Vaega: 49

“Le Ali’i e, Iesu Keriso, o ou fa’alavalava ua matou malolo ai, o lo matou fa’atuatua fo’i matou te talia ai mea e le o va’aia, alofa mai i a i matou Lau fanau, o a lava ma’i o le tino ma fa’afitauli o lo’o feagai ma i matou, matou te fa’atuatua ma talitonu, o Lou mana matou te mafaia ai mea uma, amene.

O lo’o fa’asolosolo pea le talanoaga a Lulu ma lona uso o Keisi, fai mai na pupula sa’o lava Lulu i foliga o lona uso ma fa’apea atu, “Kesi, o le a le mea e o’o mai ai i a te a’u fa’alogona, o lo’o e lagona mai a’u tala o lo’o fai atu?. O le taimi lea, o lo’o aunagi mai lava Keisi mai totonu o lona nofoaga pogisa, “Ioe, Lulu, ona o oe o lo’u uso, o lo’u toto, lo’u ivi ma lo’u a’ano, o ta’ua o le uso tu ‘ofe, ma e le mafai e se tasi ona ave’esea, e ui lava ina ta ‘ese’ese i nisi itu, ae o ta’ua lava o le uso tu ‘ofe.”

Na fa’ate’ia Lulu, ina ua fa’alogo atu o fa’apea mai se leo tamaloa mai le faitoto’a o le potu o Keisi, “E le mafai ona lagona mai oe.” Ua liliu nei Lulu ma tilotilo atu i le faitoto’a lea o lo’o sau ai le leo, na toe fa’apea lana tala, o le mea tonu lava lea na ou manatu i ai, e le o lagona mai a’u e lo’u uso.

Na fa’alogo atu nei Keisi i le leo lea, ma fesili ai loa, po’o ai lea tagata, ona ua ‘ese le leo lea ua fa’alogo i ai. Na toe fa’apea le tala a Lulu, “ioe, ua ou iloa, ae o ona foliga i le taimi atoa na ou talanoa i ai, o lea e oso ai lava o’u masalosaloga o lo’o lagona mai e Keisi a’u tala o lo’o fai.”

Na tali mai le tamaloa lea, “E leai, o a’u o ieremia, o le foma’i e faia ana fa’amalosi tino.” Na liliu nei Lulu na tu’u atu lona lima e fa’atalofa ai i a ieremia, “O a’u o Lulu, o lo’u uso Keisi.” Na tali ane i ai ieremia, “Ua tatau, ona ua  ou iloa atu le feso’ota’iga e tali tutusa lava o oulua foliga ma Keisi, ua ou fiafia ina ua ou feiloa’i i a te oe, Lulu.” E fai lava tala a ieremia, ma savali atu i le itu o lo’o taoto mai ai Keisi, ua a’apa atu nei ma u’u mai le lima o Keisi ma omiomi malie.

Fai mai o le taimi na omiomi ai e le ali’i foma’i o Ieremia le lima o Keisi, fai mai na lagona lelei lava e Keisi le pa’i atu o le lima o Ieremia i lona lima. Ae ina ua uma ona omiomi e ieremia le lima o Keisi, na liliu loa ma fa’apea atu i a Lulu, “Ua ou va’aia lava suiga manuia o Keisi, ma ua ou iloa fo’i le malosi o ona lima i le taimi lenei, nai lo le taimi muamua na au mai ai, a va’ai loa i ai foma’i fa’apitoa, ona ave’ese loa lea o le isi masini, ae taumafai e fai ana fa’amalosi tino.”

Na fesili ane nei Lulu i a Ieremia, “Ae fa’afefea pe afai e le toe mafai ona manava i lana manava masani.” Na tali Ieremia, o le a iloa lava e ali’i foma’i le mea e tatau ona fai, ma le isi itu, afai ae le mafai e Keisi ona toe manava i lona isu, e le mafai ona ave’esea e le foma’i le masini se’i iloga e mafai ona manava Keisi e pei ona masani ai.

E faia pea…