Talu mai le aso Faraile na te’a nei lea na fuafua e tapunia aloaia ai le polokalame o lo o faagasolo a le malo, e fa’aleleia ai pepa nofomau a i latou o lo o nonofo faasolitulafono i le teritori (Amnesty Program), ua silia i le 2,400 le aofa’i o tagata ua mae’a ona lesitala o latou suafa i lea polokalame, e pei ona faamaonia mai e le loia fautua a le alii kovana ia Steven Watson i le Samoa News.

Ae talu ai o le manaoga ina ia lesitalaina uma i latou o lo o fa’aletonu tulaga o latou pepa nofomau, ua finagalo ai le malo o le a toe faaopoopo isi vaiaso e lua e faaauau ai le polokalame, ma ua faamoemoe e tapunia aloaia loa i le aso 28 Mati, 2014, ae le o le aso 14 Mati e pei ona ulua’i fa’alauiloa mai.

Saunoa Watson e fa’apea, o le agaga o le polokalame lenei, ia mafai ona lesitalaina uma tagata o lo o fa’aletonu a latou pepa nofonau i totonu o le teritori.

“O lo o faaauau pea ona galulue la matou vaega i le Fale Laumei i Utulei, mo le faamaopoopoina o suafa o i latou uma e aga’i atu e fia lesitala, ma e toe valaau atu i le atunuu, o lo o matala pea le faitoto’a mo le lesitalaina o lou suafa pe afai e te le i oo mai lava e te lesitala,” o le saunoaga lea a Watson.

Na taua e le tama’ita’i loia sili lagolago ia Mitzie Jessop i se ulua’i ripoti a le Samoa News, le faafiafia o le latou komiti o lo o galulue i le tuu faatasia o lenei polokalame, i le toatele o le atunuu ua mafai ona aga’i atu ma lesitala o latou suafa i le polokalame.

Na taua e Jessop e faapea, o ni isi o le atunuu sa mafai ona agai atu e lesitala o latou suafa, sa i ai lo latou manatu o le polokalame lenei e mafai ai ona suia tulaga o lo latou aumau ai i le teritori, ina ia avea ai loa i latou ma tagata nofomau, ma o se tasi lea o itu e le o malamalama lelei ai le to’atele i le aano o le polokalame.

Ua fautuaina fo’i e le susuga ia Aofaga Ricky Salanoa o lo o galue i le Ofisa o le Amnesty le mamalu o le atunuu ua tuuina atu i ai faatonuga mo pepa faamaonia o lo o manaomia, ina ia oo atu loa i le Fale Laumei mo le tuuina atu o pepa e pei ona taua, ina ia faa faigofie ai le faagasoloina o a latou pepa i lalo o le polokalame.

fa’aliliu Ausage Fausia