O se poloaiga na sainia e le afioga i le Komesina o Leoleo i le aso ananafi, ua ia tofia ai Cmdr Afui’ai Lee Vaouli e avea ma pule fou o le Ofisa o Taavale Afi a le malo i Tafuna, le OMV.

I lana poloaiga na tuuina atu i le Ofisa o Taavale Afi sa ia taua ai e faapea, o tiute uma ma galuega sa tauave e le sa avea ma pule o le Ofisa, o le a tuuina atu uma i lalo o le vaavaaiga a le susuga ia Cmdr Vaouli, i le taimi lava e amata ai ona ia tauaveina ona tiute fou e pei ona tofia ai o ia.

Na taua foi i le poloaiga a le komesina e faapea, o le konekarate a le afioga ia Faamausili Mau Mau Jr lea o loo avea ma pule o le OMV i le taimi nei, na maea i le masina o Iuni, ma e le’i toe faafouina.

Ina ua fesiligia e le Samoa News le tofa Tuaolo M. Fruean i le aso ananafi, sa ia taua ai e faapea, o le mafuaaga ua ala ai ona faia lenei suiga, ona ua maea le konekarate a Faamausili.

“E oo mai lava i le taimi nei e lei oo mai lava Faamausili ia te a’u ma te talanoa ma faapea mai, o lana konekarate ua maea, e manaomia le toe faafou, afai la ua le toe faafouina le konekarate, o lona uiga ua tatau ona tofia se isi na te tauaveina galuega a le ofisa, aua e le avea le le faafouina o le konekarate ma itu e taofia ai galuega a le ofisa e manaomia le faaauau pea,” o le fetalaiga lea a Tuaolo.

Na taua foi e Tuaolo, o le komesina o loo i ai le malosi na te tofia ai soo se tasi e pulea le OMV.

O le afioga ia Faamausili na tofia e avea ma pule le tumau o le OMV, ina ua faamavae le sa avea ma pule i le tele o tausaga, le faletua ia Marie Ripley, ina ua alia’e mai le mataupu e pei ona tuuaia ai o ia, i le i ai lea o lona aafiaga i le mataupu e uiga i le laisene ave taavale pepelo lea na tuuina atu i se tamaitai mai Tonga e leai ni ona pepa nofomau.

A’o le’i tofia Faamausili i le tulaga lea, sa avea o ia ma Senatoa a lona itumalo i le maota maualuga mo le umi e 4 tausaga.

O Faamausili na malolo litaea mai i le Ofisa o Leoleo ina ua ia umia le tofiga o le Commander.

I taimi na tulai mai ai Faamausili e avea ma pule le tumau o le ONV, e tele suiga sa ia faia i auala e faafoeina ai laisene ave taavale o tagata, e aofia ai ma le suiga o le laisene o taavale lea ua faaaogaina i le taimi nei.