ERIC NAIULI

Ua talia e le fa’amasinoga maualuga se talosaga na faila e le itu a le malo, ina ia solofua ulua’i moliaga na latou tu’uaia ai le susuga a Eric Naiuli, i le mae’a ai lea ona toe faia e le malo o se suiga i le pepa o tagi na latou ulua’i fa’aulu fa’asaga i le ua molia.

Na fa’ailoa e le loia a le malo ia Tony Graf i le fa’amasinoga maualuga, o le ripoti mai le falema’i e tusa ai o le fa’aiuga sa faia e saili ai le mafua’aga o le maliu o le ali’i na a’afia, na manatu ai loa le malo e tatau ona fai se suiga i le pepa o le tagi na ulua’i fa’aulu fa’asaga ia Naiuli.

Ina ua fa’atoa tula’i mai le mataupu fa’asaga ia Naiuli, e mafua mai i le fa’alavelave lea o lo o tu’uaia ai o ia i le maliu o se ali’i mai Afono i le amataga o le tausaga nei, na tuuaia ai loa e le malo le ua molia i le moliaga mamafa o le fa’ao’olima i le tulaga lua, peita’i o le masina na te’a nei na toe faila ai e le malo le isi moliaga fou fa’asaga i le ali’i ua molia, le moliaga o le fa’atamala fa’aletulafono ua mafua ai ona o o le maliu i se isi tagata.

I le mae’a ai o le iloiloga, na talia ai loa e le faamasinoga le solofua o le moliaga o le faaoolima i le tulaga lua, ae molia loa o ia i le moliaga fou o le fa’atamala fa’aletulafono ua mafua ai ona o o le maliu i se isi tagata.

ARONA AMITUANA’I

O ananafi na faila ai e le malo moliaga fa’aopoopo fa’asaga ia Arona Amituana’i, ona o le fa’alavelave lea ua tuuaia ai o ia i lona fa’aoolima lea i se ali’i leoleo, atoa ai ma lona tete’e atu i leoleo a o taumafai e pu’e fa’apagota o ia.

O moliaga fa’aopoopo ua tuuaia ai Amituana’i e aofia ai le moliaga mamafa o le tete’e atu i leoleo a o taumafai e pu’e fa’apagota o ia, faapea ai moliaga mama e lua o le faaoolima i le tulaga tolu ma le faatupu vevesi i nofoaga faitele.

E ese mai i le mataupu fou lea ua faila e le malo fa’asaga ia Amituana’i, o lo o i ai fo’i le isi mataupu o lo o tuuaia ai o ia i le malo, ona o le faalavelave lea na tulai mai i Pago Pago i le tausaga na te’a nei, ina ua ia osofa’i se tama matua e ala i lona fa’aaogaina o se naifi.

I lea mataupu, o lo o tuuaia ai o ia i moliaga o le talepe fale i le tulaga muamua, faaoolima i le tulaga lua, faaoolima i le tulaga tolu, faaleaga meatotino i le tulaga tolu atoa ai ma le faatupu vevesi i nofoaga faitele.

O lo o taofia pea i le toese ia Amituana’i se’i vagana ua ia totogi le tupe e $30,000 lea ua fa’atulaga e totogi ona fa’atoa mafai lea ona tatala o ia i tua.

BILLY TUSI

Ua toe tolopo i le aso 27 Aokuso le iloiloga sa fa’atulaga e le fa’amasinoga maualuga mo le mataupu a le ali’i talavou o Billy Tusi, ina ua talia le talosaga a lana loia fautua, mo se avanoa e toe tolopo ai le iloiloga o lenei mataupu, ae maua ai le avanoa o Tusi e saili ai sana galuega, e totogi ai se isi vaega o le tupe lea na poloa’i o ia e le fa’amasinoga e totogi.

O se tasi o tuutuuga o le nofovaavaaia a Tusi ina ua tausala o ia i le mataupu lea na la fa’aleagaina ai ma se isi ali’i masini fai auala a le kamupani a le McConnell Dowell i Aua i le tausaga na te’a nei, o lona totogi lea o le tupe e $2,600 aga’i i le kamupani a le McConnell Dowell.

Na fa’ailoa e le afioga i le fa’amasinoga sili ia Michael Kruse ia Tusi i le vaiaso na te’a nei, e taua tele lona usitaia o tuutuuga o lana nofovaavaaia, e aofia ai ma lona totogi o le tupe ua poloaina o ia e totogi, afai e leai, e ono taofia o ia i le toese.