FAASEA AVE TA’AVALE LAITI & PISINISI

Ua le talafeagai le fa’atulaga o se tama’i pasi - shuttle bus -  e la’u ai turisi i le tele o nofoaga i totonu o le taulaga, ae o lo’o i ai ta’avale laiti, i taimi e taula mai ai meli la’u pasese i le uafu i Fagatogo.

O se manatu fa’aalia lea o nisi o ave ta’avale laiti sa mafai ona fesiligia i fuafuaga fou a le vaega o turisi lea ua faaoga ai le shuttle bus, talu mai le meli lea na taunu’u i amataga o le vaiaso.

Saunoa le sui fa’atonu o le Amerika Samoa Visitors Bureau, ia Vaito’a Hans Langkilde, e fa’apea, “O se mea fou lea ua taumafai i ai ma o le taumafaiga lava ia vave ona o’o turisi i faleoloa ua fa’atulaga i le malae i Fagatogo. E le gata i lea, ae ua maua fo’i se avanoa lelei e le vasega o faioloa i le malae. O lo’o ua taumafai e faia lea fa’ata’ita’iga pe lelei, a leai fesuia’i.”

I nisi avea ta’avale laiti, sa fa’aalia latou manatu i lea mataupu, e le o afaina ai i latou, aua e latalata lava le nofoaga i le Malaeoletalu ma luga o le uafu, a le oso a le turisi i le pasi e mafai lava ona savali, ae o se fa’ata’ita’iga lelei fo’i pe tua ma ni a.

I le taimi nei, e le o mautinoa pe toe fa’aaogaina pasi nei i le isi meli o soso’o mai, peita’i, ua fa’ailoa mai e nisi o le au fai oloa i luga o le malae i Fagatogo, “E le tutusa latou fa’atauga i luga o le malae, ma fa’atauga e maua i luga o le uafu.”

3 TAUTUA FA’ATAUA I LE MASINA O MATI 2015

Ua mae’a fa’alauiloa le masina o Mati 2015 e fa’ataua ai Mea’ai Paleni mo le tausia o le Soifua Maloloina. Ma ua fa’alauiloa fo’i e le afioga le Kovana Sili lona sapaia o le masina o Mati e  fa’ataua ai galuega a le Koluse Mumu i Amerika Samoa.

Ua le gata i lea ua fa’alauiloa e le Sui Kovana ia Lemanu Peleti Mauga, o Mati fo’i e fa’ataua uma ai galuega fa’atino ma tima’ia mo le mamalu lautele, ia alofagia Galuega mo i Latou ua i ai afaina tumau o le tino.

O lona uiga o lenei masina, e ao ina matua nofouta i tatou uma ina ia faia galuega lelei e fa’aleleia ai lou soifua maloloina ma lou aiga atoa, ia tausami i mea’ai paleni, fa’amalositino ma tausia lelei le soifua laulelei i lotoifale o tatou aiga.

E le gata i lea, ae ua tima’i mai fo’i tatou te foa’i atu i so’o se ala e gafatia ai, e fesoasoani  i le Koluse Mumu i Amerika Samoa.

O le lapata’iga mulimuli ina ia fa’aaoga fo’i lenei masina e fesoasoani ane ai i se tasi ua i ai afaina tumau i o latou tino po’o le mafaufau. Ia tatou tausoa fa’atasi ma i latou fita o le olaga, ae ia tu’u avanoa fo’i i sou taimi e te fesoasoani ai i galuega tima’i mo le latou leleiga.

A i ai ni fa’afesili fesoasoani  lea taumafaiga mo i latou ua i ai afaina tumau o le tino po’o le mafaufau, e vala’au i le UCEDD a le Kolisi Tu’ufa’atasi lea e va’aia e le tama’ita’i o Tafa Tupuola.

FA’AULU SUI FOU O LE PHI THETA KAPPA - TOGI MAUALULUGA ASCC

O le sosaiete a le PTK i le Kolisi Tu’ufa’atasi sa latou faia se sauniga fa’apitoa i le aso Faraile 27 Fepuari, 2015 e fa’aulufale aloa’ia ai sui fou e fa’aopoopo i totino tuai o lo’o tutumau pea i le ausia o togi maualuluga i mataupu o tau’avea i le a’oga.

Na auai fa’atasi matua ma aiga o i latou ua fa’aulu, ma ua fiafia fa’atasi i le fa’atautaiga fo’i o le polokalama fa’apitoa mo lea sauniga. O i latou ua fa’aulu ma e fou atu i le PTK i lenei tausaga aoga; Auauna Teoni, Barry B. Patane, Christopher A. Hadley, Eleni Dororthy Fanene, Ellen Amber Ropeti, Emily Johnson, Gavin Seumalo, Ilena Georgia Williams, Josephine Yandall, Kimberly Iosefo, Lottie S. Haleck, Maria Seumalo ma Miracle Ma’ae.