Ads by Google Ads by Google

TALA O LE VAIFANUA

FETUFA’I FAUFAUTUA A’OGA TULAGA MUAMUA

 

Ua suia fo’i le fa’amamafa mo le vasega o Faufautua fa’apitoa mo le fanau a’oga i totonu o A’oga Tulaga Lua ma fa’asolo atu ai fo’i i a’oga maualuluga i totonu o le teritori i lenei tausaga a’oga.

 

O le suiga, “Ia mafai ona outou fautuaina le fanau ina ia maua e i latou se a’oa’oga lelei mai ni mea sese sa latou faia a’o i ai i le taimi o a’oga i lo latou va ma isi tamaiti po’o le va fo’i ma faia’oga!”

 

O le tagi a le fanau ua latou faia ni mea sese e fa’apea, “Ua ou iloa e le o sa’o le mea ua ou faia, pe mafai ona tu’u mai se avanoa, e a’oa’oina ai a’u ona o a’u mea sese sa fai?” O le agaga lea ua fa’amamafa nei i le a’otauina o Faufautua fa’apitoa mo a’oga uma lava i a’oga tulaga lua i totonu o le teritori, ma sa faia lea semina i le potu fono o le Ofisa o Palotaga tuai i Utulei.

 

O nisi sa fa’atautaia nei kosi mo le ‘au faufautua, e aofia ai le tama’ita’i taiulu o lea Ofisa, Maria Tuato’o, Senovefa Gogo ma Fa’auisa Opa Sotoa.

 

“O se fitaituga lea o lo’o i ai le fanau, ae ua fa’asaga i latou ina maua agaga o fanau a’oga uma lava i so’o se taimi, o lou faitoto’a ia matala i taimi uma, mo fanau uma e mo’omia sau fa’amalosi’au.” O se tima’i lea a le tama’ita’i faia’oga i lea kosi, Senovefa Gogo.

 

FAALETONU I LUGA MAUGA ALAVA, AAFIA AI KVZK-TV

 

O le aso ananafi na fuafua e faia ai galuega i fale o lo o auala mai ai faasalalauga a le Matagaluega o Fesootaiga (KVZK-TV) lea o lo o i luga o le Mauga Alava, ina ua tula’i mai ai se faaletonu i le po o le Aso Faraile na se’i mavae atu.

 

Ae peitai, e o’o mai lava i le afiafi ananafi, o lo o a’afia lava fa’asalalauga a le KVZK-TV ma le mafai ai ona ola mai alaata 2 ma le 5.  Ua toatele ni isi o le atunuu ua fa’aalia lo latou le fiafia ona ua le mafai ona matamata polokalama masani i le faaiuga o vaiaso, e aofia ai ma le polokalama o Sauniga Lotu lea e masani ona fa’asalalau i afiafi o Aso Sa.

 

O lo o ia pea se faamoemoega maualuga i le Faatonusili o le Ofisa o Fesootaiga, le tofa Fagafaga Daniel Langkilde, e o’o atu i le Aso To’onai ua toe ola mai le KVZK aua faasalalauga o le polokalama mo le faamanatuga o le 50 tausaga a le StarKist lea e faia i le Veterans Memorial Stadium.

 

A’OGA TUI TEU - DYWA

 

O lo ua fa’asalalauina fo’i le isi a’oa’oga fa’apitoa o le a amatalia i le aso 20 Aukuso, 2013 i le itula 9:00 i le taeao mo le tolu vaiaso. E ta’i lua aso o le vaiaso e faia ai lenei a’oga lelei mo Tama’ita’i ma Tina ina ia agava’a i latou i lea fo’i taleni aoga, e fa’amatagofie ai maota ma laoa, ae maise malumalu o le Atua i taimi o sauniga fai.

 

O le Falepalota tuai i Utulei lua fa’amautu mai e fa’atautaia ai nei vasega.

 

VAEGA TUPE TAUTUA O TAGATA AFAINA TUMAU - TINO & MAFAUFAU

 

Lea ua fa’alauiloa mai e le Matagaluega ASDDP - Ofisa e fa’auluulu i ai tautua eseese mo i latou uma o i ai afaina tumau o le tino ma le mafaufau, ua tatau ona fa’aulu uma atu talosaga mo vaega tupe mai le latou Ofisa e fa’atupeina ai a latou auaunaga pe afai o latou fa’afaigaluegaina ma fela’ua’i fo’i i latou o lo’o ua i ai afaina tumau i le tino ma le mafaufau.

 

O nisi fo’i o Nofoaga e Tausia ai fanau o lo’o latou tausia fanau fa’apea e agava’a fo’i i latou e fa’aulu latou talosaga. E o’o fo’i i a’oga o lo’o latou a’oa’oina fanau fa’apenei, ua agava’a fo’i i latou e talosaga mai, ma ua tatau ona fa’auia le latou ofisa i nei talosaga i le Ofisa autu i Utulei, Fale Palota tuai fogafale lua.