TAGATAVALEINA SE ALI’I TUSITALA

O le vaiaso nei na maliu ai i totonu o se falema’i i le aai o Baku i le atunu’u o Azerbaijan se ali’i tusitala sa taofia ai ona o manu’a tuga na a’afia ai lona tino, e mafua mai ina ua fasi fa’amo’amo’a o ia e ni tagata e lagolagoina se ali’i ta’alo Soka sa ia ripotia i sana ripoti i luga o le televise e faigaluega ai. O le aso Sa na te’a nei na taofia ai le alii o Rasim Aliyev i le falema’i, ae na fa’aatoa maliu i le aso ananafi. Na taua i  ni ripoti mai le atunu’u e fa’apea, i tausaga uma lava, e to’atele ai tusitala e osofaia ma fasiotia e tagata tete’e, e aofia ai le alii tusitala o Elmar Huseynor lea na fasiotia i le 2005, ma le alii o Rafig Tagi na fasiotia i le 2011, peita’i e oo mai lava i le taimi nei e le’i maua lava poo ai na fasiotia i laua. O loo faagasolo pea suesuega a leoleo poo ai i latou tonu sa auai i le fasiga o le ali’i tusitala.

MAUA FBI IMELI FA’ALILOLILO A HILLARY CLINTON

Mai imeli e tele ua tuu atu e Hillary Clinton mo suesuega o loo faaauau pea faasaga i le taimi ao avea o ia ma Failautusi o Setete i le nofoaiga lenei a Peresetene Obama, o loo aofia ai ni imeli se ‘2’ o loo fa’aigoaina o ‘imeli fa’alilolilo’. O le mataupu fa’asaga i imeli a Clinton na alia’e mai ina ua mapuna ripoti e fa’atatau i lona fa’aaoga o ana masini computer mai lona fale, e momoli atu ai imeli i mataupu e fa’atatau i le puipuiga o le malo tele, a’o avea o ia ma Failautusi o Setete a le malo tele. Ao vevela ai lauga faatosina mo le palota a le malo tele i lenei vaitau, o loo vevesi fa’atasi atu ai fo’i ma le au su’esu’e a le FBI i le tau sailiina lea o le moni o lenei mataupu. I luma o le Komiti o Mataupu Tau Tulafono a le Senate lea o loo fa’agasolo ai iloiloga e uiga i lenei mataupu, o loo fesiligia ai e afioga i Senatoa le siosiomaga o le mataupu lenei, aemaise ai lava le tulaga lea, pe sa maua e Clinton ni isi fa’amatalaga mai fafo atu i le taimi sa ia fa’aaogaina mai ai lana masini computer mai lona fale.

FA’ALAUILOA E POPE FRANCIS ASO FA’ATAUA AI FOAFOAGA

O le aso 1 Setema i tausaga uma e pei ona fa’alauiloa e le Taitai o le Ekalesia Katoliko i le lalolagi, Pope Francis, o le a avea lea ma aso e fa’amanatu ma fa’ataua ai le fa’amamaluina o le aso o le Foafoaga i le lalolagi atoa, aemaise ai fo’i, o le aso Tatalo fo’i lea mo tagata uma. I sana tusi sa lomia i le Vatican e fa’apea, e tatau ona ofo atu e tagata soifua uma le avanoa e aloaia ai mea ola uma sa foafoa e le Alii i le amataga. Sa ia taua fo’i e fa’apea, o le taua o lenei aso, o le a mafai ai e tagata kerisiaso uma ona latou fa’ataua meaalofa na aumai e le Ali’i, atoa ai ma le toe fa’afouina o latou tagata tuai.

LOKA SE TASI SA AVEA MA TA’ITA’I O SAINA

O le alii o Ling Jihua, 58 tausaga, lea sa avea ma se tasi o ta’ita’i iloga o le malo o Saina mo le tele o tausaga, ua taofia nei e leoleo o le malo i le falepuipui, ona o tu’uaiga i lona aafia lea i faiga fa’aalatua, e ala i lona taliaina o ni vaega tupe tetele sa totogi atu e ni isi o ta’ita’i ia te ia, ina ia mafai ai ona fa’aaoga tama’ita’i mo feusuaiga, aemaise ai o le faasoaina atu o fualaau faasaina ma le gaoiina o tupe a le malo sa tuu atu fa’ameaalofa i tagata lautele. O le tofiga sa umia e Jihua i totonu o le Palemene a Saina, e fa’atusa lea i le ‘chief of staff’ a le Falepa’epa’e a Amerika, lea na ia umia mai i le 2007 e oo mai i le 2012. O le taimi lava na toilalo ai le faigamalo sa galue ai Jihua mai le taitaiina o le malo, o iina na amata ai loa ona faia suesuega i faiga piopio sa faia e taitai o le latou faigamalo, ma i’u ina taofia ai loa ni isi sa pito atu i luga ia te ia i tausaga ua mavae, a’o lea ua oo mai ia te ia le fa’asologa o tagata ua molia i le tulafono.