E lua fale falaoa ua tapunia nei ma faasala e le Matagaluega o le Soifua Maloloina mo se taimi le tumau, ma le faamoemoe a maea ona faaleleia vaega ua poloaina e toe faaleleia i totonu o le vaiaso e tasi, ona toe mafai lea ona tatalaina.

I se faamatalaga mai ia Papali’i Marion Fitisemanu o lo o fa’auluulu i ai le vaega e asia Pisinisi ma le Siosiomaga a le Matagaluega (Environmental and Sanitation Davision - ESD), o le faaiuga e tapuni le Amy’s Bakery i Fagaalu ma le Haleck’s Bakery i Pava’ia’i, ona ua faatele ona tuuina atu ia i lapataiga ma fautuaga mo vaega e moomia le faaleleia, peitai sa maitauina pea le le faatinoina o ia vaega.

Fai mai Papalii, a talanoa loa i taumafa, e tatau ona matua mataalia i ai le matagaluega ona o lo o talanoa i le soifua maloloina o tagata o le atunuu, o le mafuaaga lena ua faia ai le latou faaiuga, ina ia mautinoa e faaleleia tulaga o lo o faaletonu ma mafai ai ona toe tatala fale falaoa nei mo le tautuaina o le atunuu.

Na taua foi e Papalii, o faafitauli faapenei i fale falaoa, faleoloa ma faleaiga o lo o faatau ai meaai, o ni faafitauli o lo o maitauina pea i le tele o taimi, ma afai ae le usitaia e pisinisi faatonuga o lo o tuuina atu, pau le faaiuga e faia a le Soifua Maloloina o le tapunia loa ina ia mautinoa ai e faaleleia vaega e tatau ona faaleleia.

“E 14 aso lea ua tuuina atu i fale falaoa ia e lua e tapena ai ma faaleleia vaega uma ua faatonuina, ona toe faia ai loa lea o le isi asiasiga ina ia mautinoa ua atoatoa ma lelei vaega e tatau ona faaleleia,” o le saunoaga lea a Papalii.

O vaega na aga’i i ai le asiasiga a le aufaigaluega e pei ona saunoa Papali’i, o vaega o lo o gaosia ai taumafa, ma o vaega nei e le o mafai ona silafia pe vaai atu i ai le atunuu ona o lo o pito i totonu o le faleaiga, ae o vaega tonu la nei o lo o taula’i i ai le galuega a le Matagaluega o le Soifua Maloloina, ina ia mautinoa e lelei ma mama vaega o lo o kukaina ai taumafa mo le atunuu.

Na faailoa mai e Cathy Haleck i le Samoa News e faapea, o lo o galulue lona aiga i le faaleleia o vaega e pei ona faatonuina e le Soifua Maloloina, ma o lo o latou usitaia uma vaega e pei ona tuuina atu ia te i latou.

E le’i manuia taumafaiga a le Samoa News mo le tau sailia lea o se finagalo mai le Amy’s Bakery e tusa ai o lenei mataupu, ae na taua e Papalii e faapea, o ni isi o faleaiga ma fale falaoa i le atunuu, o lo o latou faaaoga fale o lo o nonofo ai e avea ma nofoaga e faatino ai a latou pisinisi.

O le faafitauli la o lo o maitauina ai, o lo o i ai pea uaea eletise o lo o felavasa’i solo i totonu o le fale na fausia e nonofo ai, ae lei fausia mo le faatinoina ai o se pisinisi.

Fai mai Papalii, o se tasi o faaeteetega i uaea eletise nei, e i ai le taimi e tafe ai ga’o mai tino o uaea i luga o nofoaga o lo o faatinoina ai galuega mo le gaseseina o taumafa, ma o iina lea e mafua ai ona le saogalemu nofoaga faapenei pe a oo mai i tulaga o taumafa mo le atunuu.

faaliliu Ausage Fausia