Ads by Google Ads by Google

Tala otooto o Fa’amasinoga

OGE VAISAGOTE

 

E ui o lea ua talia e le faamasinoga faafinauga a loia mo se faasalaga mama mo Oge Vaisagote, peitai na faailoa e alii faamasino e faapea, latou te manaomia sina taimi e iloilo ai se faasalaga talafeagai mo lenei mataupu, a’o le’i fofogaina la latou faaiuga, ma ua toe tolopo ai le mataupu e toe fofogaina i le vaiaso nei.

 

E le gata na faatoese le ua molia i le faamasinoga e tusa ai o lana solitulafono, ae sa ia faatoese foi i lona aiga, ekalesia ma le nuu, ona o le ta’uvalea ai o i latou uma i lana gaioiga sa faia, sa ia faatoese foi i le tama’ita’i na aafia ma lona aiga ina ia faamagalo sona sese.

 

Na taua e Vaisagote i le faamasinoga e faapea, “Ua ou iloa nei o le toese e le o se nofoaga lelei mo a’u, ma ua i’u la’u filifiliga o lo’u taimi muamua lenei ou te toe tula’i ai i luma o le faamasinoga i se solitulafono ou te faia,” o le faamatalaga lea a le alii na molia, ma ia talosagaina ai loa le faamasinoga ina ia tuu atu se isi avanoa mo ia.

 

Na maua le avanoa e molimau ai le tama o le alii o lo o molia ma sa ia talosagaina ai alii faamasino mo se faasalaga mama mo lona atalii, ina ia mafai ai ona toe foi atu i le aiga latou te mafuta.

 

Na faailoa e Iosefa Vaisagote i le faamasinoga e faapea, o lona atalii o se tagata e fiafia i le lotu ma mafutaga a le Autalavou, ma o mea foi ua tutupu i lona olaga la te le’i a’oa’oina ma le tina o le aiga o ai na te faia.

 

Sa ia taua foi le talia fiafia e matua o le tamaitai na aafia le la faatoesega ma le tina o le aiga e tusa ai o le mea sa tupu, ma ua uma ona toe teuteu ma faaleleia va o aiganalua.

 

Na finau le alii loia o Douglas Fiaui i le faamasinoga ina ia nofovaavaaia le ua molia, ae ua lava le umi lea ua maea ona ia tuliina i le toese i le taimi nei e avea ma ona faasalaga i lenei mataupu, o lea talosaga na lagolago i ai le loia a le malo ia Julie Pasquale.

 

Fai mai Fiaui, o le alii ua molia ma le tamaitai na aafia, sa faia sa laua mafutaga faaleuo i le taimi na tulai mai ai le faalavelave, ma e le avea lea tulaga ma alofaga i le soli ai o le tulafono.

 

TOLOPO LE LAUINA O LE FAASALAGA A MOIMOI TUALAULELEI

 

O le aso 11 Iuni lea ua toe tolopo i ai le lauina o le faasalaga a le alii o Moimoi Tualaulelei, ina ua talia e le Faamasinoga Maualuga se talosaga na faaulu e lana loia fautua o Mike White, mo se avanoa e toe tolopo ai lenei mataupu mo se isi 3 vaiaso, ona e i ai ni isi o molimau a le latou itu o lo o malaga i fafo ma le atunuu e mana’omia le fesiligia, ao le’i oo i le aso e lau ai le faasalaga.

 

O Tualaulelei na ta’usala e le faamasinoga maualuga i le mataupu lea na ia faaoolima ai i se alii i Pago Pago i le masina o Fepuari 2013, sosoo ai ma lona alu ma ave le ato a lea alii ma tia’i i se kalone lapisi i luma o se faleoloa i Pago Pago lava.

 

O lo o taofia pea le ua molia i le toese e faatali ai le aso lea ua faatulaga e lau ai lona faasalaga.

 

FIU LE LOIA E SAILI LE FAILA A JAMES FITIAO

 

Na avea le le maua e le alii loia ia Mike White o le faila a le alii o James Fitiao o lo o ia fautuaina ma itu na ia talosagaina ai loa le faamasinoga ina ia tolopo le mataupu a le ua molia mo se isi 3 vaiaso, ae se’i tau saili le faila a le ua molia.

 

Na faailoa e White i le faamasinoga ananafi e faapea, ua toeititi lava mae’a talanoaga o lo o faia ma le malo mo se maliliega aufaatasi e faamuta ai le mataupu a le ua molia, ma e i ai lona talitonuga e talafeagai lelei lava ma le isi tolu vaiaso.

 

Ua sauni le loia a le malo ia Julie Pasquale na te tuuina atu se isi kopi o le faila a le ua molia i lana loia.

 

O Fitiao o lo o tuuaia i le faia o uiga mataga i ni tamaitai se to’alua e laiti i lalo o le tulafono, ma o lo o taofia pea le ua molia i le toese i Tafuna e faatali ai le aso 21 Iuni lea ua faatulaga e toe valaau ai lana mataupu i luma o le faamasinoga.