LATA I LE TO’A 5,000 UA MALILIU I LE ‘EBOLA’

Aferika i Saute - E tusa ma le 4,800 le aofa’i o tagata mai atunuu eseese o Aferika i Saute ua fa’amaonia mai e le Ofisa o le Soifua Maloloina o le lalolagi (WHO), le maliliu i le fa’ama’i oti o le ‘Ebola’, ma le to’a 9,900 ua fa’amaonia le a’afia ai i ‘auga o lenei fa’ama’i. A o vavao ai atunuu eseese o le lalolagi i le tau togafitia o lenei gasegase, ua fa’amaonia mai e le Palemia o le malo o Ausetalia e fa’apea, e le mafai ona auina atu ni sui mai lona atunuu e galulue mo le ofoina atu o fesoasoani i vaega o Aferika o lo o a’afia i lenei ma’i.

Suva, Fiji - MOLIA SE ALI’I TUSITALA I FITI

O se ali’i tusitala e galue i se tasi o Fale Televise Fa’asalalau i Fiti, ua molia nei o ia i luma o le fa’amasinoga i lona a’afia ai i le mataupu e feso’ota’i ma le fa’alavelave lea na maliu ai se tamaititi e 12 tausaga le matua i le nuu o Nabouciwa i le 7 tausaga talu ai. O lo o tuuaiga faasaga le alii tusitala o Apisalome Rabo ma ni alii se to’alua, lea o lo o tuuaia i moliaga o le auau fa’atasi e fa’atino se solitulafono e fesootai ma le maliu o lenei alualu toto.

Denver, USA - SOSOLA MA LE VASEGA ONA O LE FIA AVEA MA SUI O LE ‘ISIS’

E to’atolu ni tamaitai aoga mai le setete o Denver na sosola ese ma le latou potu aoga ona o le naunau e fia avea i latou ma totino o le vaega fa’atupu fa’alavelave o le ISIS i totonu o Suria, e pei ona fa’amaonia mai i ni ripoti mai Amerika i le vaiaso nei. Na fa’ailoa e matua o tamaitai nei e to’atolu i leoleo ma le FBI, e masalomia ua agai atu nei tamaitai nei i le atunuu o Turkey ma le fa’amoemoe e fia avea i latou ma totino o le vaega fa’alavelave a le ‘ISIS’. Na ona maua lava e le FBI o fa’amatalaga uma nei, amata loa a latou sailiga ma mafai ai ona taofia mai tamaitai nei e to’atolu mai le malae va’alele i Frankfurt ma toe fa’afo’i mai ai i latou i Amerika. Ina ua fesiligia e le FBI i latou nei, sa faamaonia ai e le isi to’alua lo la faanaunauga sa i ai e fia avea i laua ma fitafita mo le ISIS. E to’atasi le tamaitai e 17 tausaga le matua ae o le isi to’alua e ta’i 15 tausaga le matutua, na fananau i Amerika ae tupuga mai i tagata Suesilani.

Kalefonia, USA - TO’AFA MOLIA I LE FASI MATEINA O MOA E 920

E to’afa ni ali’i ua taofia nei e leoleo i Kalefonia i le vaiaso i le falepuipui, ina ua fa’amaonia lo latou aafia ai i le fa’alavelave lea na osofaia ai se faatoaga moa mai se tasi o lafu manu tele i totonu o le setete, ma fasi mate ai moa e 920, e pei ona faamaonia mai i faamaumauga a le ofisa o leoleo. O i latou e to’afa ua molia e aofia ai ni ali’i se to’alua e ta’i 17 tausaga le matutua, ma le isi to’alua e ta’i 15 tausaga le matutua. O lo o tu’uaia i latou nei i lo latou ulufale fa’amalosi i totonu o le nofoaga o lo o tausi ai moa i le faatoaga ma fasi mate nei meaola.  O lo o molia i latou e le malo i moliaga mamafa e aofia ai fa’aleaga meatotino faapea ai ma le gaoi.

NY, USA - $1 MILIONA LE TAU O LE ISU

O se tina tausi aiga e le i i’u lelei ana aoga i aoga kolisi i se vaega o Amerika , ae ua avea nei o ia ma tina milionea ina ua mafai ona ia fa’ailoa ituaiga fagu fa’amanogi e sili ona anagata mo tamaitai e ala i lona faaaogaina o lona isu sa fai ai sona taotoga, ma i’u ina o o atu ai i le ta’i $1 miliona le aofai o tupe e fa’aalu e tamaitai e fa’atau ai fagu manogi mai lana pisinisi fai fagu manogi. Na taua e le fafine o Jo Malone i tusitala e fa’apea, atonu e le mafai ona ia tusia se tusi i lona lima ona e le i maea lana aoga, ae mafai ona ia ofoina atu se meaalofa sili mo se tasi e ala i le meaalofa o le sogisogi o lona isu.