O le taeao ananafi na tulai ai i luma o le Faamasinoga Faaitumalo le alii pagota o Iumalo Seiuli, lea o lo o tuli lona faasalaga i le umia o mariuna, ina ua toe molia i le solitulafono o le sola ese a’o tatala i tua e alu e faigaluega.

Na mafua ona toe molia Seiuli, ona ua faailoa e ni molimau i leoleo, sa latou vaaia Seiuli i lo latou fale i Nua & Seetaga.  E ui ina sa teena e Seuli lea molimau, ae peitai na faamaonia e lona toalua, sa faatolu ona alu atu Seiuli e asi laua ma lana tama.

Na faamaonia foi e le isi alii pagota o lo o galulue faatasi ma Seiuli i le kamupani a le New Dimensions ina ua fesiligia e leoleo, le faataga e le alii pule o le kamupani o laua ma le ua molia la te o e asi o la aiga.

E tusa ai ma faamaumauga a le faamasinoga o lo o taua ai e faapea, e faalua ona talia le talosaga a Seiuli e tatala o ia i tua e faigaluega ma toe foi atu i le toese.

O le aso 14 o Iulai 2011 na talia ai lana uluai talosaga, ma amata faigaluega ai loa i le kamupani a le New Dimensions Corporation i le aso 18 o Iulai, peitai o le aso 2 Setema na taofia ai lona toe alu e faigaluega, ina ua faamaonia i se suega sa faia le maua o le mariuana i totonu o lona toto.

Na toe tatala i tua Seiuli e faigaluega i le aso 23 o Aperila 2102 i le Sili’s Burger & Car Wash ae e le’i atoa se lua vaiaso talu ona talia Seiuli i le polokalame ae toe taofia i le aso 30 Me 2012, ina ua maua e le Ofisa o Tiute se pusa na aumai ai ni mariuana i le Falemeli, o lo o aafia ai nisi o lo o galulue i le kamupani lea o lo o galue ai le ua molia.

O le toatolu ai lea o pagota ua molia e le malo i le solitulafono o le sola ao tatala i tua e faigaluega.

O le isi toalua o le auuso masaga ia Merlin ma Marlon Uli, lea ua i luma o le faamasinoga maualuga a laua mataupu.

Na taua e le alii leoleo o lo o gafa ma le suesueina o mataupu nei ia Cpt. Paulo Peau Leuma, o lo o faaauau pea a latou suesuega i isi foi pagota o lo o masalomia le aafia ai i le tulaga lava lea e tasi.

O lo o taofia pea le ua molia i le toese e tuli lona faasalaga mai ona moliaga muamuai, e faatali ai le aso lea ua faatulaga e valaauina ai lana ulua’i iloiloga.