SUA LE ELEELE GALUEGA FALEAOGA FOU A SAMOANA

O le suaina o le eleele mo le galuega o le faleaoga fogafalelua o le A’oga Maualuga a Samoana, na fa’atautaia i le taeao o le aso Faraile na te’a nei, ma sa auai atu i ai le afioga le Kovana Sili Lolo Matalasi Moliga, ma lana kapeneta ae maise o le Fa’atonu o Galuega Lautele Faleosina Faiai Voight, ma le fa’atonusili o A’oga Vaitinasa Dr Salu Hunkin-Finau.

Mai le tauofoga sa fa’aulu ai talosaga a kamupani e to’a 19, ua fa’ai’u ane ua toe 13 i latou na filifili ai le matagaluega po’o ai e lautogia i ai le galuega lenei, peita’i, ua fa’amanuiaina ai le ofo a le Nana’s Construction Company.

E tusa ai ma le fa’amatalaga a le fa’atonu o Galuega Lautele, Faleosina Faiai Voight, “O lo ua fa’ailoa mai e lea kamupani, o le latou ofo e 9 masina e faia ai le galuega atoa, peita’i, o le a tu’utu’u mai ia vave le galuega ona o le tulaga mana’omia o i ai le falea’oga i le taimi nei, e tauau e mafai lava le lima masina, pe a lagilelei le tele o aso lautogia mo le galuega lenei.”

O le tau o le galuega e $1.13 miliona ma ua i ai fo’i lona fausaga tamau e ao ina usita’ia e le konekarate ua fausia nei. O le taimi nei ua ma’ea fausia potu a’oga i totonu o le faleta’alo o Samoana o lo’o faaaoga e le fanau aoga, e faatalia ai le ma’ea o le faleaoga fou.

O le masina o Mati o le 2016, e tatau ona o’o atu i ai, ua amea ona fausia ma fa’aaoga lea falea’oga fou, ma o se vaega tupe mai le CIP Funds o lo’o faatupe ai le fausia o le faleaoga fou.

O lo’o fausia fo’i e le Nana’s Construction le falea’oga o Aua Elementary ina ua mae’a fa’aulufaleina le galuega o le falea’oga o Leatele Elementary School i Fagasa.

AMATALIA A’OGA TATAFITI A FANUA

Ua mae’a fa’atulaga le amataga o a’oa’oga mo fanauiti ina ia iloa ona tauva i le “Tatafiti.” Ua fa’aigoaina lea vasega o le Kindergym, ma e faia vasega i Pago Pago i le Faleta’alo tele o le Tupulaga o lo’o ua mae’a fa’atuina ai.

O le taumafaiga lenei sa afuafua mai i le so’otaga o le ali’i Komesina o Ta’aloga a Amerika Samoa, Ethan Lake ma le tama’ita’i e fa’apitoa mo lea ta’aloga mai Ausetalia, Brooke  Kneebush. Ua toe taliu lenei tama’ita’i ina ua mae’a le 12 o aso a’otauina fanauiti ae maise o tama’ita’i ma ali’i faia’oga i lea fo’i ta’aloga.

E to’atolu faia’oga tama’ita’i o le atunu’u ua lautogia mo a’oga amata o lenei ituaiga o kosi, ma ua fa’amoemoe o i latou nei e amatalia ona a’oa’oa le fanau i le tatafiti po’o le gymnastics. Ua fa’ailoa fo’i i fa’amaumauga i lipoti tau lea ta’aloga, e vave tele ona lelei le taumafai a tamaiti i lea fo’i ta’aloga pe a’oa’o mai a’o laiti ma vavai o latou tino.

O vasega fa’apitoa mo lea a’oa’oga e faia i aso Lua ma aso Tofi o vaiaso ta’itasi ma e tatala mo fanau i le va ole 1-5 tausaga, ma o lo’o faia fo’ lenei tautua e aunoa ma se totogi i le taimi nei. O itula e faia ai i le va lea o le 10:00 ma le 11:00 i le taeao lava.

TALAVAI E LE TOTOGIA MO NIFO O LE FANAU A’OGA

E le’i tuai ona faia siakiga o oloa o lau fanau, pe afai e le’i faia lava i lenei tu’uaga umi o le aoga. O lo’o totoe pea le taimi ua ofoina mai ai lenei tautua,  a le Matagaluega o Fa’inifo a le falema’i o le LBJ i Fagaalu, ma e o’o lava ia Aukuso 28, o tatala pea lea tautua mo le fanua a’oga.

Ua fa’ailoa mai e talavai fua fo’i le siakiga o nifo, fautuaga mo le fanau i le tausiga o Nifo,  fa’aaogaina o le flouride e fufulu ai Nifo, ma le se’iga o nifo ma le fa’atulaga o isi talavai mulimuli mai.

O nei tautua uma ua ofoina mai e le Fale Fainifo mai le aso Gafua se’ia pa’ia le aso Faraile mai le 8 i le taeao se’ia pa’ia le 2:00 i le aoauli. Peita’i o le vaega a le ECE lea e i ai le latou Ofisa autu i lalo ane o le fale o le kovana, o le aso 28 Aukuso, o lona toe aso.

O le fanau e i lalo mai o le 13 tausaga e aofia uma i lea polokalama, ma o aso Lulu ua fa’atulaga ai na’o i latou ua fa’atulaga e va’aia foma’i, ae o le toatele e fa’asolo lava i lou muamua ane i le talavai nifo. Afai e aumaia fanau iti e a’o’oga, e ao ina manatua le taua’aoina o pepa ma’i o fanauiti mo le saini ma fa’amaumauga a  ali’i foma’i.