TEENA E TUILAEPA FAAMATA’U I LE SOLO A FAIAOGA

Ua teena e le afioga i le alii palemia, le susuga Tuilaepa Sailele Malielegaoi, le ono faatupulaia o le fuainumera o faiaoga e malaga atu i Amerika Samoa e galulue ai ona o le lelei o totogi. Na saunoa Tuilaepa i felafolafoaiga a le Palemene e faapea, e leai se mea o le faapopoleina ai fua. Na ia fautuaina foi le taitai o le Itu Agai, le afioga Palusalue Faapo II, ina ia aua nei popole ma faamata’uina o ia ona o le vaega muamua o faiaoga ua galulue nei i Amerika Samoa.

O lana tali atu lea i se fesili mai sui o le vaega faaupufai o le Tautua Samoa, pe le o popole le malo i le amata agai atu o faiaoga i le Teritori e galulue ai ona o le lelei o totogi ma isi faamanuiaga. Na talosagaina foi e Palusalue se tala lata mai i fuafuaga a le malo e sii totogi o faiaoga. Peitai na tali le alii palemia, e aua le faamata’uina i latou i le gasolo o faiaoga i Amerika Samoa, ma na ia faaopopo, e le tatau ona taumafai se tasi e taofia ia faiaoga.

“O le aia tatau lava a le tagata ia e fai ai lana filifiliga e malaga ai pe afai e fiafia i le galue i le Teritori ona o le lelei o totogi,” o a Tuilaepa lea. Fai mai a ia, o le mea e tatau ona faia, o le toe iloilo lelei lea e le komiti o totogi a tagata faigaluega a le malo, ia totogi o faiaoga, e ala i le mata’itu ma le totoa o tulaga uma e ao ai ona sii totogi. Na ia toe faamanatu e faapea, so o se siitaga lava o totogi, e i ai lava manatu o tagata e faia i ai, ma sa ia faamanatu le tele o faafitauli ina ua sii totogi o tagata faigaluega a le malo i le 40 pasene i le 2006, 2007 ma le 2008. E le gata i lea, o le mafuaaga foi lea o le solo tetee tele o le 1981. “E le faapea o le aumai lava o lea fautuaga, oso le malo e faatino,” o Tuilaeoa lea. “Leai, e muamua fua i luma fua i tua.”

PULE SE ALII TALAVOU I LONA OLA

O se alii e 19 tausaga e faigaluega i se tasi o faletupe i Apia, le tagata aupito i lata mai ua pule i lona ola ma ua faatupulaia ai pea le aofaiga o i latou ua pule i o latou ola i lenei tausaga. Na lipotia mai e leoleo e faapea, sa totogi e lea alii se potu i se faletalimalo i Fugalei i le aso 21 o Oketopa.

O le aso na sosoo ai na taunuu atu ai lana uo tamaitai ma agai atu loa i le potu. Peitai, sa loka le potu ma sa ia toe foi atu loa I le pulega o le faletalimalo ma talosagaina se isi ki e tatala ai le potu. Ina ua matala le potu, sa ia ulufale atu ma maua ai le tino maliu o lana uo. Na faaalia e le sui komesina o leoleo, le susuga Misa Nafo’i Fotuitaua Tala’imanu Keti e faapea, na faaaoga e lea alii se ieafu e sisi ai lona ua. Na faaalia e Misa, e I ai mafuaaga na pule ai lea alii I lona ola ma o lo o faaauau a latou suesuega.

MOLIA I LE FASIOTI TAGATA FAAMOEMOEINA

Ua molia e leoleo se alii e 21 tausaga mai le afioaga o Fogapoa i Savaii i le fasioti tagata faamoemoeina, ona o le maliu o le tamaitai e 23 tausaga lea na maliu i totonu o le fale na mu i Nu’u i le lua vaiaso talu ai. Na faamaonia mai lea tulaga e le sui komesina o leoleo, le susuga Misa Nafo’i Fotuitaua Tala’imanu Keti, ma na ia taua foi e faapea, e aiga le ua maliu ma le ua molia.

Na saunoa Misa, e le faalauiloaina le igoa o lea alii ae e fai si ma’ale’ale o a latou suesuega ma e ono faaopopoina moliaga e faaulu faasaga i lea alii. O lo o masalomia e leoleo na susunu lava e lea alii le fale. Na faaalia e le sui komesina e faapea, e lei logoina e lea alii le vaega a le Tinei Mu o lo o i ai se isi i totonu o le fale. Faatoa logo lava e lea alii le au fuimu ina ua matua sosolo le afi ma ua tuai ona toe faia se gaioiga e laveai le tamaitai na maliu. Na o i laua lava sa i ai i le fale i le taimi na tupu ai le faalavelave. O le ua maliu sa galue i se kamupani su’etusi I Apia. O lo o taofia nei e leoleo le ua molia ma o le a tulai o ia i luma o le Faamasinoga i le vaiaso fou.

FAAULU E LEOLEO MOLIAGA I LE ALII PULE LE UMA

O le a toe oo i le Faamasinoga se alii ua faaleaogaina moliaga o le faia o uiga mataga faafeusuaiga i se teineititi e lima tausaga, pe a maea ona faamautu e leoleo a latou moliaga fou o le a faaulu. O lea alii o Asotasi Vaa Falealii ma na faaleaoga e Faamasino Vui Clarence Nelson faasaga ia te ia i lona faaoolima mataga i le teineititi i le tausaga na te’a nei.

O lea teineititi o le grand-daughter o le tausoga a le na molia. Na teena e lea teineititi ia tuuaiga faasaga ia Falealii ina ua suesueina lea mataupu i le Faamasinoga, lea na faaleaoga ai e Faamasino Vui moliaga faasaga ia Falealii. Peitai, ina ua musu lea teineititi e toe foi i lona tina, sa tuuina atu ai loa o ia e leoleo i lalo o le vaavaaiga a le Toomaga mo e Puapuagatia. Sa faamatala e lea teineititi i le pulega o le Toomaga mafuaaga ua le toe fia alu ai i lo latou aiga, ma ina ua talosagaina e le Toomaga le Faamasinoga le faatagaga e vaaia ai lea teineititi, sa faaulu le faasea a matua o lea teineititi ma sa amata mai ai loa le mugafalo mo le aia tausia ai lea teineititi. I le Faamasinoga o Aiga, sa molimau le tuafafine o Falealii me faapea, e “lama e lona tuagane teineiti laiti” ma sa ia fautuaina malosi le Faamasinoga ina ia aua le toe tuuina atu lea teineititi i ona matua ma le ua molia.

Sa ia faailoa foi i le Faamasinoga ia igoa o ona nieces ma tausoga ua uma ona faia i ai e le ua molia ia faiga mataga faafeusuaiga. E le gata i lea, e toalima lana fanau i lona lava afafine moni o lo o i Amerika. O lea molimau ua toe fa’aauau ai loa lea mataupu i le Faamasinoga.

Saunia: Lilomaiava Andrew Fa’asau, Naenae Productions