E tele suiga tetele ua maitauina i le lotoifale o le Matagaluega o Leoleo, talu ona fa’amavae ese le tofa a Leseiau Laumoli mai le tulaga o le Sui Komesina, e pei ona fa’amaonia mai e le afioga i le ali’i komesina o Leoleo i se fa’atalatalanoaga ma le Samoa News i le vaiaso nei.

I le tuana’i ai o tausaga e 29 o lana tautua mo le Matagaluega o Leoleo, na fa’amavae ai loa le tofa Leseiau mai le tofiga o le sui komesina i le masina o Aperila na te’a nei, ae talu mai le taimi na ia tuua ai le nofoa seia o o mai i le taimi nei, ua tele suiga ua maitauina e le ali’i komesina i le fa’atinoina o galuega fa’atino a le matagaluega, e pei o le leai lea o se lagolago o lo o tu’uina atu i suiga fou ua faia i totonu o le matagaluega i le taimi nei.

“Talu mai lava le taimi na tuua ai e Laumoli le nofoa, ua matua fa’aletonu mea uma, ua ou iloaina le tulaga lena, ou te iloa o tagata ia ua tofia e sui tulaga ia te ia i le taimi nei, e foliga mai ua leai se fa’aaloalo ma se lagolago a le ofisa o ave i ai, ou te le iloaina se mafua’aga pe aisea”, o le saunoaga lea a Haleck.

O le afioga ia Save Liuato Tuitele lea ua tofia nei e le ali’i kovana e avea ma sui komesina le tumau, e fa’atalitali ai se tasi na te nofoia le nofoa i se taimi o i luma.

O le tagata e agava’a i le tulaga o le sui komesina e pei ona talitonu i ai Haleck, o se tagata lea e malamalama i auala uma e fa’atino ai galuega a leoleo i aso ta’itasi.

“O le tofiga o le komesina ma isi fo’i tofiga o lo o tofia e le kovana, o tagata ia e o mai ma toe o, ae o le tagata e autu i ai le ata ma le galuega, o le sui komesina, o le mafua’aga fo’i lena na ou iloa ai le fa’aaloalogia ma le lagolagoina e le matagaluega ma leoleo uma o Laumoli a o ia nofoia le nofoa, ona ua tele tausaga o lana tautua ma ua masani fo’i i auala e fa’atino ai le galuega”, o le isi lea saunoaga a Haleck.

E le i musu le ali’i komesina e natia ona lagona e fa’atatau i le nofoa o le sui komesina, ae sa ia fa’ailoa i le Samoa News e fa’apea, “afai e tofia Save e avea ma sui komesina, ailoga e nofo lelei i lagona o leoleo ua tele tausaga o tautua i le matagaluega, lona uiga o le a fa’apea lo latou manatu, o latou ua le agava’a i le galuega fua i le tofia mai i fafo o se tasi na te nofoia le nofoa”, o le isi lea saunoaga a Haleck.

Ina ua fesiligia le ali’i komesina pe ua ia maua le ripoti a Save e tusa ai o lana su’esu’ega i tulaga o lo o i ai le Matagaluega o Leoleo, na tali Haleck, “ou te le i mauaina se kopi o lana ripoti, ou te le o iloa fo’i po o a ni ana fautuaga o i ai e fa’atatau i lana su’esu’ega sa faia”, o le saunoaga lea a Haleck.

Na taua fo’i e Haleck e fa’apea, na te le iloaina se mafua’aga ua ala ai ona faia e Save fa’aiuga uma e pei ona ia faia mo le Ofisa o Leoleo, na te le o iloa fo’i po o i ai se isi manaoga o mana’omia e Leoleo ua mafua ai ona tofia o ia na te tauaveina lea tulaga.

“E tele tausaga o taumafai mai pea lenei matagaluega, mavae atu lea komesina ae aga’i mai lea komesina, o lea fo’i ou te taumafai a’u ia e fa’atulaga ia lelei ni isi o vaega mo le matagaluega, a o lea ua oso fa’afuase’i mai ana fa’aiuga fa’apenei”, o Haleck lea.

Ina ua fesiligia le tulaga o Fuega Saite Moliga talu ona tofia o ia e le kovana e galue mo le matagaluega o Leoleo, na vaaia fofoga fiafia o le alii komesina ma ia taua lona fa’afetaia o le susuga a Fuega, i le tele o lona sao ma lana fesoasoani ia te ia i le fa’atinoina o le galuega.

Na fa’aigoa e Haleck ia Fuega o se tagata na te fa’ataunu’uina manaoga mo ia i le galuega, e pei o le alu lea e asiasi i lala eseese o le ofisa o leoleo i Leone, Tafuna, po o le alu fo’i e siaki le vaega a le OMV po o le Fuimu, ma vaai po o tulaga lelei le faatinoina o galuega a tagata uma ma leoleo, ae po o i ai fo’i se manaoga taua o lo o i ai e tatau ona talanoaina ma foia.

“O le isi itu lelei o Fuega i le taimi nei, o le i ai lea o taimi la te talatalanoa ai fa’a le uso ai ma le ali’i kovana, ma ia fa’ailoa i ai a’u galuega o lo o fa’atinoina i totonu o le ofisa, tusa lava la po o a ni ripoti ma ni tala a tagata e la’u i le kovana e fa’apea o a’u lea ou te taumafai e fai ni suiga le lelei i totonu o le ofisa, o le mea sili o lo o molimau Fuega i a’u galuega o lo o fai, o ia fo’i na te fa’ailoa i le kovana mea moni o lo o tutupu”, o le isi lea saunoaga a Haleck.

A o le i tuua e Save le atunuu mo sana malaga i fafo i le vaiaso na te’a nei, e le gata sa ia faia ni isi o suiga i galuega a leoleo, ae ua ia poloaina fo’i le faia o se ripoti ina ia mafai ai ona iloa tonu le aofa’i o mea molimau o lo o i totonu o le potu e taofia ai mea molimau a le malo i le ofisa o leoleo.

O isi fa’aiuga sa faia e Save e aofia ai lona fa’atonuina o se suesuega fa’asaga i le mataupu o lo o tu’uaia ai ni ali’i leoleo se to’afa, i lo latou faia lea o ni gaioiga na o o ai manu’a i le tino o se ali’i e a’afia i le gasegase o le mafaufau, i le mae’a ai lea ona faia e lea ali’i o ni gaioiga e ono lepeti ai le saogalemu ma le nonofo lelei o tagata lautele i luga o le ala tele i le masina o Me na te’a nei.

Saunoa Haleck e fa’apea, na te le iloa pe aisea ua fa’atonu ai fua le Ofisa o le Loia Sili mo le faia o se suesuega i lea mataupu, a o lea lava e i ai vaega fa’apitoa a le ofisa o leoleo ua i ai le agava’a e fa’atautaia ai su’esu’ega fa’apea.

Ona o le suesuega lea ua faatautaia nei e le ofisa o le loia sili fa’asaga i lenei mataupu, ua taofia ai loa le faia o se suesuega fa’alotoifale a le ofisa o leoleo e pei ona taua e le alii komesina, ae o lona fa’anaunauga o lo o i ai, talosia ia leai se isi o ali’i leoleo o lo o tu’uaia i lenei mataupu e a’afia o latou igoa.