[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua fa’asoa atu ai e Lami lona manatu i le tuagane o si ona tina, ua tatau ona alu e saili sana galuega e fesoasoani ai i le tausiga o le latou aiga.]

Na te’i le fa’alogo a Tomasi i le mataupu lea ua talatalanoa atu i ai le tamaititi o Lami. Ua ese lagona o le tamaloa i lea taimi, ua oso lona loto alofa isi ona tuafafine ma si ana tama, ona o mafaufauga ia ua fa’ailoa ane e le tamaititi o Lami ia te ia, ao lea e le’i leva ni aso o le latou mafutaga. E tilotilo atu Tomasi i lana uati, e le o toe umi se taimi o totoe ona taunu’u lea o le pasi usu lea e masani ona pikia tagata faigaluega i le latou pito nuu i le vaveao, ae ua oso lona fia talatalanoa ia Lami ma lana folasaga lea ua fa’ataoto ane. Na ona lua lava o miti a le tamaloa o Tomasi i lana ipu ti vevela, ona ea loa lea i luga ma fa’apea atu ia Lami, “Vaai oe si o’u nephew, e le faigofie le tulaga lea ua e fa’asoa mai ai i lenei taeao. ua tele fo’i lo’u fia talatalanoa atu, ae paga lea, ua oo i le taimi e tatau ai ona ou alu ou te faigaluega, ae fa’apenei la le tonu, a ou manava mai loa nanei, pe a uma ona fai se tatou faigalotu ma se tatou meaai, ona ta savalivali mai loa lea i luma o le malae ta fa’asavili ma ta talatalanoa ai i le mataupu lea ua e fa’asoa mai ai,” e fai lava tala a le tamaloa o Tomasi ma tu i luga, ona savali atu loa lea ua milimili le ulu o le tamaititi o Lami ma toe fai atu i ai lana fa’amatalaga, “Lami, vaai fa’alelei si ou tina, faitalia a’u ma tausi lo tatou aiga,” o upu mulimuli ia a Tomasi ma savali ese atu loa ma le fale, ae ua tu le tamaititi ma tapena i tua ipu na inu ai le ti a le tuagane o lona tina, ona fa’apea atu lea o lana tali, “manuia lou aso.”

E savali ese atu fua le tamaloa o Tomasi i le taimi lea, ae o lona loto ua le mautonu, ua oso lona alofa i lenei tamaititi laititi ma le loto tele, ona o lea ua finau mai i le auala e tausi ai le aiga, ae lei taitai lona olaga aoga, o le ituaiga tausaga lea e tatau pea ona alu i le faleaoa e aoga ma saili le poto. E alu ese atu le pasi usu lea ua ti’eti’e atu ai nei le tamaloa o Tomasi i lana galuega, ae o loo tu tu lelei mai lava le tamaititi o Lami i luma o le latou fale ma vaavaai mai i ai. Na ona lilo atu lava o le pasi, savali telea’i loa ma le tamaititi i le la faleoo ma lona Tina, ua fa’amaulu lona mitiafu lanumoana ma lona ofu vae pupu’u e tipi i tuli le uumi o vae, ona savali lea i le umukuka ma to mai ai le ato fa’afafa lanu enaena o loo tautau ai ua fa’afafa i lona tua, ona savali atu loa lea aga’i atu i luma o le fale ma fa’asolo atu ai lava lana savaliga i le auala. O faamatalaga na maua mai e le tamaititi o Lami i tamaiti o le latou tuaoi lea e faia le galuega o le tae atigi fagu i le taulaga, o le vaveao lava e tele ai atigi fagu i nofoaga sa faia ai inugapia a tagata i le po, atoa ai ma le taimi o le aoauli, pe a oo i malologa o galuega, o taimi pito sili ia ona tele ai le atigi fagu i le taulaga, ma ua manatu loa fo’i Lami, e leai se isi galuega na te maua ai se tupe mo laua ma lona tina, ua na o le tae atigi fagu i le taulaga.