Vaiaso mo le Aufaigaluega Kolisi Tu’ufa’atasi

O le aso Faraile talu ai, sa fa’atasia uma ai le mamalu o le aufaigaluega a le Kolisi Tu’ufa’atasi e aofia ai ma le Aufaigaluega a le Land Grant lea e fa’atautaia A’oa’oga Tau Fa’ato’aga i le eleele fa’apea ma Vailepa, fa’atasi ai ma le vaega a le Folesi, 4H, Consumer & Nutrition Resources, lea e aofia ai ma Vasega o Su’isu’i ma Taumafa Paleni, ina ia fa’ai’uina le latou vaiaso fa’apitoa sa fa’ataua ai i latou ta’ito’atasi ma o latou sao i le fa’ataunu’uina o tiute fai i aso ta’itasi i totonu o le kolisi.

“E taua outou taito’atasi ma lou sao i la tatou galuega fai fa’atasi, aua a le faia se tiute o se tasi, e i ai se isi o le a tigaina e fa’atino ia tiute ua misi ona fai. O lou fa’atinoa fo’i o ou tiute i le taimi e mo’omia ona mae’a faia ai, o se isi lea matati’a mo’omia i taimi uma i latou galuega ma le auaunaga i le Kolisi, ae a le a’oa’oina o fanau.” O se saunoaga lea a Dr. Seth Galea’i, peresetene o le Kolisi Tu’ufa’atasi o Amerika Samoa.

A’o le’i amatalia fiafia, ta’aloga ma fa’amalositino ae maise le tauvaga Tausala ma le Manaia a le aufaigaluega,  sa mua’i ona fa’ailoa le agaga fa’afetai o Galea’i, fa’apea ma le Fa’atonu o le Land Grant Taupa’au Dr. Dan Aga e tusa o le fa’atinoga o galuega o le tausaga ua tuana’i, ae o le mafutaga ua faia, “Ia toe fa’aopoopo atu ai se isi malosi’aga fou ia te oe e tapena au lou sui faigaluega mo tiute fa’atino, ma toe savalia se maila fa’aopoopo i lou agaga fiafia e tautua ma le fa’amaoni i ou tiute ua mae’a tamau i lau feagaiga fa’afaigaluega ua e se’ei ai ma fa’atino i le Kolisi mo lona taui lelei.”

Na tutula’i fo’i le ali’i tino lelei o Ryan Apefa’i Taifane ma faia fa’amalositino lelei mo tina ua fai ‘si lava ma totoe o pauna,’ ma ua va’aia fo’i le to’atele o leoleo o le Kolisi ua auai fa’atasi ai i lea lava vaega, ma sa na tele se afu masa’a fo’i ona o musika sa fa’atino ai fa’amalositino, e le toe lagona ai se vaivai o se tasi.

Na mata’ina le fa’aaliga Manaia ma Tausala, ae maise lava i le paga a le ali’i papalagi Micah Vanderryn ma lana paga Tausala Claire Sagapolutele Toe’ava.

“A i ai ni pine, o le Fusu’aga e faia!”

I le fonotaga a le American Samoa Boxing Federation sa faia i le lua vaiaso talu ai, sa pa’au atu ai le peresetene o le American Samoa National Olympic Committee (ASNOC), Victor Langkilde, ma sana fe’au fa’amalosi’au mo le Asosi Fusu ma ona kalapu fusu eseese o aofia ai.

“Ou te talosaga atu, e mo’omia ni pine mo le tatou atunu’u mai le isi ta’amilosaga fusu fa’avaomalo lea e sauni atu i ai a tatou tama ma teine fusu,” o le saunoaga lea a Langkilde.

Sa ia fa’ailoa manino, “I le matou sailiga i tausaga ua tuana’i, mai Ta’aloga Fa’avaomalo lea e fesoasoani le ASNOC e totogia le auai i ai o tatou fanau tauva, ua iloga mai e tolu lava ta’aloga o mafai ona taliu mai ma ni pine, Fusu’aga, Si’isi’i U’amea Mamafa ma Pi’iga.”

O le ala lea o lona iloa, e tatau ona fa’aleleia atili koleniga, ma fa’aosofia se lagona e fia fesoasoani atili le ASNOC ma le latou fo’i laulau, “Ia mautu le taumafaiga ma avatu tama ma teine ta’a’alo ua agava’a, ua lava tapena e le asosi fusu e tauva mo Amerika Samoa i ta’aloga o le pasefika lea e fa’atautaia i le 2015 i Papua Niu Kini.”

O le tapenaga fa’apitoa a le ASBF ua fa’ailoa mai ai le latou ta’amilsoaga fusu mo tama ma teine talavou e fa’atautaia i le aso To’ana’i ua te’a i le Fale o le VA Tuai i Tafuna.

“O le taimi muamua lenei ua tu’ufa’atasia uma ai Kalapu Fusu a le Teritori, ua aofia mai ma le Kalapu Fusu a le susuga  Toleafoa Henry Tavake i lea ta’amilosaga saili paga, ma e to’alua ana tama fusu ma le tama’ita’i e to’atasi na aumai, ae ua manuia uma taumafaiga a ana tagata fusu ia.” O se tala fiafia mai lea a le eresetena o le ASBF Mapu Jamias.

Na ia fa’ailoa mai, “O lenei taumafaiga, e fa’aauau ai lava koleniga mo le fanau o le a matauina e manumalo pea i paga ta’itasi, ina ia lava kolenia i latou mo le fa’amoemoe i le Oceania Games lea e tapenapena mo Aukilani i Niu Sila, sa tolopoina, ae le’i toe fa’ailoa maia se vaitaimi tonu o lenei tausaga e fa’ao’o ai.”

Ua le gata i lea, ae ua i ai fo’i le ta’amilosaga fusu mo le Sisigafu’a a le tatou malo, lea ua fa’ailoa mai e Langkilde, ua mae’a fa’ataoto le fuafuaga, “E saili siamupini ai so’o se ituaiga o ta’aloga o lo’o aofia i totonu o le ASNOC i lea vaitaimi.” O lona uiga e tofu uma ta’aloga ta’itasi ma latou Ta’amilosaga Saili Siamupini, peita’i, e tauau e aumaia ai se ‘au fusu mai Samoa e fa’afeto’ai fo’i ma tatou tama ma teine fusu filifilia a le tatou malo nei.

Ua fa’ailoa mai e Langkilde, “E le o faia lenei tima’iga na’o le Asosi Fusu, ua fa’amamafa atu ia te outou le naunauta’iga o i ai ina ia toe maua ni pine i le isi vaega o Ta’aloga Fa’avaomalo o tatou auai i ai, ae o lo’o una’ia fo’i isi ta’aloga uma lava. Peita’i, ia sili ona una’ia fusu’aga, si’isi’i u’amea mamafa ma pi’iga, aua e pei o ta’aloga nei, e lautogia muamua lava pine mo e ta’a’alo ta’ito’atasi.”