Ads by Google Ads by Google

Tala i taaloga

UMIA CANELO ALVAREZ FUSI E 3 AUPAGA SUPER MIDDLEWEIGHT

 

E tolu fusi o le aupaga o le middle weight lea ua umia nei e le alii o Saul Canelo Alvarez ina ua fauaina ai Austin Trout i le fusuaga mataina o lenei senituri i le vaiaso na te’a nei. O fusi ua umia e Saul e aofia ai le WBC, WBA ma le fusi o le Ring Magazine.

 

O Saul, ua 21 ona tausaga, e le’i faiaina foi talu mai ana fusuaga e 21 ua maea i le tu’i oti. O le toatele o tagata na matamata e lei talitonu e manumalo Saul i le fusuaga lea, peitai na tetei ina ua auau faamasino e tuu atu le manumalo ia te ia.

 

O le tausaga e 2011 na fusu ai le isi uso o Saul o Rigoberto ma Trout i le aupaga lava lenei ma faatutupa solo ai e Trout lona uso, lea la ua manatu Saul o le avanoa lelei lenei o ia e faatoilalo ai le alii lenei.

 

SAUNI JEROME ROPATI E TAALO MO LE NZ WARRIORS

 

O le alo o Samoa o lo o lagolagoa i le taaloga lakapi liki i Niu Sila ia Jerome Ropati, ua maua lona avanoa e taalo ai mo lana kalapu o le Warriors i le vaiaso nei, ina ua toe malosi mai lona manu’a sa aafia ai i ni nai vaiaso ua mavae atu. O le faalua ai lea ona lavea le tuliva o le alii lenei ao lenei foi ua toe manuia.

 

E faamoemoeina tele le alii lenei i lana kalapu, na amata mai lava ao aoga i totonu o Niu Sila, ma faasolo atu ai lava i kalapu liki tetele i totonu o le atunuu seia oo ina taalo faapolofesa, Ua maitauina e tagata, o tama taalo mai le pasefika e lelei i le lakapi liki e pei o Fiti, e na o le uigi lava le tulaga e tuu i ai aua e saoasaoa, o Tonga e faaaoga i le laina i luma aua e malolosi, ae o Samoa, e le gata e taalo i le laina i luma ae toe taaalo foi i le laina i tua.

 

MALIU LE ISI TOA MANUMANU O FUSUAGA I LE LALOLAGI

 

O le alii o Carl ‘The Truth’ Williams lea foi sa avea ma fetu pupula i le taaloga o le fusuaga i le lalolagi i ona foi vaitaimi, ua faaalia mai ini ripoti ua maliu o ia.

 

Sa i ai Carl i tama fusu pito i luga e toa 10 i le faatulagaina o tama fusu i le paga mamafa a le lalolagi, ma sa ia faatoilaloina nisi o tama fusu iloga e pei o Trevor Berbick, Bert Cooper, Jesse Ferguson ma James Tillis, ae faiaina loa ia Larry Holmes, Tim Weatherspoon, Mike Tyson, Tommy Morrison ma Frank Bruno ma litaea atu ai lava.

 

E manatua e le toatele lenei alii i le lelei ma le vave o ona lima i totonu o le maea, ae o le faalavelave, e oti gofie pe a maua e le au pupuu i le tulimanu, ma le iloa ai loa sana gaioiga e faia.  O se tasi o fusuaga mataina a Carl lea na ia lu’iina ai le fusi o le lalolagi mai ia Tyson, e le’i uma le taamilosaga muamua ae palasi o ia i lalo ua uma i faiga a Tyson.

 

TOE AAMI E LE LIONA IA NEIL JENKINS

 

Ua toe aami e le pulega a le au o le Liona a Peretania le alii o Neil Jenkins e avea ma faiaoga lagolago i le laina i tua o le au, ona o le tulaga mataina sa i ai lana taalo i tausaga ua mavae. O Neil sa umia le numera 10 a Wales ma le Liona i tausaga ua mavae, ma ia faatutuina ai ni matatia matautia i le malaga taamilo a le Lione i Aferika i Saute i le 1997, ina ua ia maua ‘ai e 41 i taaloga sa faia ma manumalo uma ai.

 

Na taua e le faiaoga a le Liona ia Warren Gatland e faapea, o Neil e lelei tele lona mafaufau i le faaaogaina o le polo, ma ua manaomia lana fesoasoani mo le laina i tua o le au a le Liona. O le malaga taamilo a le Liona i Ausetalia i le 2001 na mataina ai le taalo a Neil i taaloga faitauina e tolu sa faia, e ui e na o le tasi le latou manumalo ae lua faiaina ia Ausetalia, ae o le malaga i le 1997 na manumalo uma ai le Liona i ana taaloga e 3-0 a Aferika.

 

MALAGA MITCHELL E TAALO I LE KALAPU A TOULON

 

O le uigi tautaua a Ausetalia ia Drew Mitchell lea ua silia ma le 63 ana taaloga faitaulia mo le au tele a Ausetalia, ua sainia nei sana konekarate ma le kalapu a le Toulou i Farani mo le lua tausaga, e taalo ai i le taamilosaga o le French Top 14, lea foi o lo o taaalo ai ma isi alo o Samoa. Na taua mai i se ripoti e faapea, o le au a Toulon e fai lava si malosi peitai e faaletonu lava le latou tulaga o le uigi.

 

O le alii o Mitchell ua 29 tausaga o lona soifua ma na amata taalo mo Ausetalia i le 2005 e oo mai i le Ipu o le lalolagi i le 2011.

 

Ae o le alii Samoa ia Digby Ioane lea o lo o taalo i le au a le Queensland Reds a Ausetalia ua ia faalauiloa sana fuafuaga o le a alu ese mai ma lana kalapu o lo o i ai. E ui e lei faailoaina e Ioane mafuaaga o lana faaiuga peitai na taua i ni ripoti e faapea, ua sauni lenei alo o Samoa e sui lana kalapu e taalo ai. E lei faailoaina mai e Ioane poo fea lea o le a taalo lakapi ai.

 

faaliliu: Toleafoa H. Auvaa