O le vaiaso na te’a nei na saini ai e le Komesina o Leoleo se poloaiga, e toe fa’afo’i ai ni leoleo se to’atolu i galuega ma tulaga sa galulue muamua ai, ma suia ai le fa’aiuga sa faia e le afioga i le Sui Komesina le tumau o le Matagaluega e aveese mai ai leoleo ia e to’afa mai vaega sa galulue ai, ae tu’uina atu i vaega i totonu lava o le matagaluega o leoleo.

O le aso 29 Me, 2014 na sainia ai e Save Liuato A. Tuitele se poloaiga a o avea o ia ma komesina le tumau mo le matagaluega o leoleo, e aveese mai ai leoleo e to’afa mai vaega sa galulue ai, ae tofia e galulue i vaega e pei ona pei ona tofia i ai.

I se vaega o le poloaiga na sainia e Save sa ia taua ai e fa’apea, “talu ai o tu’uaiga sa fa’asalalau i luga o le leitio o le ‘FM 103.1’ fa’asaga i leoleo ia, ua faia ai loa lea fa’aiuga le tumau ina ia aveese mai leoleo nei mai vaega o lo o galulue ai, ae tofia e galulue i vaega fou ua tofia ai i latou, a o fa’agasolo ai se su’esu’ega fa’apitoa a le Ofisa o le Loia Sili i lalo o se fa’atonuga mai le Lutena Kovana, i le moni ma le le fa’amaonia o nei tu’uaiga”.

O leoleo e to’afa na aofia i lenei fesuiaiga e aofia ai leoleo e to’alua mai le Vaega o Leoleo Su’esu’e, lea na tofia le isi to’atasi e galue i le Vaega o Fa’amaumauga a le Ofisa o Leoleo (Record Division), i lalo o le ta’ita’iga a Capt. Kilisitina Simau, ae o le isi na tofia e galue i le Ofisa o Ta’avale Afi i Tafuna (OMV), i lalo o le ta’ita’iga a le pule o le OMV ia Cmdr. Lumana’i Maifea.

O le isi ali’i leoleo sa galue i le vaega o le Traffic Division, ae na tofia e galue i le vaega a le ‘Training Division’, i lalo o le ta’ita’iga a le susuga a Cmdr. Tauese Va’a Sunia, ma le isi leoleo sa galue i le Falepuipui o Tamaiti, ae na tofia ina ia galue i le toese o tagata matutua, le TCF i Tafuna.

O le aso Tofi na te’a nei, 12 Iuni, 2014 na sainia ai e le William E. Haleck se poloaiga e suia ai le fa’aiuga na faia e Save, ma ia toe tofia ai leoleo nei e toafa ina ia toe fo’i i a latou galuega masani.

I se vaega o le poloaiga a le alii komesina sa ia taua ai e fa’apea, “talu ai o le to’alaiti o le tatou aufaigaluega o lo o i ai, o le a aloaia ai loa suiga e pei ona taua i lalo i le aso Faraile, 13 Iuni 2014”.

Na taua fo’i e Haleck e fa’apea, “o le poloaiga lenei o le a suia ai se isi lava faaiuga sa faia fa’asaga i leoleo nei”.

O suiga sa faia fa’asaga i leoleo nei, na afua mai i le mataupu lea o lo o tu’uaia ai i latou e se aiga mai Pago Pago, i lo latou fa’aaoga lea o se malosi e taofia fa’apagota ai se ali’i e a’afia i le gasegase o le mafafaufau i le masina o Me na te’a nei, ina ua faia e lenei ali’i ni gaioiga e le tusa ma le tulafono.

Ina ua fesiligia e le Samoa News le komesina o leoleo e tusa ai o lea mataupu, na ia fa’amaonia mai ai le fa’agasolo pea o su’esu’ega e uiga i tu’uaiga fa’asaga i leoleo, ma ua lata fo’i ina mae’a nei su’esu’ega.

