Na teena e le afioga i le ali’i faipule ia Vaetasi Tu’umolimoli Saena Moliga vaega o se tusitusiga mai le Fa’atonusili o Aoga ia Vaitinasa Dr. Salu Hunkin Finau e fa’apea sa alu se solo tete’e a ni isi o faipule i le ali’i kovana, aemaise ai o le isi vaega o le tusi fai mai, o le solo tete’e na fa’avae mai lea i luga o faiga fa’aleaiga

Na fa’ailoa sa’o e Vaetasi ia Vaitinasa i se iloiloga sa faia i le vaiaso nei, le le moni o ni fa’aupuga ua fa’alele ma fa’afofoga ai le lautele o le atunu’u, ona o le solo tete’e e matuia lona taunuuga, ae o le savali e to’a filemu le fa’aiuga e maua mai ai.

“Ua ou leai atu i tala ua fa’alele e fa’atatau i le solo tete’e sa alu i le ali’i kovana, o le mea moni, e leai se solo tete’e sa alu, ae o le savali sa alu i le ali’i kovana ina ia fa’amanino ni isi o mataupu sa fia malamalama i ai le komiti ma le maota”, o le saunoaga lea a Vaetasi, o ia fo’i lea o le ta’ita’ifono o le Komiti o Aoga a le maota o sui, i le iloiloga sa faia ma Vaitinasa, lea fo’i sa auai le Pule o le Polokalame o le SPED ia Jeanette Vasa’i Tilo.

I le vaega o le tusi a Vaitinasa fai mai na mafua ona alu le solo tete’e ona e fa’aleaiga le afua’aga, na teena fo’i e Vaetasi lea vaega o le tusi a le tama’ita’i fa’atonusili o aoga.

“O nofoa ia matou te nonofo atu ai, o nofoa o itumalo, a ta’u loa la itumalo, ona ou fefe lea ma ou mata’u, ona o lo o i ai matai, faifeau ma tagata tausi aiga, o i latou na sa filifilia i matou uma nei e nonofo i nofoa ia o itumalo, ae le faapea na o mai o matou aiga ma aumai matou e fa’anonofo i nofoa nei, e le aumaia la ni a matou aiga e fai i nofoa nei, ae o iinei e saili ai le tofa mo le manuia o le atunu’u ma tagata ta’ito’atasi”, o le isi lea saunoaga a Vaetasi ia Vaitinasa.

Na fa’ailoa e Vaetasi ia Vaitinasa e fa’apea, so o se taimi e o o mai ai ni faasea a le atunuu i afioga i faipule, latou te le manatu mama i ai, e le fa’atauagavale fo’i i ai, ae tula’i ma fa’atino le galuega mo le sailia o se auala e foia ai i fa’afitauli.

“O matou uma nei e tautua mo le atunu’u ma itumalo, ae le o matou aiga, aua fo’i o le finagalo o le atunuu ma le itumalo lea ua mafua ai ona matou nonofo iinei, e lei ‘hire’ ina matou e Le’i matou te galulue iinei”, o le isi lea saunoaga tu’u sa’o a Vaetasi ia Vaitinasa, ma ia fautuaina ai loa le tama’ita’i fa’atonusili o aoga ina ia galulue fa’atasi ma lana matagaluega e foia fa’afitauli o lo o alia’e mai ai.

O le mataupu e pei ona talanoaina e le komiti a le maota o sui ma molimau a le malo, o le mataupu na laga e le afioga i le ali’i faipule ia Faimealelei Anthony Fu’e Allen, e fa’atatau i ni suiga ua faia e le Ofisa o Aoga i le isi lala o le matagaluega, le vaega o lo o gafa ma le aoaoina o fanau e i ai manaoga faapitoa o le tino ma le mafaufau (SPED).

O ni isi o ia suiga e aofia ai le fautuaina o le vaega a le SPED, e tatau ona o i tua i aoga ma fesoasoani i faiaoga i le a’oa’oina o fanau o lo o i ai manaoga faapitoa o le tino ma le mafaufau.

O lea suiga sa fa’avae mai i se su’esu’ega sa faia, lea na taua ai le fa’atamala o le SPED e fa’atino ana tiute tauave i lalo o le tulafono, o le a’oa’oina lea o fanau o lo o i ai manaog faapitoa.

I le avea ai o Vaetasi o se tasi sa tautua i le Ofisa o Aoga a le malo mo le tele o tausaga, lea fo’i na malolo litaea mai ai, sa ia fa’ailoa ai ia Vaitinasa e fa’apea, o le mafua’aga na ala ai ona savalia e afioga i faipule le ofisa o le ali’i kovana mo se fesoasoani, ina ua leai se feso’otaiga a le Ofisa o Aoga ma le Komiti o Aoga a le Maota o Sui e faatatau i lenei mataupu, a o lea e manino le ripoti, ua silia ma le 6 masina talu ona taoto le ripoti i luma o le ali’i kovana.

O le itu lelei o le savali a faipule e pei ona saunoa Vaetasi, latou te o o atu o lo o silafia lelei e le alii kovana le fa’afitauli o lo o tula’i mai, ma mafai ai loa ona maua so latou silafia e tusa ai o le mataupu.

Na fautuaina malosi e Vaetasi ia Vaitinasa, e le mafai ona manuia le va feagai o le Fono Faitulafono ma le Ofisa o Aoga pe afai e le galulue fa’atasi, aemaise lava i komiti o aoga a maota e lua, ina ia fefa’asoaa’i i mataupu o lo o tula’i ai i totonu o le matagaluega, ona silafia ai fo’i lea e le Fono le itu e mafai ona tu’u atu ai sana fesoasoani.

Na fa’amalulu Vaitinasa ma Jeanette i le komiti e tusa ai o fa’aletonu e pei ona taua, ma la taua ai le taua o fautuaga ua taoto atu a le komiti, e fuafua i ai fa’aiuga mo le manuia o le auaunaga a le matagaluega i le lumana’i.