Ads by Google Ads by Google

Tala o Faamasinoga

DANNY MASE

Ua sauni nei le fa’amasinoga e tu’uina atu le fa’asalaga o Danny Mase, lea na molia i le moliaga mamafa o le fa’ao’olima i le tulaga lua, i lalo o se maliliega ua ia faia ma le malo.

Ae o se tasi o mataupu o lo o soalaupule nei e lana loia ma le malo, o le aofa’i o le tupe e tatau ona totogi e Mase i le pepe na a’afia i lenei fa’alavelave fa’apea le tau e toe fa’aleleia ai le ta’avale sa fa’aleagaina.

I fa’amaumauga a le faamasinoga o lo o taua ai e faapea, i se taimi o le masina o Oketopa 2011, a’o fa’asuaava Mase, sa ia togi ai se atigi fagu i luga o le alatele, ae fetaui ma le taunu’u atu o se ta’avale, ma tau ai le fagu i le tioata o le ta’avale ma nuti ai ma a’afia ai foliga o se ‘alu’alutoto na i totonu o le ta’avale.

Na fa’ailoa e Mase i le fa’amasinoga e fa’apea, o le gaioiga sa ia faia na te lei faia ma sona manatu e fa’atupu ai ni manu’a i lea alualutoto.

AARON WISDOM

O le taeao ananafi, na toe faila ai e le malo moliaga na fa’asolofua e le Fa’amasinoga Fa’aitumalo i le Aso Gafua, lea na faia fa’asaga ia Aaron Wisdom.  O nei tu’ua’iga o lo o aofia ai le umia fa’asolitulafono o mariuana, fana ma pulufane.

O moliaga fa’asaga ia Wisdom na afua mai ina ua maua e alii suesue o le Ofisa o Tiute ni fagu siamu i totonu o se ‘container’ a Wisdom, o lo o aumai fa’anana ai mariuana. Sa maua ai foi i totonu o le container ni fana se tolu ma ni pusa pulufana.

Ua toe taofia nei Wisdom i lalo o le va’ava’aiga a le malo, sei vagana ua ia totogia le $20,000.

SAULELE SIUA

O le alii talavou lea na fa’amoemoe e amataina i le taeao ananafi lana fa’amasinoga autu, ua le fa’ataunuuina lea fa’amasinoga ina ua ia sainia se maliliega ma le malo, lea foi ua talia e le Fa’amasinoga Maualuga.

Na tu’ua’ia Sausaulele Siua i le ave fa’amalosia o se tagata, fa’aolima i le utlaga lua, ma le fa’atupu vevesi i nofoaga faitele.  Ae i se maliliega ua faia ma le malo, ua ioe ai Siua i le na o le moliaga o le fa’ao’olima i le tulaga lua.

Ina ua fesiligia e le fa’amasinoga le ua molia e tusa ai o le fa’alavelave lea na tulai mai i le masina o Aperila o le tausaga na tea nei, sa ia taua ai e fa’apea, o lona toe fo’i atu mai i se pati o se fa’aipoipoga, na togi ai e se tagata lana ta’avale i se ma’a.

Na taua e le ua molia, na ia oso i fafo ma lana ta’avale, ma savali sa’o atu lava i le tu’i le tama’ita’i lea na a’afia, ma le lilo i lona manatu o lo o i ai i lona lima le ki o le taavale.

I vaega o le maliliega o lo o taua ai e faapea, ua malilie loia o le a tuuina atu ni a laua faafinauga i le faamasinoga mo se faasalaga  mama mo Siua, peitai ua malamalama Siua ma ia iloa, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena.

Ua ia iloa foi, o lo o i ai i le faamasinoga le malosi e faasala atu ai o ia i soo se faasalaga e manatu le faamasinoga e talafeagai ma le solitulafono sa ia faia, ma e le mafai ona toe suia lana tali ioe ua tuuina atu pe afai e tuuina mai se faasalaga a le faamasinoga ae le tusa ai ma lona manao.

O lo o tumau pea poloaiga o loo tatala ai Siua i tua ina ua ia totogia o le $15,000 sa faatulaga e le faamasinoga, e fa’atali ai le aso 23 Fepuari lea e lau ai lana fa’asalaga.