“O lo o fa’agasolo pea i le taimi nei su’esu’ega fa’asaga i lenei mataupu, ae o la’u tatalo o lo o i ai, talosia ia ta’u mama igoa o leoleo o lo o tu’uaia i le fa’aiuga o su’esu’ega o lo o faia”, o se vaega lea o le saunoaga a Haleck.

Sa ia taua fo’i lona le malamalama i le mafua’aga ua ala ai ona tofia le Ofisa o le Loia Sili latou te fa’atautaia le su’esu’ega fa’asaga i lenei mataupu, a o lea e i ai sui o le matagaluega o leoleo o lo o i ai le agava’a i le fa’afoeina o su’esu’ega fa’apea.

O le mataupu e pei ona tele ai faitioga ma tu’uaia ai leoleo i lo latou fa’aaoga o se malosi (excessive force) e taofia fa’apagota ai le ali’i na a’afia i lenei mataupu, ua tutupu ai ni isi o lagona eseese i ni isi o leoleo, ma latou taua ai le oso o le musu e fa’atino tiute fa’aleoleo i taimi e tutupu ai ni fa’afitauli fa’apenei i le atunu’u, pe afai o le tulaga lea e o o i ai, o le a’afia ai o a latou galuega mai lo latou taumafai e fa’atino o latou tiute.

Na taua e Haleck e fa’apea, e le tatau i leoleo ona manatu fa’apea, ae tatau lava ona tula’i mai e fa’atino a latou tiute na mafua ai ona avea i latou ma leoleo.

“E tatau ona i ai ni lagona fa’apena i leoleo, o latou o leoleo, o le latou tiute o le puipui lea o le saogalemu o le atunu’u”, o le saunoaga lea a Haleck.

“O le taimi lava na fa’atauto ai oe e avea ma leoleo, ma e laei i le toniga leoleo, ua ia te oe le malosi e faia ai gaioiga uma e puipuia ai le saogalemu o tagata, e fa’alagolago atu le atunu’u ia te oe”, o le isi lea saunoaga a Haleck, ma ia taua ai lona sauni e talanoa i Ta’ita’i o Ofisa leoleo i Leone, Tafuna, Fagatogo ma Fagaitua, ina ia fautuaina ali’i ma tama’ita’i leoleo e aua le fa’avaivai mai le fa’atinoina o a latou tiute, aua fo’i nei avea le fa’afitauli e pei ona tu’uaia ai ni isi o leoleo ma auala e mumusu ai e fa’atino a latou tiute.

“Tusa lava po o a faitioga a le atunu’u, ae afai e silafia e le leoleo o lo o fa’atino ona tiute e tusa ai ma ta’iala ma tulafono o lo o lima ta’ita’ina ai le fa’atinoina o ana tiute, e leai la se mea e popole ai fua le leoleo”, o le saunoaga lea a Haleck.

Na fa’amanino e Haleck e fa’apea, o le fa’alavelave e pei ona tu’uaia ai leoleo, na tula’i mai i le aso mulimuli o le vaiaso o fa’agaioiga a le matagaluega o leoleo, ina ua maitauina e leoleo o lo o tu’uaia gaioiga a le tamaititi na a’afia i lona taumafai lea e fa’aleaga fa’ailoilo i luga o le auala, ona fai lea i ai o leoleo e taofi lana gaioiga o lo o fai, ae lu’i e le ali’i lea leoleo ma tula’i mai ai loa le mataupu e pei ona tu’uaia ai leoleo, ina ua latou taumafai e taofi le tamaititi ae sa tete’e atu o ia i leoleo.

Na taua e Haleck e fa’apea, o leoleo na aafia i le mataupu lenei, e leai ma se isi o i latou na i ai ni ‘cuff’, e leai fo’i se isi o i lato na sauni mo se mea fa’apea e tupu, o le mafua’aga lea na aofia ai le to’afa o leoleo i le tau taofiofiina o le tamaitiiti i lalo, a o fa’atali le taunu’u ane o leoleo ma ‘cuff’.