Ads by Google Ads by Google

Tala otooto o Fa’amasinoga

NOFOVAAVAAIA LE ALII MAI MANU’A MO LE 5 TAUSAGA

 

O le ali’i mai Manu’a lea na ta’usala e le fa’amasinoga i le solitulafono mamafa o lona umia fa’asolitulafono lea o vaega o le laau fa’asaina o le mariuana, ua tatala nei o ia i tua mai le toese i Tafuna, ina ua finagalo le fa’amasinoga e nofovaavaaia o ia mo le 5 tausaga, ae ua lava le umi lea na taofia ai o ia i le falepuipui a o fa’agasolo ai lana mataupu, e avea ma ana fa’asalaga i le solitulafono sa ia faia.

 

Na vaaia le fiafia o le ali’i o Joshua Filoiali’i ina ua fofoga aloaia e le afioga i le ali’i fa’amasino sili lagolago ia Lyle L. Richmond lana fa’aiuga i le vaiaso nei, ma manino mai ai le toe fa’asa’olotoina o ia mai le falepuipui.

 

A o le i tu’uina atu le fa’asalaga a le fa’amasinoga mo Filoiali’i, na fa’atoese o ia e tusa ai o lana solitulafono sa faia, ma ia talosagaina ai se isi avanoa mo ia, se’i fo’i ai i tua i lona aiga e toe fa’aauau lana aoga, ma saili se isi lumana’i lelei mo ia.

 

Na tutu fa’atasi loia a le malo atoa ai ma le loia sa tula’i mo Filoiali’i ia Michael White, e talosaga i le fa’amasinoga e fa’asala le ua molia i se fa’asalaga fa’anofovaavaaia, ina ia mafai ai ona maua se isi avanoa mo ia e toe fuata’i ai lona olaga.

 

Na taua e White i le fa’amasinoga e fa’apea, o le tele o taimi la te talanoa ai ma Filoiali’i a o taofia ai o ia i le toese, na te fa’ailoa atu ai lava lona salamo moni e tusa ai o lana solitulafono sa faia.

 

Saunoa Richmond e fa’apea, o lenei ali’i talavou, sa avea le sese o le fa’aiuga sa ia faia ma itu na a’afia ai o ia i le tulafono, ma mafua ai loa ona taofia o ia i le toese mo le silia i le 4 masina.

 

O le mea sa tupu e pei ona saunoa Richmond, o Filoiali’i na malaga mai i le va’a o le MV Sili mai Manu’a e aga’i mai i Tutuila nei i le aso 4 Ianuari 2015, ae tula’i mai ai loa le fa’alavelave e pei ona ta’usala ai o ia e le fa’amasinoga, ina ua maua ia te ia se afifi mariuana i totonu o lana ato fa’afafa sa fai.

 

O ni isi o tuutuuga o le nofovaavaaia a Filoiali’i e aofia ai lona totogiina o le salatupe e $2,000 i totonu o le ulua’i 18 masina o lana nofovaavaaia, fa’asa ona ia toe umia ni fualaau fa’asaina, fa’asa fo’i ona ia toe soliina se isi tulafono a le malo.

 

TALOSAGA SE TINA I LE FA’AMASINOGA

 

Ua taoto atu nei i se fa’aiuga a le fa’amasinoga maualuga le talosaga na fa’aulu e se tina e 38 tausaga le matua, mo se avanoa e fa’aitiitia ai le tupe ua mae’a ona fa’atulaga e tatala ai o ia i tua mai le toese i Tafuna, mai le $20,000 o lo o i ai i le $10,000.

 

Na taua e le tina o lo o tu’uaia o Carmen Galumalemana i lana talosaga e fa’apea, o le fa’aitiitia e le fa’amasinoga o le tupe e tatala ai o ia i tua, o le a mafai ai ona ia totogiina lea tupe, ma mafuta atu ai i lona aiga e fa’atalitali ai taualumaga o lana mataupu.

 

O lo o tu’uaia e le malo ia Galumalemana i moliaga e lima, lea e aofia ai moliaga mamafa e fa e pei o le faiaiga ma se tamaititi e laititi i lalo o le tulafono, tagofia o itutinosa o se ali’i e talavou i lalo o le tulafono, faia o uiga mataga, atoa ai ma le faia o amioga fa’asotoma, ma le moliaga mama e tasi o lona faia o ni gaioiga e ono lamatia ai le saogalemu o fanau e laiti i lalo o le tulafono.

 

NOFOVAAVAAIA LE ALI’I NA TA’USALA I LE FA’AO’OLIMA

 

O le ali’i talavou e 20 tausaga le matua lea na ta’usala e le fa’amasinoga fa’aitumalo i le moliaga o le fa’ao’olima i le tulaga tolu, ua nofovaavaaia o ia mo le 12 masina i lalo o tuutuuga e ao ona ia usita’i i ai.

 

O ni isi o tuutuuga o le nofovaavaia a le ali’i o Eric Talamaivanu o Tafuna e aofia ai le alu e fa’atoese i le ali’i sa ia fa’aoolima i ai, totogi le salatupe e $175, auai i ni aoaoga e fesoasoani ai i le tulaga o le ita, ma ua fa’asa ona ia toe tagofia le ava malosi.

 

Ua manatu fo’i le fa’amasinoga, ua lava po e 3 na taofia ai le ua molia i le toese, e avea ma ana fa’asalaga i lenei mataupu, ae o le a fa’amalumalu lona tuliina o aso e 30 sa manatu le fa’amasinoga e fa’asala ai o ia.

 

O Talamaivanu na taofia mai e leoleo i le masina na te’a nei i le fale kalapu o le Bowling Alley, ina ua ripotia lona fa’ao’olina isi ali’i fafo o le fale kalapu, e mafua mai i se feeseeseaiga na tula’i mai i totonu o le fale kalapu, ma i’u ina tu’i ai e le ua molia le ali’i na a’afia ma manu’a ai lona auva.