Ads by Google Ads by Google

Tala o Faamasinoga

TETE’E

O le aso 19 Novema lea ua faatulaga e fofogaina ai le ulua’i iloiloga o le mataupu a le tamaitai o lo o tuuaia i lona faaaogaina o tupe sa totogi mo inisiua, ina ua ia teena tuuaiga a le malo i luma o le Faamasinoga Maualuga i le vaiaso na te’a nei.

O Katerina Siliga lea sa galue i le kamupani Inisiua a le South Seas Insurance, o lo o tu’uaia i le moliaga e tasi o lona faaaoga faasolitulafono o tupe sa totogi atu mo le inisiua a se ulugalii o lo o aumau i Savai’i i le taimi nei.

O le mataupu lenei na tofu i leoleo ina ua ua faila e se au uso le la tagi faasaga ia Siliga, ona o tupe mo le inisiua a la matua sa totogi i le ua molia peitai e le o maua i faamaumauga a le kamupani.

Ina ua fesiligia e leoleo le ua molia e uiga i lenei mataupu, sa ia tautino i leoleo ua ia faaaogaina le tupe lea na totogi atu i le va o Novema 2011 ma Iuni 2012.

Na faailoa foi e Siliga i leoleo lona sauni e toe totogi uma le tupe sa ia faaaogaina. O lo o taofia pea i le toese le ua molia sei vagana ua totogi le $7,500 ona faatoa mafai lea ona tatala o ia i tua.

REYNO ESERA

O le aso 29 Oketopa lea ua toe tolopo i ai le mataupu a le alii ave pasi, lea o lo o tuuaia i lona faafoeina o le pasi lea na maliu ai se tama matua e 72 tausaga i Nuuuli i le masina o Aokuso, ina ua talia e le faamasinoga maualuga le talosaga na faaulu e lana loia fautua o Michael White, mo se avanoa e toe tolopo ai lana uluai iloiloga na fuafufa e faia ananafi, ona o lea ua toeititi lava maea feutanaiga o lo o faia ma le malo, mo le sainia o se maliliega e faamuta ai lenei mataupu.

O Reyno Esera o lo o tuuaia i le moliaga mamafa e tasi o lona faafoeina o se taavale na maliu ai se tagata, atoa ai ma isi moliaga laiti i luga o le alatele.

O le taeao o le aso 25 Aokuso a’o le’i taina le itula e 6:00 i le taeao, o lo o tu’uaia e le malo na so’a ai e le pasi a Esera le tama na maliu i luma o le CBT i Nuuuli, ma auina atu ai o ia i le falemai i Fagaalu, ma maliu ai i ni nai minute mulimuli ane ai.

O lo o taofia pea Esera i le toese i Tafuna ina ua le mafai ona ia totogiina le $15,000 na faatulaga e tatala ai o ia i tua.

TETE’E CHELLETTE METULI I TUUAIGA MALO

O le tina talavou lea o lo o tuuaia i lona faaaoga faasolitulafono o se credit card e totogi ai pasese o le vaalele a ana uo, ua ia teena moliaga o lo o tuuaia ai o ia e le malo ina ua tulai i luma o le faamasinoga maualuga i le vaiaso na te’a nei.

E fa moliaga o lo o tuuaia ai e le malo ia Chellette Foster Metuli, ma o ia moliaga e aofia ai moliaga e lua o le gaoi faapea ai moliagta e lua o lona faaaoga faasolitulafono o se credit card.

O lenei mataupu na tofu atu i le ofisa o leoleo ina ua vaaia e Helen Mi Sook Save ni taumafaiga se lua e aveese mai ai se tinoitupe mai totonu o lana teugatupe i le Faletupe a Hawaii, ae ina ua ia e Helen le ua molia e uiga i lenei mataupu, na faamaonia ai e Metuli ia Helen lona faaaogaina o lana credit card e totogi ai pasese.

Na faailoa e Metuli i leoleo e faapea, sa tuu atu e sana uo le $1,500 mo pasese a ni tagata se toalua i le vaalele, peitai e lei iloa poo ai na aveeseina le tupe mai totonu o lana ato, o lea na ia faaaogaina ai loa le credit card a Helen e totogi ai pasese.

E $1,853.40 le tupe na aveese mai i le teugatupe a Helen e totogi ai pasese a Jazmine Ape ma Paulo Akeni e pei ona taua i faamaumauga a le faamasinoga.

Ua tatala i tua Metuli ina ua ia totogi le $8,500 na faatulaga e le faamasinoga i lalo o tuutuuga e ao ona ia usita’i i ai. O nisi o ia tuutuuga e aofia ai le faasa lea ona ia toe taumafai e faafesootai molimau a le malo, aemaise ai le tamaitai e ana le credit card o lo o tuuaia ai o ia.