O le vaiaso nei na faila ai e le malo tuuaiga faasaga ia Lusia Tusi, po o Sheila e pei ona iloa ai o ia e le to’atele, i lona faatonu lea o ni tamaitai se to’alua mai Samoa la te faia uiga faatalitane, atoa ai ma le moliaga o le faaoolima i le tulaga tolu.

O le to’alua ai lea o tagata ua tuuaia e le malo i le mataupu o le faia o gaioiga faatalitane, talu ona alia’e mai lenei mataupu i le faaiuga o le tausaga na te’a nei ma le amataga o le tausaga nei, i le fale Kalapu o le Karaoke Bar i Satala.

O le mataupu lenei na tofu atu i le Ofisa o Leoleo i Tafuna i le masina o Aperila 2013, ina ua logo e se alii leoleopo o le Malae Vaalele le ofisa o leoleo mo se fesoasoani, faatatau i ni tamaitai se toalua na tamomo’e atu i le latou Ofisa ma talosaga atu mo se fesoasoani, ona o lo o tuliloa atu i laua e ni tagata, ma tofia ai loa le tamaitai leoleo ia Maria Penitusi na te suesueina lenei mataupu.

O le masina o Aperila na te’a nei na faila ai e le malo le ulua’i mataupu e faatatau i le taumafai lea e faia uiga faatalitane i luma o le faamasinoga, lea o lo o tuuaia ai Fa’asaina Park.

O lo o taua i faamaumauga a le faamasinoga igoa o tama’ita’i e to’alua o lo o aafia, o ‘M.W’ ma ‘I.M’.

Na taua e M.W i leoleo e faapea, sa fasi o ia e lana sponsor o Park i totonu o le Karaoke Bar i le aso 19 Aperila, 2013 e ala i lona po o ona foliga, futi lona lauulu ma toe toso lona ulu a’o faaauau pea ona ia ta tu’i lona papatua.

Sa taua fo’i e M.W i leoleo le tago o Tusi ma taofi o ia i lalo ina ia faigata ai ona ia minoi pe taumafai fo’i e puipui lona tino mai le taimi, a’o fasi o ia e Park.

Na molimauina e leoleo le i ai o unaoa i le papatua o M.W, sa ia taua fo’i i leoleo lona faalogoina o le tiga i lona papatua. O lo o taua foi i faamaumauga a le faamasinoga e faapea, o Park na totogiina pasese o tamaitai nei ina ia toe fo’i atu ai i Apia.

Ina ua maea ona fesiligia e leoleo ia M.W ma I.M e faatatau i lenei mataupu, na manino mai ai loa i faamaumauga a le faamasinoga, o se tamaitai Samoa e igoa ia Mary Pou, o ia lea na taumafai e saili ni tamaitai mai Samoa e galulue i se fale’aiga i Amerika Samoa nei, lea na malie ai loa I.M o le a sau e galue i le fale’aiga.

Ina ua taunuu I.M ia Oketopa 2012 i le teritori, sa ia iloaina ai o le nofoaga lea o le a galue ai o le Pa pia e taua o le Karaoke Bar i Satele, lea fo’i sa ia vaaia ai ni tamaita’i se to’avalu o lo o galulue ai i totonu o le Pa pia, amata mai i le masina o Oketopa 2012 e oo mai i le masina o Aperila 2013.

O a latou galuega e pei ona taua e I.M i leoleo, e le gata o latou o ‘waitress’, ae sa faatonuina fo’i i latou ina ia latou nonofo faatasi ma tagata e ulufale atu i totonu o le Pa pia, aemaise lava i alii fai faiva mai vaa fagota, mo se taumafaiga ia tele se vaega tupe e faaalu e i latou nei i totonu o le Pa pia.

I le nonofo ai i tafatafa o tagata fai faiva nei, e tatau ona ia sogi atu i alii fai faiva, po o le kisi atu foi o tagata fai faiva ia te ia i foliga po o lona fatafata fo’i, ae a latalata loa i le taimi e tapuni ai le Pa pia, e tuu atu e Park le faatanaga i tagata nei latou te ave ai tamaitai i fafo atu o le Pa pia ma faatino tulaga tau feusuaiga.

Na taua e I.M ma M.W i leoleo e faapea, afai e le i ai Park i totonu o le Pa pia i le taimi e mana’o ai le tagata fai faiva e o ma se tama’ita’i faigaluega, ona aumai lea o se faatanaga mai ia Tusi, ae o ni isi taimi e faanoi ai alii fai faiva ia I.M po o M.W pe mafai ona latou o i fafo o le Pa pia, ona faanoi lea o I.M ma M.W ia Park mo se faatanaga.

Na taua e I.M i leoleo e faapea, i le po muamua lava, sa musu ai la te o ma se tasi o alii fai faiva, peitai na una’i o ia e Park la te o ma le ma le alii fai faiva.

E masani ona totogi e le alii faiva se potu i se fale mautotogi,  ona la faatino lea ma I.M gaioiga faa feusuaiga i totonu o le potu, ma e mafai ona totogi e le alii lea ia I.M i le $50 po o le $60 i le po e tasi.

Na taua e I.M i leoleo, ua to’atele alii fai faiva ua latou momoe talu mai le ulua’i taimi na galue ai i le Pa pia. I se tasi o po na musu ai la te o ma se alii fai faiva, peitai sa fai atu Tusi ia te ia, “E tatau ona e faalogo mai ia te a’u, o a’u lea e lona lua i le tuuina atu o faatonuga ia te oe.”

I le faamatalaga a M.W sa tuuina atu i leoleo, sa ia taua ai le faatonuina o ia e Park i le ulua’i taimi o ia o le a galue o se ‘waitress’ mo le Pa pia, e le’i umi ona amata lana tautua ae amata loa ona una’i o ia e Park ina ia alu e nonofo ma le aufai faiva pe a ulufale atu i totonu o le Pa pia, ina ia mafai ai ona faaalu e i latou nei tupe e tele i totonu o le Pa pia.

Na taua e M.W lona vaaia o ni isi o tamaitai o lo o latou galulue faatasi i totonu o le Pa pia, o lo o sisiva ma aveese o latou lavalava i luma o alii fai faiva, ae o isi tamaitai na te vaaia o lo o kisi atu i alii fai faiva, atoa ai ma lo latou faataga o alii fai faiva e kisi atu i o latou alafau po o fatafata fo’i.

O ni isi o po na te faalogo ai o faatonu e Park ma Tusi ni isi o tamaitai e o ma alii fai faiva i fafo atu o le Pa pia.

Sa ia taua i leoleo e faapea, e faatolu ona ia talosagaina Park mo se faatanaga latou te o ai ma alii fai faiva, ina ua ia manaomia se tupe. Sa ia taua fo’i e faapea, e lei totogiina lava o ia e Park mai lana galuega o le ‘waitress’, na pau le auala e faataga e Park o ia e maua ai ana tupe, o le o lea ma alii fai faiva.

Sa ia taua foi e faapea, o se tasi po sa ia faanoi ai ia Park mo se avanoa la te o ai ma se alii fai faiva, ae o le isi po sa ia faanoi ai ia Tusi mo se avanoa la te o ai ma le isi alii fai faiva.

Na faailoa e I.M ma M.W i leoleo e faapea, o Park na te tuuina atu faatonuga uma i tamaitai i auala e faatino ai feusuaiga ma alii fai faiva, ae le tatau ona latou faatinoina ni gaioiga faa talitane i totonu o le Pa pia, pe afai o lo o eva ai ma ni tagata Samoa.