E le gata o loo talosia e le maota o sui i ana talosaga i taeao ta’itasi se fesoasoani mo fa’afitauli o loo a’afia ai le atunu’u ma le malo, e pei o fa’afitauli o loo a’afia ai le pulega a le Falema’i i Fagaalu, ae o loo galulue fo’i afioga i Faipule i le tau sailiia lea o ni auala e foia ai nei fa’afitauli.

Na fa’ailoa e le Fofoga Fetalai ia Savali Talavou Ale i le vaiaso nei e fa’apea, “e le avea le le avanoa mai o sui o le Falema’i ma le Komiti Fa’afoe ma auala e taofia ai galuega a le Fono, e tatau pea ona fa’aauau galuega a le Fono ina ia mautinoa o loo tatou galulue e saili ni auala e foia ai fa’afitauli o loo a’afia ai le falema’i ma le soifua maloloina o tagata.”

O le saunoaga a Savali, o sana tali atu lea i le saunoaga a le taitaifono o le Komiti o le Falema’i/Soifua Maloloina a le maota o sui ia Vesi Talalelei Fautanu, ina ua ia fa’ailoa i luma o le maota o sui, ua mafua ona le taunu’u le iloiloga sa fa’atulaga ma sui o le falema’i i le vaiaso nei, ona e le o avanoa sui o le komiti fa’afoe faapea ai le pulega a le falema’i.

Saunoa Vesi i luma o le maota e faapea, e le mafai e le komiti ona faataunuu se iloiloga mo se tagata se to’atasi, ae sili pe a toe tolopo le iloiloga se’i avanoa uma mai sui o le komiti faafoe ma le pulega a le falema’i.

E lei nofo lelei i le fonagalo o Savali le saunoaga a Vesi, ma ia saunoa ai loa e fa’apea, e lei oo mai se faaaliga mai le pulega a le falema’i e fa’ailoa mai ai le le avanoa o sui o le komiti fa’afoe poo sui o le pulega a le falema’i.

“E le tatau ona tolopo le iloiloga, e tatau lava ona fa’ataunuu galuega a le maota, o lea e faatali le atunuu i se gaioiga a le fono e fai, ao lea e fealoalofa’i mai sui o le falema’i,” o le sauoaga lea a Savali, ma ia talosagaina ai loa le maota, e taoto atu le mataupu se’i saili e lona ofisa pe moni o loo malaga i fafo sui o le falema’i

Ae na fa’aleo e le afioga i le tama’ita’i faipule mai le Itumalo o Tuala-uta ia Vui Florence Vaili Saulo e fa’apea, e le mama i lona taofi fa’aletonu o loo alia’e mai i le falema’i, i le va o le Pulega ma le Komiti Fa’afoe, ona o lea e fa’aauau pea ona safa tagata i aso ta’itasi, o loo vaaia fo’i le maliliu pea o le atunu’u.

Saunoa atili Vui e faapea, e tatau lava ona finau le fono e fa’atino lana pito laau, ina ia mautinoa e foia faafitauli o loo aafia ai le auaunaga a le falema’i i le atunu’u.

I luma o le maota maualuga i le vaiaso nei na fa’alauiloa aloaia ai fo’i e le tofa a Tuaolo M. Fruean, o le taitaifono lea o le Komiti o le LBJ/Soifua Maloloina a le senate, le toe tolopo o le latou iloiloga sa fa’atulaga mo le vaiaso nei, ona o lea ua maua i ripoti o loo malaga isi sui o le komiti faafoe ma le pulega a le falema’i i fafo.

Saunoa atili Tuaolo e fa’apea, e le taua le valaau o le iloiloga ae le o aofia uma tagata e tatau ona fesiligia e le maota, ae na saunoa le alii peresetene o le Senate ia Gaoteote Palaie Tofau e fa’apea, e le toe manaomia e le Senate tagata e le maua mai ai ni tali sa’o ma le mautu, se’i vagana i latou e mafai ona tali i mataupu o loo atugalu i ai le Fono.