela’ua’i, ona toe o o fo’i lea i le taimi a o tatala le Samoa Packing, i le to’atele o tagata feoa’i ma fiafia e ti’eti’e pasi”, o le molimau lea a Fetaui.

Na taua e se sui sinia a le STP e le fa’ataga ona talanoa i mataupu fa’apenei mo le kamupani, toe pau nai vaega laiti o lo o fa’atalitali i ai le kamupani, o le taunu’u mai lea o ni isi o ana masini mai fafo ona atoatoa loa lea o le latou auaunaga.

Ina ua fesiligia lea sui sinia a le kamupani i se taimi e ono taunu’u mai ai a latou masini, na taua le molimau, o lo o fa’amoemoe e tatau ona taunu’u mai i le isi va’a la’u oloa o lo o fa’amoemoe e afea le atunu’u i le amataga o le masina lenei o Mati.

O le masina o Ianuari 2015 na tatala aloaia ai le tautua a le STP, ma e silia i le to’a 200 avanoa faigaluega ua mafai ona maua ai i le taimi nei, ma le fa’amoemoe e ono fa’aopoopo pe afai ae atoatoa le auaunaga a le kamupani i se taimi e le o toe mamao.