Ads by Google Ads by Google

Olaga Le Tumau

Vaega: 135

 

“Le Ali’i e, ia i luga o si o matou atunu’u o Samoa ou manuia, ina ia mafai ai ona o matou maua pea le ola ma le malosi e fa’atino ai a matou fuafuaga i aso uma o lo matou ola, a’o le vi’iga ma le fa’afetai matou te fa’afo’i atu i Lau Afio e fa’avavau, fa’avavau lava, amene.”

 

E tatalo fo’i, e fa’ailoa atu i le Atua, ia foa’i i a te ia le loto fa’amagalo, ina ia mafai ai ona ia fa’amagalo atu. Atonu o le malosi’aga lea na mafai ai e Keisi ona tauivi ma ona tiga, o le mafua’aga fo’i lea na malosi ai lona loto, ona ua talitonu, e leai se mea e faigata i le Atua Soifua.

 

Fai mai, e pei e va’aia e Keisi se vavega ua faia mo ia lava, ina ua pa pa faititili ma ‘emo ulia, ae o le maligi fo’i o timuga i lea tiami, na lagona ai le loto fa’afetai o Keisi i le Atua i mea uma, ae maise ai o le ola ma le malosi ua ia toe fa’afo’i mo ia.

 

Na fa’ate’ia mafaufauga o Keisi, ina ua tatagi le telefoni, na lagona lelei e Keisi, ua tali e Loleni le telefoni, ma sa tu’u atoa lana fa’alogo ina ia lagona ai tala a Loleni, ma ia iloa le tagata o lo’o vala’au ane.

 

Ae o le tagata lea, o lona uso o Lulu, o lea ua vala’au ane ia Loleni, ina ua va’ai atu ua tulaga fa’aletonu le tau, ma toe fa’atulaga le latou tafaoga lea o le a alu i le isi a’ai. Na tali Loleni, ua lelei, ae o le a toe vala’au atu mo nisi fa’amatalaga pe afai e o’o atu e le i suia le tau.

 

E le i umi, ae tu ane Loleni i le faitoto’a o le potu o Keisi, “Keisi, o lou uso o Lulu lea na vala’au mai, fai ma e le sau nei.”

 

“Talofa Keisi, o a mai oe i lenei taeao matagofie, o le taeao lenei o le Aso Sa, ua va’aia le matagofie o le susulu mai o le la.” Ua pulapula a’e i luga mata o Keisi, ma ia iloa ai o le isi tama’ita’i tausima’i o Alieta lea ua alu ane e sui ia ma tapena lona moega ma lona potu.

 

Ua pisi solo nei Alieta e tapena le potu o Keisi, ma fa’ata’ele ma fai ona ofu mama, ae o le taimi atoa lava, na lagona e Keisi le mafanafana o pa’i ane o lima o Alieta i a te ia, ma sa atili ai ona malosi lona loto. Ae ua toe fo’i mafaufau o Keisi i le tama’ita’i tausima’i amio fa’atiapolo o Pesi, e ‘ese’ese mamao ma Alieta.

 

Ina ua uma ona fa’ata’ele, fafaga ma tapena le potu o Keisi, na fa’apea ane ai loa le tala a Alieta, “Keisi, ia ua e tapena lelei e fa’afeiloa’i lenei aso fou.” Fai mai, na fa’apea le tali a Keisi, ae e le o lagona ane e Alieta, “Alieta, e leai, ua ou tapena e fa’afeiloa’i lo’u oti.”

 

E faia pea….