Vaega: 80

E i ai pea le fa’amoemoe, o lo’o aoina le masina i le soifua laulelei o le atunu’u i lenei taeao fou, taeao toto’a i lou alafa’i mai i le manuia i le tausiga alofa a lo tatou Matai oi le Lagi, tatou fa’afo’i le mua ma le vi’iga i le Atua e fa’avavau. Amene.

Na toe oso a’e fo’i le Satani lea o Pesi, “Loleni, o e mo’omia se fesoasoani?” Na tali Loleni, e alu e avane lana ‘ato o lo’o i lona potu. Ae manatua, o le potu o matua o Keisi lea ua moemoe ai le ula leaga lenei o Loleni, ae ua tu’u na o Keisi e nofo i le la potu na masani ona momoe ai.

Fai mai ina ua alu ‘ese Pesi e avane le ‘ato a Loleni, na toe liliu nei Loleni ma talanoa i le telefoni, “Sitivi, o e iloa le uiga o lau mea lea e fai, ae o le a le mea ua e vala’au mai ai i le fale, e te iloa ea o vala’au fa’apenei e mafai ona sa’ili’ili e Leoleo.”

I totonu o le nofoaga pogisa o Keisi, ua lagona lona fefe, ma ua tu’u fesilisili lona mafaufau, o le a le mea lea e tupu. Na toe fa’apea le tala a Loleni i le telefoni, “Ioe, o lea e i fale, o lea ma te fa’atasi i le taimi nei, ae ou te fia fa’ailoa atu i a te oe, o lo’o fa’asolosolo manuia lava i aso uma.”

Ua taunu’u ane Pesi ma le ‘ato a Loleni, ma na fesili loa Pesi i a Loleni pe mana’o e alu ‘ese mai le potu, na tali Loleni, ioe, ona o se mataupu taua lea e fia talanoa ai i le tagata lea o lo’o i luga o le telefoni.

Ina ua tu’ua e Pesi le potu o Keisi lea e fai ai le telefoni a Loleni, na toe fa’alogo ane nei Keisi, ua sui le leo o lona to’alua,  “Va’ai oe e le mafai ona ou talanoa atu i a te oe i le taimi nei, ae ou te toe vala’au atu i se taimi, ae ‘aua lava ne i ai sou manatu e te o’o mai i le fale, ua e fa’alogo mai, ua e malamalama i la’u tala lea e fai atu,’aua lava ne i o’o mai i le fale.”

Na fa’alogo lelei ane lava Keisi, ua ato i lalo e lona to’alua o Loleni le telefoni. Ua ta mau nei i le mafaufau o Keisi, o le tagata lea na talanoa ma lona to’alua i luga o le telefoni, o le tamaloa tonu lava lea na alu ane i lona potu, a’o ta’oto i le falema’i. Ae o le taimi lea ua na o le savali fa’afitafita o Loleni i lea itu ma lea itu o le moega o Keisi.

E faia pea…